Aur Ibn Sirin aur Ata aur Ibrahim aur Hasan Basri (Rahimahumullah) dallali par ujrat lene mein koi burayi nahi khayal karte thay. Ibn Abbas (Radi Allahu Anhuma) ne farmaya, agar kisi se kaha jaye ke ye kapra itni qeemat mein bech la. Jitna ziyada ho wo tumhara hai, to is mein koi haraj nahi hai. Ibn Sirin ne farmaya ke agar kisi ne kaha ke itne in bech la, jitna nafa hoga wo tumhara hai ya (ye kaha ke) mere aur tumhare darmiyan taqseem ho jaye ga. To is mein koi haraj nahi. Nabi Kareem (Sallallahu Alaihi Wasallam) ne farmaya ke Musalman apni taye-karda sharait par qayam rahenge
.

Hum se Musaddad ne bayan kiya, kaha ke hum se Abdul Wahid Bin Ziyad ne bayan kiya, un se Maamar ne bayan kiya, un se Ibn Tawus ne, un se un ke baap ne, aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne (tijarati) qafilon se (mandi se aage ja kar) mulaqat karne se mana farmaya tha. Aur ye ke shehri dehati ka maal na bechein, mein ne poocha, ay Ibn Abbas (Radi Allahu Anhuma)! ”Shehri dehati ka maal na bechein“ ka kya matlab hai ? Unhon ne farmaya ke murad ye hai ke un ke dallal na banein
.