Aur Allah Ta'ala ka farman ke jab tumhare bacche ihtilam ki umar ko pahunch jayein to phir unhein (gharon mein dakhil hote waqt) ijazat leni chahiye. Mugheera (Radi Allahu Anhu) ne kaha ke mein ihtilam ki umar ko pahuncha to mein barah saal ka tha aur larkiyon ka bulough haiz se maloom hota hai. Allah Ta'ala ke is irshad ki wajah se ke "Wa iza balaghal-atfalu minkumul-huluma falyasta'zinoo" "Auratein jo haiz se mayous ho chuki hain" Allah Ta'ala ke is irshad "An yaza'na hamlahunna" tak. Hasan Bin Salih ne kaha ke mein ne apni ek parousan ko dekha ke wo akkis saal ki umar mein dadi ban chuki theen
.

Hum se Abdullah Bin Saeed ne bayan kiya, kaha ke hum se Abu Usama ne bayan kiya, kaha ke mujh se Ubaidullah ne bayan kiya, kaha ke mujh se Nafi ne bayan kiya, unhon ne kaha ke hum se Abdullah Bin Umar (Radi Allahu Anhuma) ne bayan kiya ke Uhud ki larai ke moqa par wo Rasul Allah (Sallallahu Alaihi Wasallam) ke samne (jang par jane ke liye) pesh hue to unhein ijazat nahi mili, is waqt un ki umar chaudah saal thi. Phir Ghazwa-e-Khandaq ke moqa par pesh hue to ijazat mil gayi. Is waqt un ki umar pandrah saal thi. Nafi ne bayan kiya ke jab mein Umar Bin Abdul Aziz ke yahan un ki khilafat ke zamane mein gaya to mein ne un se ye hadees bayan ki to unhon ne farmaya ke chote aur bare ke darmiyan (pandrah saal hi ki) had hai. Phir unhon ne apne hakimou ko likha ke jis bacche ki umar pandrah saal ki ho jaye (is ka fauji wazifa) Bait-ul-Mal se muqarrar kar dein
.