Imam Malik (Rahimahullah) ne farmaya ke Arabi aur Turki ghore sab barabar hain kyunke Allah ne farmaya «walkhyl walbgal walhmyr ltrkbwha» "Aur ghoron, khacharon aur gadhon ko sawari ke liye banaya aur har sawar ko ek hi ghore ka hissa diya jaye ga (go us ke paas kayi ghore hon)."
.

Hum se Qutaiba ne bayan kiya, kaha hum se Sahl Bin Yusuf ne bayan kiya, un se Shuba ne, un se Abu Ishaq ne ke ek shakhs ne Bara Bin Azib (Radi Allahu Anhu) se poocha kya Hunain ki larai mein aap log Rasul Allah (Sallallahu Alaihi Wasallam) ko chor kar chale gaye thay? Bara (Radi Allahu Anhu) ne kaha haan lekin Rasul Allah (Sallallahu Alaihi Wasallam) apni jagah par sabit qadam rahe. Hawazin ke log (jin se is larai mein muqabla tha) bare teer-andaz thay, jab hamara un se samna hua to shuru mein hum ne hamla kar ke unhein shikast de di, phir musalman maal-e-ghanimat par toot pare aur dushman ne teeron ki hum par barish shuru kar di phir Rasul Allah (Sallallahu Alaihi Wasallam) apni jagah se nahi hate. Mein ne dekha ke Aap (Sallallahu Alaihi Wasallam) apne safed khachar par sawar thay, Abu Sufyan Bin Haris Bin Abdul Muttalib (Radi Allahu Anhu) is ki lagam thame hue thay aur Aap (Sallallahu Alaihi Wasallam) ye sher farma rahe thay «ana alnby la kzb ana abn ebd almtlb» "Mein Nabi hoon is mein jhoot ka koi dakhal nahi, mein Abdul Muttalib ki aulad hoon."
.