Hum se Ishaq Bin Muhammad Farwi ne bayan kiya, kaha hum se Malik Bin Anas ne, un se Ibn Shihab ne, un se Malik Bin Aus Bin Hadthan ne (Zuhri ne bayan kiya ke) Muhammad Bin Jubair ne mujh se (isi aane wali) hadees ka zikr kiya tha. Is liye mein ne Malik Bin Aus ki khidmat mein khud hazir ho kar un se is hadees ke mutaliq (ba-taur tasdeeq) pucha. Unhon ne kaha ke din chadh aya tha aur mein apne ghar walon ke sath baitha hua tha, itne mein Umar Bin Khattab (Radi Allahu Anhu) ka ek bulane wala mere paas aya aur kaha ke Ameer-ul-Momineen aap ko bula rahe hain. Mein is qasid ke sath hi chala gaya aur Umar (Radi Allahu Anhu) ki khidmat mein hazir hua. Aap ek takht par boriya bichhaye, borie par koi bichhona na tha, sirf ek chamde ke takye par taik lagaye hue thay. Mein salam kar ke baith gaya. Phir unhon ne farmaya, Malik! Tumhari qaum ke kuch log mere paas aaye thay, mein ne un ke liye kuch haqeer si imdad ka faisla kar liya hai. Tum ise apni nigrani mein un mein taqseem kara do, mein ne arz kiya, Ya Ameer-ul-Momineen! Agar aap is kaam par kisi aur ko muqarrar farma dete to behtar hota. Lekin Umar (Radi Allahu Anhu) ne yahi israr kiya ke nahi, apni hi tahweel mein baant do. Abhi mein wahin hazir tha ke Ameer-ul-Momineen ke darban Yarfa aaye aur kaha ke Usman Bin Affan, Abdur Rahman Bin Auf, Zubair Bin Awwam aur Saad Bin Abi Waqas (Radi Allahu Anhuma) andar aane ki ijazat chahte hain? Umar (Radi Allahu Anhu) ne farmaya ke haan unhein andar bula lo. Aap ki ijazat par ye hazrat dakhil hue aur salam kar ke baith gaye. Yarfa bhi thodi der baithe rahe aur phir andar aa kar arz kiya Ali aur Abbas (Radi Allahu Anhuma) ko bhi andar aane ki ijazat hai? Aap ne farmaya ke haan unhein bhi andar bula lo. Aap ki ijazat par ye hazrat bhi andar tashreef le aaye. Aur salam kar ke baith gaye. Abbas (Radi Allahu Anhu) ne kaha, Ya Ameer-ul-Momineen! Mera aur un ka faisla kar dijiye. In hazrat ka jhagda is jayidad ke bare mein tha jo Allah Ta'ala ne apne Rasul (Sallallahu Alaihi Wasallam) ko Bani Nadheer ke amwal mein se (khums ke taur par) inayat farmayi thi. Is par Usman aur un ke sath jo diger Sahaba thay kehne lage, haan, Ameer-ul-Momineen! In hazrat mein faisla farma dijiye aur har ek ko doosre ki taraf se be-fikr kar dijiye. Umar (Radi Allahu Anhu) ne kaha, accha, to phir zara thehriye aur dam le lijiye mein aap logon se is Allah ki qasam de kar puchta hoon jis ke hukm se aasman aur zameen qaim hain. Kya aap logon ko maloom hai ke Rasul Allah (Sallallahu Alaihi Wasallam) ne farmaya tha ke "Hum Paighambaron ka koi waris nahi hota, jo kuch hum (Anbiya) chhod kar jate hain wo sadqa hota hai." Jis se Aap (Sallallahu Alaihi Wasallam) ki murad khud apni zaat-e-girami bhi thi. In hazrat ne tasdeeq ki, ke ji haan, beshak Aap (Sallallahu Alaihi Wasallam) ne ye farmaya tha. Ab Umar (Radi Allahu Anhu), Ali aur Abbas (Radi Allahu Anhuma) ki taraf mukhatib hue, un se pucha. Mein aap hazrat ko Allah ki qasam deta hoon, kya aap hazrat ko bhi maloom hai ke Aap (Sallallahu Alaihi Wasallam) ne aisa farmaya hai ya nahi? Unhon ne bhi is ki tasdeeq ki ke Aap (Sallallahu Alaihi Wasallam) ne beshak aisa farmaya hai. Umar (Radi Allahu Anhu) ne kaha ke ab mein aap logon se is muamla ki sharah bayan karta hoon. Baat ye hai ke Allah Ta'ala ne apne Rasul (Sallallahu Alaihi Wasallam) ke liye is ghaneemat ka ek makhsoos hissa muqarrar kar diya tha. Jise Aap (Sallallahu Alaihi Wasallam) ne bhi kisi doosre ko nahi diya tha. Phir aap ne is ayat ki tilawat ki "wama afa-allahu ala rasulihi minhum" se Allah Ta'ala ke irshad "qadeer" tak aur wo hissa Aap (Sallallahu Alaihi Wasallam) ke liye khas raha. Magar qasam Allah ki ye jayidad Aap (Sallallahu Alaihi Wasallam) ne