Abu Bakr Siddique (Radi Allahu Anhu) ne Fatima (Radi Allahu Anha) se kaha ke Aap (Sallallahu Alaihi Wasallam) ne (apni hayat mein) farmaya tha ke hamara (giroh-e-Anbiya Alaihim-us-Salam ka) wirsa taqseem nahi hota, hamara tarka sadqa hai. Fatima (Radi Allahu Anha) ye sun kar ghussa ho gayeen aur Abu Bakr (Radi Allahu Anhu) se tark-e-mulaqat ki aur wafat tak un se na mileen. Wo Rasul Allah (Sallallahu Alaihi Wasallam) ke baad che mahine zinda rahi theen. Aisha (Radi Allahu Anha) ne kaha ke Fatima (Radi Allahu Anha) ne Aap (Sallallahu Alaihi Wasallam) ke Khaibar aur Fadak aur Madinah ke sadqe ki wirasat ka mutalba Abu Bakr Siddique (Radi Allahu Anhu) se kiya tha. Abu Bakr (Radi Allahu Anhu) ko is se inkar tha. Unhon ne kaha ke mein kisi bhi aise amal ko nahi chhod sakta jise Rasul Allah (Sallallahu Alaihi Wasallam) apni zindagi mein karte rahe thay. (Aisha Radi Allahu Anha ne kaha ke) phir Aap (Sallallahu Alaihi Wasallam) ka Madinah ka jo sadqa tha wo Umar (Radi Allahu Anhu) ne Ali aur Abbas (Radi Allahu Anhuma) ko (apne ahd-e-khilafat mein) de diya. Albatta Khaibar aur Fadak ki jayidad ko Umar (Radi Allahu Anhu) ne rok rakha aur farmaya ke ye dono Rasul Allah (Sallallahu Alaihi Wasallam) ka sadqa hain aur in huqooq ke liye jo waqti taur par pesh aate ya waqti hadisat ke liye rakhi theen. Ye jayidad is shakhs ke ikhtiyar mein raheingi jo Khalifa-e-waqt ho. Zuhri ne kaha, chunanche in dono jayidadon ka intezam aaj tak (bazariya hukumat) isi tarah hota chala aata hai
.