Abdullah Bin Umar (Radi Allahu Anhuma) ne kaha Khalid Bin Waleed (Radi Allahu Anhu) ne (Bani Hudba ki jung mein) kafiron ko marna shuru kar diya, halanke wo kehte jate thay. Hum ne deen badal diya, hum ne deen badal diya, Aap (Sallallahu Alaihi Wasallam) ne jab ye haal suna to farmaya, Ya Allah! Mein to Khalid ke kaam se bezar hoon, aur Umar (Radi Allahu Anhu) ne kaha, kaha jab kisi (Musalman) ne (kisi Farsi aadmi se) kaha ke "matras" mat darr-o to goya us ne ise aman de di, kyunke Allah Ta'ala tamam zabanon ko janta hai aur Umar (Radi Allahu Anhu) ne (Hormuzan se) kaha (jab ise Musalman giraftar kar ke laye) ke jo kuch kehna ho kaho, darr-o mat
.

Aur (Surah Al-Anfal mein) Allah ka ye farmana "wa-in janahu lissalmi fajnah laha" " Agar kafir sulah ki taraf jhukein to to bhi sulah ki taraf jhuk ja." Akheer ayat tak
.

Hum se Musaddad Bin Musarhad ne bayan kiya, kaha hum se Bishr Bin Mufaddal ne, kaha hum se Yahya Bin Said Ansari ne, un se Bashir Bin Yasar ne aur un se Sahl Bin Abi Hathma ne bayan kiya ke Abdullah Bin Sahl aur Muhaisa Bin Masood Bin Zaid (Radi Allahu Anhuma) Khaibar gaye. In dinon (Khaibar ke Yahudiyon se Musalmanon ki) sulah thi. Phir dono hazrat (Khaibar pahunch kar apne apne kaam ke liye) juda ho gaye. Is ke baad Muhaisa (Radi Allahu Anhu) Abdullah Bin Sahl (Radi Allahu Anhu) ke paas aaye to kya dekhte hain ke wo khoon mein laut rahe hain. Kisi ne un ko qatl kar dala, khair Muhaisa (Radi Allahu Anhu) ne Abdullah (Radi Allahu Anhu) ko dafan kar diya. Phir Madinah aaye, is ke baad Abdur Rahman Bin Sahl (Abdullah Radi Allahu Anhu ke bhai) aur Masood ke dono sahibzade Muhaisa aur Huwaisa Nabi Kareem (Sallallahu Alaihi Wasallam) ki khidmat mein hazir hue, guftagu Abdur Rahman (Radi Allahu Anhu) ne shuru ki, to Aap (Sallallahu Alaihi Wasallam) ne farmaya, ke jo tum logon mein umar mein bade hon wo baat karein. Abdur Rahman sab se kam umar thay, wo chup ho gaye. Aur Muhaisa aur Huwaisa ne baat shuru ki. Aap ne daryaft kiya, kya tum log is par qasam kha sakte ho, ke jis shakhs ko tum qatil keh rahe ho is par tumhara haqq sabit ho sake. In logon ne arz kiya ke hum ek aise muamle mein kis tarah qasam kha sakte hain jis ko hum ne khud apni ankhon se na dekha ho. Aap (Sallallahu Alaihi Wasallam) ne farmaya ke phir kya Yahud tumhare dawe se apni bara-at apni taraf se pachas qasamein kha kar ke kar dein? In logon ne arz kiya ke kuffar ki qasamon ka hum kis tarah aitibar kar sakte hain. Chunanche Aap (Sallallahu Alaihi Wasallam) ne khud apne paas se un ko deeyat ada kar di
.