tum ko chhod kar apne liye jod na rakhi, na khas apne kharch mein laye, balki tum hi logon ko deen aur tumhare hi kaamon mein kharch keen. Ye jo jayidad bach rahi hai is mein se aap apni biwiyon ka saal bhar ka kharch liya karte is ke baad jo baqi bachta wo Allah ke mal mein shareek kar dete (Jihad ke saman faraham karne mein) khair Aap (Sallallahu Alaihi Wasallam) to apni zindagi mein aisa hi karte rahe. Hazireen tum ko Allah ki qasam! Kya tum ye nahi jante? Unhon ne kaha beshak jante hain. Phir Umar (Radi Allahu Anhu) ne Ali aur Abbas (Radi Allahu Anhuma) se kaha mein aap hazrat se bhi qasam de kar puchta hoon, kya aap log ye nahi jante hain? (Dono hazrat ne jawab diya haan!) Phir Umar (Radi Allahu Anhu) ne yun farmaya ke phir Allah Ta'ala ne apne Nabi Kareem (Sallallahu Alaihi Wasallam) ko duniya se utha liya to Abu Bakr Siddique (Radi Allahu Anhu) kehne lage ke mein Rasul Allah (Sallallahu Alaihi Wasallam) ka Khalifa hoon, aur is liye unhon ne (Aap Sallallahu Alaihi Wasallam ki is makhlas) jayidad par qabza kiya aur jis tarah Aap (Sallallahu Alaihi Wasallam) is mein masarif kiya karte thay, wo karte rahe. Allah khoob janta hai ke Abu Bakr (Radi Allahu Anhu) apne is tarz-e-amal mein sacche makhlas, nekokar aur haq ki pairwi karne wale thay. Phir Allah Ta'ala ne Abu Bakr (Radi Allahu Anhu) ko bhi apne paas bula liya aur ab mein Abu Bakr (Radi Allahu Anhu) ka nayib muqarrar hua. Meri khilafat ko do saal ho gaye hain. Aur mein ne bhi is jayidad ko apni tahweel mein rakha hai. Jo masarif Rasul Allah (Sallallahu Alaihi Wasallam) aur Abu Bakr (Radi Allahu Anhu) is mein kiya karte thay waisa hi mein bhi karta raha aur Allah khoob janta hai ke mein apne is tarz-e-amal mein saccha, makhlas aur haq ki pairwi karne wala hoon. Phir aap dono mere paas mujh se guftagu karne aaye aur bil-ittefaq guftagu karne lage ke dono ka maqsad ek tha. Janab-e-Abbas! Aap to is liye tashreef laye ke aap ko apne bhatije (Sallallahu Alaihi Wasallam) ki mirath ka dawa mere samne pesh karna tha. Phir Ali (Radi Allahu Anhu) se farmaya ke aap is liye tashreef laye ke aap ko apni biwi (Fatima Radi Allahu Anha) ka dawa pesh karna tha ke un ke walid (Rasul Allah Sallallahu Alaihi Wasallam) ki mirath unhein milni chahiye, mein ne aap dono hazrat se arz kar diya ke Rasul Allah (Sallallahu Alaihi Wasallam) khud farma gaye ke hum Paighambaron ka koi mirath taqseem nahi hoti, hum jo kuch chhod jate hain wo sadqa hota hai. Phir mujhko ye munasib maloom hua ke mein in jayidadon ko tumhare qabze mein de doon, to mein ne tum se kaha, dekho agar tum chaho to mein ye jayidad tumhare supard kar deta hoon, lekin is ahd aur is iqrar par ke tum is ki amdani se wo sab kaam karte rahoge jo Aap (Sallallahu Alaihi Wasallam) aur Abu Bakr Siddique (Radi Allahu Anhu) apni khilafat mein karte rahe aur jo kaam mein apni hukumat ke shuru se karta raha. Tum ne is shart ko qabool kar ke darkhwast ki ke jayidadein hum ko de do. Mein ne isi shart par de deen, hazireen kaho mein ne ye jayidadein isi shart par in ke hawale ki hain ya nahi? Unhon ne kaha, beshak isi shart par aap ne di hain. Phir Umar (Radi Allahu Anhu) ne Ali (Radi Allahu Anhu) aur Abbas (Radi Allahu Anhu) se farmaya, mein tum ko Allah ki qasam deta hoon, mein ne isi shart par ye jayidadein aap hazrat ke hawale ki hain ya nahi? Unhon ne kaha beshak. Umar (Radi Allahu Anhu) ne kaha, phir mujh se kis baat ka faisla chahte ho? (Kya jayidad ko taqseem karana chahte ho) qasam Allah ki! Jis ke hukm se zameen aur aasman qaim hain mein to is ke siwa aur koi faisla karne wala nahi. Haan! Ye aur baat hai ke agar tum se is ka intezam nahi ho sakta to phir jayidad mere supard kar do. Mein is ka bhi kaam dekh loon ga
.