Hum se Abdullah Bin Muhammad Musandi ne bayan kiya, kaha hum se Usman Bin Umar ne bayan kiya, unhein Yunus ne khabar di aur Laith ne bayan kiya ke mujh se Yunus ne bayan kiya, un se Ibn Shihab ne, unhein Abdullah Bin Kaab ne khabar di aur unhein Kaab Bin Malik (Radi Allahu Anhu) ne khabar di ke unhon ne Ibn Abi Hadrad (Radi Allahu Anhu) se apna qarz talab kiya, jo un ke zimma tha. Ye Rasul Allah (Sallallahu Alaihi Wasallam) ke ahd-e-mubarak ka waqia hai. Masjid ke andar un dono ki awaz itni buland ho gayi ke Rasul Allah (Sallallahu Alaihi Wasallam) ne bhi suni. Aap (Sallallahu Alaihi Wasallam) is waqt apne hujre mein tashreef rakhte thay. Chunancha Aap (Sallallahu Alaihi Wasallam) bahar aaye aur apne hujrah ka parda utha kar Kaab Bin Malik (Radi Allahu Anhu) ko awaz di. Aap (Sallallahu Alaihi Wasallam) ne pukara ae Kaab! Unhon ne kaha ya Rasul Allah, mein hazir hoon. Phir Aap (Sallallahu Alaihi Wasallam) ne apne hath ke ishaare se farmaya ke adha maaf kar de. Kaab (Radi Allahu Anhu) ne kaha ke mein ne kar diya ya Rasul Allah! Aap (Sallallahu Alaihi Wasallam) ne (Ibn Abi Hadrad Radi Allahu Anhu se) farmaya ke ab utho aur qarz ada kar do
.