Hum se Musaddad ne bayan kiya, kaha hum se Mutamir ne bayan kiya, kaha ke mein ne apne baap se suna aur un se Anas (Radi Allahu Anhu) ne bayan kiya ke Nabi Kareem (Sallallahu Alaihi Wasallam) se arz kiya gaya, agar aap Abdullah Bin Ubai (munafiq) ke yahan tashreef le chalte to behtar tha. Aap (Sallallahu Alaihi Wasallam) is ke yahan ek gadhe par sawaar ho kar tashreef le gaye. Sahaba (Rizwanullahi Alaihim) paidal Aap (Sallallahu Alaihi Wasallam) ke hamrah thay. Jidhar se Aap (Sallallahu Alaihi Wasallam) guzar rahe thay wo shor zameen thi. Jab Nabi Kareem (Sallallahu Alaihi Wasallam) is ke yahan pahunche to wo kehne laga zara aap door hi rahiye aap ke gadhe ki boo ne mera mizaj pareshan kar diya hai. Is par ek Ansari Sahabi bole ke Allah ki qasam! Rasul Allah (Sallallahu Alaihi Wasallam) ka gadha tujh se zyada khushboodar hai. Abdullah (munafiq) ki taraf se is ki qoum ka ek shaks is Sahabi ki is baat par ghussa ho gaya aur donon ne ek doosre ko bura bhala kaha. Phir donon taraf se donon ke hamayti mushtail ho gaye aur hatha-pai, chari aur joote tak naubat pahunch gayi. Hamein maloom hua hai ke ye ayat isi moqa par nazil hui thi. "Wa in ta-ifatani minal-momininaqtataloo fa-aslihoo bainahuma" "Agar Musalmanon ke do giroh aapas mein lar parein to un mein sula kara do."
.