Zohri ne kaha ke jab tak paani ki bu, zaaiqa aur rang na badle, us mein kuch harj nahi aur Hammad kehte hain ke (paani mein) murdaar parindon ke par (pad jaane) se kuch harj nahi hota. Murdon ki jaise haathi waghera ki haddiyan is ke baare mein Zohri kehte hain ke main ne pehle logon ko ulama-e-Salaf mein se un ki kanghiyan karte aur un (ke bartanon) mein tail rakhte huwe dekha hai, woh us mein kuch harj nahi samjhte the. Ibn-e-Sireen aur Ibrahim kehte hain ke haathi ke daant ki tijaarat mein kuch harj nahi.

Hum se Ismail ne bayan kiya, unhon ne kaha mujh ko Malik ne Ibn-e-Shihaab ke waaste se riwayat ki, woh Ubaidullah bin Abdullah bin ’Utbah bin Mas’ood se, woh Abdullah bin Abbas Radhiallahu Anhuma se woh Umm-ul-Mo’mineen Maimunah Radhiallahu Anha se riwayat karte hain ke Rasoolullah Sallallahu Alaihi Wasallam se chuhe ke baare mein poocha gaya jo ghee mein gir gaya tha. Farmaaya us ko nikaal do aur us ke aas paas (ke ghee) ko nikaal phenko aur apna (baaqi) ghee iste’maal karo.