Hum se Abul Yaman Hakam Bin Nafi ne bayan kiya, kaha ke hum ko Shuayb ne khabar di, un se Zuhri ne bayan kiya unhein Salim Bin Abdullah ne khabar di aur unhein Abdullah Bin Umar (Radi Allahu Anhuma) ne ke unhon ne Rasul Allah (Sallallahu Alaihi Wasallam) ko ye farmate suna, tum mein se har fard ek tarah ka hakim hai aur is ki raiyat ke baare mein us se sawal ho ga. Pas badshah hakim hi hai aur is ki raiyat ke baare mein us se sawal ho ga. Har insan apne ghar ka hakim hai aur us se is ki raiyat ke baare mein sawal ho ga. Aurat apne shohar ke ghar ki hakim hai aur us se is ki raiyat ke baare mein sawal ho ga. Khadim apne aaqaa ke maal ka hakim hai aur us se is ki raiyat ke baare mein sawal ho ga. Unhon ne bayan kiya ke ye sab mein ne Rasul Allah (Sallallahu Alaihi Wasallam) se suna tha. Aur mein samajhta hoon ke Nabi Kareem (Sallallahu Alaihi Wasallam) ne ye bhi farmaya tha ke mard apne walid ke maal ka hakim hai aur us se is ki raiyat ke baare mein sawal ho ga. Pas har shakhs hakim hai aur har shakhs se us ki raiyat ke baare mein sawal ho ga
.