Aur Abdullah bin Umar Radhiallahu Anhuma jab Namaz padhte waqt kapde mein khoon laga huwa dekhte to us ko utaar daalte aur Namaz padhte rehte, Ibn-e-Musaiyab aur Sha’bi kehte hain ke jab koi shakhs Namaz padhe aur us ke kapde par najasat ya janabat lagi ho, ya (bhool kar) qible ke alawah kisi aur taraf Namaz padhi ho ya Tayammum kar ke Namaz padhi ho, phir Namaz hi ke waqt mein paani mil gaya ho to (ab) Namaz na dohraaye.

Hum se Abdan ne bayan kiya, kaha mujhe mere baap (Uthman) ne Sho’bah se khabar di, unhon ne Abu Ishaaq se, unhon ne ’Amr bin Maimoon se, unhon ne Abdullah se woh kehte hain ke ek dafa Rasoolullah Sallallahu Alaihi Wasallam Ka’ba shareef mein sajde mein the. (Ek doosri sanad se) hum se Ahmad bin Uthman ne bayan kiya, kaha hum se Shuraih bin Maslamah ne, kaha hum se Ibrahim bin Yousuf ne apne baap ke waaste se bayan kiya, woh Abu Ishaaq se riwayat karte hain. Un se ’Amr bin Maimoon ne bayan kiya ke Abdullah bin Mas’ood Radhiallahu Anhuma ne un se Hadees bayan ki ke ek dafa Rasoolullah Sallallahu Alaihi Wasallam Ka’ba ke nazdeek Namaz padh rahe the aur Abu Jahl aur us ke saathi (bhi wahien) baithe huwe the to un main se ek ne doosre se kaha ke tum mein se koi shakhs hai jo qabeele ki (jo) oontni zabah hue hai (us ki) ojhdi utha laaye aur (laa kar) jab Muhammed Sallallahu Alaihi Wasallam sajde main jaayen to un ki peeth par rakh de. Yeh sun kar un mein se ek sab se ziyada badbakht (aadmi) utha aur woh ojhdi le kar aaya aur dekhta raha jab Aap ne sajdah kiya to us ne us ojhdi ko Aap ke dono kandhon ke darmiyaan rakh diya (Abdullah bin Mas’ood kehte hain) main yeh (sab kuch) dekh raha tha magar kuch na kar sakta tha. Kaash! (Us waqt) mujhe rokne ki taaqat hoti. Abdullah kehte hain ke woh hansne lage aur (hansi ke maare) lot-pot hone lage aur Rasoolullah Sallallahu Alaihi Wasallam sajde mein the (boojh ki wajah se) apna sar nahi utha sakte the. Yahan tak ke Fatima Radhiallahu Anha aayein aur woh boojh Aap ki peeth se utaar kar phenka, tab Aap Sallallahu Alaihi Wasallam ne sar uthaaya phir teen baar farmaaya. Ya Allah! Tu Quraish ko pakad le, yeh (baat) un kaafiron par bahut bhaari hue ke Aap Sallallahu Alaihi Wasallam ne unhein bad-dua di. Abdullah kehte hain ke woh samjhte the ke us shahar (Makkah) mein jo dua ki jaaye woh zaroor qabool hoti hai phir Aap ne (un mein se) har ek ka (juda juda) naam liya ke aye Allah! In zaalimon ko zaroor halaak kar de. Abu Jahl, ’Utbah bin Rabee’ah, Shaibah bin Rabee’ah, Waleed bin ’Utbah, Umaiyah bin Khalaf aur ’Uqbah bin Abi Mu’ait ko. Saatwen (aadmi) ka naam (bhi) liya magar mujhe yaad nahi raha. Us zaat ki qasam jis ke qabze mein meri jaan hai ke jin logon ke (bad-dua karte waqt) Aap Sallallahu Alaihi Wasallam ne naam liye the, main ne un ki (laashon) ko Badr ke kunwen mein pada huwa dekha.