Mujh se Muhammad Bin Salam ne bayan kiya, kaha hum ko Wakee ne khabar di, unhein Aamash ne, unhein Ibrahim Taimi ne, un se un ke baap (Yazid Bin Shareek Taimi) ne bayan kiya ke Ali (Radi Allahu Anhu) ne hamare samne khutba diya, jis mein farmaya ke Kitab Allah aur is waraq mein jo kuch hai, is ke siwa aur koi kitab (ahkam-e-shariat ki) aisi hamare paas nahi jise hum parhte hon, phir Aap ne farmaya ke is mein zakhamon ke qisas ke ahkam hain aur deeyat mein diye jane wale ki umar ke ahkam hain aur ye ke Madinah haram hai Air pahadi se falan (Uhud pahadi) tak. Is liye jis shakhs ne koi nayi baat (shariat ke andar dakhil ki) ya kisi aise shakhs ko panah di to is par Allah, Malaika aur insan sab ki lanat hai, na is ki koi farz ibadat qabool hogi aur na nafal. Aur ye bayan hai jo londi ghulam apne malik ke siwa kisi doosre ko malik banaye is par bhi is tarah (lanat) hai. Aur Musalman Musalman sab barabar hain har ek ka zimma yaksann hai. Pas jis shakhs ne kisi Musalman ki panah mein (jo kisi kafir ko di gayi ho) dakhal-andazi ki to is par bhi isi tarah lanat hai
.