Aur Allah Ta'ala ka farman (Surah Nisa mein) "La khaira fi kaseerim min najwahum illa man amara bisadaqatin aw ma'roofin aw islahim bainan-nas wa man yaf'al zalikaibtighaa mardatillahi fasaufa nooteehi ajran azeema" "Un ki aksar kana-phoosiyon mein khair nahi, so in (sargoshiyon) ke jo sadqa ya acchi baat ki taraf logon ko targeeb dilane ke liye hon ya logon ke darmiyan sula karayein aur jo shaks ye kaam Allah Ta'ala ki khushnoodi hasil karne ke liye kare ga to jaldi hum ise ajr-e-azeem dein ge." Aur is bab mein ye bayan hai ke Imam khud apne ashaab ke sath mukhtalif maqamat par ja kar logon mein sula karaye
.

Hum se Saeed Bin Abi Maryam ne bayan kiya, kaha hum se Abu Ghassan ne bayan kiya, kaha ke mujh se Abu Hazim Salama Bin Dinar ne bayan kiya, un se Sahl Bin Saad (Radi Allahu Anhu) ne bayan kiya ke (Qaba ke) Banu Amr Bin Auf mein aapas mein kuch takrar ho gayi thi to Rasul Allah (Sallallahu Alaihi Wasallam) apne kai ashaab ko sath le kar un ke yahan un mein sula karane ke liye gaye aur namaz ka waqt ho gaya, lekin Aap (Sallallahu Alaihi Wasallam) tashreef na la sake. Chunanchay Bilal (Radi Allahu Anhu) ne aage barh kar azan di, abhi tak chunke Aap (Sallallahu Alaihi Wasallam) tashreef nahi laye thay is liye wo (Aap Sallallahu Alaihi Wasallam hi ki hidayat ke mutabiq) Abu Bakr (Radi Allahu Anhu) ke paas aaye aur un se kaha ke Nabi Kareem (Sallallahu Alaihi Wasallam) wahein ruk gaye hain aur namaz ka waqt ho gaya hai, kya aap logon ko namaz parha dein ge? Unhon ne kaha ke han agar tum chaho. Is ke baad Bilal (Radi Allahu Anhu) ne namaz ki takbeer kahi aur Abu Bakr (Radi Allahu Anhu) aage barhe (namaz ke darmiyan) Nabi Kareem (Sallallahu Alaihi Wasallam) saffon ke darmiyan se guzarte hue pehli saff mein aa pahunche. Log baar-baar hath par hath marne lage. Magar Abu Bakr (Radi Allahu Anhu) namaz mein kisi doosri taraf mutawajja nahi hote thay (magar jab baar-baar aisa hua to) aap mutawajja hue aur maloom kiya ke Rasul Allah (Sallallahu Alaihi Wasallam) aap ke peeche hain. Aap (Sallallahu Alaihi Wasallam) ne apne hath ke ishaare se unhein hukm diya ke jis tarah wo namaz parha rahe hain, ise jari rakhein. Lekin Abu Bakr (Radi Allahu Anhu) ne apna hath utha kar Allah ki hamd bayan ki aur ulte paon peeche aa gaye aur saff mein mil gaye. Phir Nabi Kareem (Sallallahu Alaihi Wasallam) aage barhe aur namaz parhayi. Namaz se farigh ho kar Aap (Sallallahu Alaihi Wasallam) logon ki taraf mutawajja hue aur unhein hidayat ki ke logo! jab namaz mein koi baat pesh aati hai to tum hath par hath marne lagte ho. Hath par hath marna auraton ke liye hai (mardon ko) jis ki namaz mein koi baat pesh aaye to ise Subhan Allah kehna chahiye, kyunke ye lafz jo bhi sune ga wo mutawajja ho jaye ga. Ae Abu Bakr! jab mein ne ishaara bhi kar diya tha to phir aap logon ko namaz kyun nahi parhate rahe? Unhon ne arz kiya, Abu Quhafa ke bete ke liye ye baat munasib na thi ke wo Rasul Allah (Sallallahu Alaihi Wasallam) ke hote hue namaz parhaye
.