Ibn Umar razi Allahu anhuma ne Nabi Karim salla Allahu alaihi wasallam se naqal kiya ke (Aap salla Allahu alaihi wasallam ne farmaya) aankh aansu bahati hain aur dil gham se nidhaal hai .

Hum se Hasan bin Abdul Aziz ne byaan kiya ‘ unhon ne kaha ke hum se Yahya bin Hassan ne byaan kiya , unhon ne kaha ke hum se Quraysh ne jo Hayyan ke bete hain , ne byaan kiya , un se Thabit ne aur un se Anas bin Malik razi Allahu anhu ne byaan ki ke hum Rasool Allah salla Allahu alaihi wasallam ke saath Abu Sayf lohaar ke yahan gaye . Yeh Ibrahim (Rasool Allah salla Allahu alaihi wasallam ke saahibzade razi Allahu anhu) ko doodh pehlane wali ana ke khawand thay . Nabi Karim salla Allahu alaihi wasallam ne Ibrahim razi Allahu anhu ko god mein liya aur pyar kiya aur soongha . Phir is ke baad hum un ke yahan phir gaye . Dekha ke is waqt Ibrahim razi Allahu anhu dam tor rahe hain . Rasool Allah salla Allahu alaihi wasallam ki aankhein aansuon se bhar aayin . To Abdur Rahman bin Awf razi Allahu anhu bol pare ke ya Rasool Allah! aur Aap bhi logon ki tarah be-sabri karne lage ? Nabi Karim salla Allahu alaihi wasallam ne farmaya ‘ Ibn Awf! yeh be-sabri nahin yeh to rahmat hai . Phir Aap salla Allahu alaihi wasallam dobara roye aur farmaya . Aankhon se aansu jaari hain aur dil gham se nidhaal hai par zaban se hum kahein ge wahi jo hamare Parvardigar ko pasand hai aur ae Ibrahim! hum tumhari judayi se ghamgeen hain . Isi hadees ko Musa bin Ismail ne Sulayman bin Mughira se ‘ un se Thabit ne aur un se Anas razi Allahu anhu ne Nabi Karim salla Allahu alaihi wasallam se riwayat kiya hai .