Aur Nabi Kareem (Sallallahu Alaihi Wasallam) ne (ghalam ke) mal ko is ke aaqa ki taraf mansoob kiya hai
.

Hum se Abu Al-Yaman ne bayan kiya, unhon ne kaha hum ko Shoaib ne khabar di, un se Zuhri ne bayan kiya ke mujhe Salim Bin Abdullah Bin Umar ne khabar di aur unhein Abdullah Bin Umar (Radi Allahu Anhuma) ne ke unhon ne Rasul Allah (Sallallahu Alaihi Wasallam) se suna, Aap (Sallallahu Alaihi Wasallam) ne farmaya "Har aadmi hakim hai aur is se is ki ra-aya ke bare mein sawal ho ga. Imam hakim hai aur is se is ki ra-iyat ke bare mein sawal ho ga. Mard apne ghar ke mamlat ka afsar hai aur is se is ki ra-aya ke bare mein sawal ho ga. Aurat apne shohar ke ghar ki afsar hai aur is se is ki ra-aya ke bare mein sawal ho ga. Khadim apne aaqa (sayyid) ke mal ka muhafiz hai aur is se is ke bare mein sawal ho ga." Unhon ne bayan kiya ke mein ne Nabi Kareem (Sallallahu Alaihi Wasallam) se ye batein suni hain aur mujhe khayal hai ke Aap (Sallallahu Alaihi Wasallam) ne ye bhi farmaya tha ke mard apne baap ke mal ka muhafiz hai aur is se is ki ra-iyat ke bare mein sawal ho ga. Gharz tum mein se har fard hakim hai aur sab se is ki ra-iyat ke bare mein sawal ho ga
.