Aur jo shakhs khairat kare ke khud muhtaj ho jaye ya us ke baal bacche muhtaj hon (to aisi khairat durust nahi) isi tarah agar qarzdar ho to sadqa aur aazadi aur hiba par qarz ada karna muqaddam ho ga aur us ka sadqa us par pher diya jaye ga aur us ko yeh durust nahi ke (qarz na ada kare aur khairat de kar) logon (qarz khwahon) ki raqam tabah kar de aur Nabi Karim salla Allahu alaihi wasallam ne farmaya ke jo shakhs logon ka maal (bataur qarz) talaf karne (yani na dene) ki niyat se le to Allah us ko barbad kar de ga . Albatta agar sabr aur takleef uthane mein mash'hoor ho to apni khaas haajat par (faqeer ki haajat ko) muqaddam kar sakta hai . Jaise Abu Bakr Siddiq razi Allahu anhu ne apna saara maal khairat mein de diya aur isi tarah Ansar ne apni zaroorat par Muhajireen ki zarooriyat ko muqaddam kiya . Aur Nabi Karim salla Allahu alaihi wasallam ne maal ko tabah karne se mana farmaya hai to jab apna maal tabah karna mana hua to paraye logon ka maal tabah karna kisi tarah se jaiz na ho ga . Aur Kaab bin Malik ne (jo jang-e-Tabook se peeche reh gaye thay) arz ki Ya Rasool Allah! Main apni tauba ko is tarah poora karta hoon ke apna saara maal Allah aur Rasool par tasadduq kar doon . Aap salla Allahu alaihi wasallam ne farmaya ke nahi kuch thora maal rehne bhi de woh tere haq mein behtar hai . Kaab ne kaha bahut khoob main apna Khaibar ka hissa rehne deta hoon .

Hum se Abdan ne byaan kiya ‘ kaha ke humein Abdullah bin Mubarak ne khabar di ‘ unhein Yunus ne , unhein Zuhri ne , unhon ne kaha mujhe Saeed bin Musayyab ne khabar di ‘ unhon ne Abu Hurairah razi Allahu anhu se suna ke Nabi Karim salla Allahu alaihi wasallam ne farmaya behtareen khairat woh hai jis ke dene ke baad aadmi maaldar rahe . Phir sadqa pehle unhein do jo tumhari zair-e-parwarish hain .