Abu-ul-Aaliya ne kaha (Surah Al-Baqarah mein) jo lafz "mutahharatun" aaya hai is ka maane ye hai ke Jannat ki hoorein haiz aur peshab aur thook aur sab gandugiyon se paak saaf hongi aur jo ye aaya hai "kullama ruziqu minha min samarratin rizqan" akheer ayat tak is ka matlab ye hai ke jab un ke paas ek mewa laya jaye ga phir doosra mewa to jannati kaheinge ye to wahi mewa hai jo hum ko pehle mil chuka hai. "mutashabihan" ke maane surat aur rang mein mile jule honge lekin mazay mein juda juda honge (Surah Al-Haqqa mein) jo lafz "qutufuha daniyatun" aaya hai is ka matlab ye hai ke bahisht ke mewe aise nazdeek honge ke bahishti log khade baithe jis tarah chahein un ko tod sakeinge. "daniyatun" ka maane nazdeek ke hain, "ara-iku" ke maane takht ke hain, Imam Hasan Basri ne kaha lafz "nadhratun minhu" ki tazgi ko aur suroor dil ki khushi ko kehte hain. Aur Mujahid ne kaha "salsabeelan" ke maane taiz behne wali, aur lafz "ghaulun" ke maane pait ke dard ke hain. "yunzafoona" ke maane ye ke un ki aql mein futoor nahi aaye ga. Jaisa ke dunyawi sharab se aa jata hai) aur Ibn Abbas (Radi Allahu Anhuma) ne kaha (Surah Naba mein) jo "dihaqan" ka lafz aaya hai is ke maane lab-a-lab bhare hue ke hain. Lafz "kawa-ib" ke maane pistan utthe hue ke hain, lafz "raheeq" ke maane Jannat ki sharab, "tasneem" wo araq jo bahishtiyon ki sharab ke upar dala jaye ga. Bahishti is ko piyeinge aur lafz "khitam" (Surah Al-Mutaffifeen mein) ke maane mohar ki mitti (jis se wahan ki sharab ki botalon par mohar lagi hui hogi. "nadh-dhakhatan" (Surah Al-Rahman mein) do josh marte hue chashme, lafz "mauzoonatun" (Surah Al-Waqi'a mein) ka maane jadau bana hua, isi se lafz "wazeen-ul-naqati" nikla hai. Yaani ontni ki jhool wo bhi bani hui hoti hai aur lafz "koobun" ka maane jis ki jama "akwabun" (Surah Al-Waqi'a mein) hai, kooza jis mein na kaan ho na kunda aur lafz "abareeq" "ibreeq" ki jama wo kooza jo kaan aur kunda rakhta ho. Aur lafz "uruban" (Surah Al-Waqi'a mein) "uroob" ki jama hai jaise "saboor" ki jama "subur" aati hai. Makkah wale "uroob" ko "arba" aur Madinah wale "ghunja" aur Iraq wale "shakla" kehte hain. In sab se wo aurat murad hai jo apne khawand ki aashiq ho. Aur Mujahid ne kaha lafz "rauhun" (Surah Al-Waqi'a mein hai) ka maane bahisht aur farakhi-e-rizq ke hain. "rayhanun" ka maane (jo isi surat mein hai) rizq ke hain aur lafz "manzoodun" (Surah Al-Waqi'a) ka maane kailay ke hain. "makhzoodun" wo bair jis mein kanta na ho. Mewe ke bojh se latka hua hai baaz log kehte hain ke lafz urub (jo Surah Al-Waqi'a mein hai) is ke maane wo aurtein jo apne khawand ki mehbooba hon, "maskoobun" ka maane (jo isi surat mein hai) behta hua pani. Aur lafz "wa furushin marfoo'atin" (Surah Al-Waqi'a) ka maane bichhone unche yaani upar talay bichhe hue, lafz "laghwan" jo isi surat mein hai. Is ke maane ghalat jhoot ke hain. Lafz "taseeman" jo isi surat mein hai is ka maane bhi jhoot ke hain. Lafz "afnanun" jo Surah Al-Rahman mein hai. Is ke maane shakhein daliyan aur "wa jana-l-jannataini danin" ka maane bahut tazgi aur shadab ki wajah se wo kalay ho rahe honge
.

Hum se Ahmad Bin Yunus ne bayan kiya, unhon ne kaha hum se Laith Bin Saad ne bayan kiya, unhon ne kaha ke hum se Nafi ne bayan kiya aur un se Abdullah Bin Umar (Radi Allahu Anhuma) ne bayan kiya, unhon ne kaha ke Rasul Allah (Sallallahu Alaihi Wasallam) ne farmaya "Jab koi shakhs marta hai to (rozana) subah-o-sham dono waqt is ka thikana (jahan wo aakhirat mein rahega) ise dikhlaya jata hai. Agar wo jannati hai to Jannat mein agar wo dozakhi hai to Dozakh mein."
.