Ibn-e-Abbas Radhiallahu Anhuma ne farmaaya ke main ne raat Rasoolullah Sallallahu Alaihi Wasallam ke paas guzaari to (main ne dekha ke) Aap Sallallahu Alaihi Wasallam ne miswaak ki.

Hum se Abu No’maan ne bayan kiya, kaha hum se Hammad bin Zaid ne Ghailaan bin Jareer ke waaste se naql kiya, woh Abu Burdah se woh apne baap se naql karte hain ke main (ek martaba) Rasoolullah Sallallahu Alaihi Wasallam ki khidmat mein haazir huwa to main ne Aap ko apne haath se miswaak karte huwe paaya aur Aap Sallallahu Alaihi Wasallam ke munh se o o ki aawaaz nikal rahi thi aur miswaak Aap Sallallahu Alaihi Wasallam ke munh mein thi jis tarah Aap Sallallahu Alaihi Wasallam qaiy kar rahe hon.