Mujahid kehte hain ke mutakabbir aur sharmaane waala aadmi ilm haasil nahi kar sakta. Umm-ul-Mo’mineen Aisha Radhiallahu Anha ka irshaad hai ke Ansaar ki aurtein achchi aurtein hain ke sharm unhein deen mein samajh paida karne se nahi rokti.

Hum se Muhammed bin Salaam ne bayan kiya, kaha hum se Abu Mu’aawiyah ne khabar di, un se Hishaam ne apne baap ke waaste se bayan kiya, unhon ne Zainab bint-e-Umm-e-Salamah ke waaste se naql kiya, woh (apni waalidah) Umm-ul-Mo’mineen Umm-e-Salamah Radhiallahu Anha se riwayat karti hain ke Umm-e-Sulaim (naami ek aurat) Rasoolullah Sallallahu Alaihi Wasallam ki khidmat-e-aqdas mein haazir huen aur arz kiya ke ya Rasoolallah! Allah Ta’ala haq baat bayan karne se nahi sharmaata (is liye main poochti hun ke) kya ehtelaam se aurat par bhi ghusl zaroori hai? Aap Sallallahu Alaihi Wasallam ne farmaaya ke (haan) jab aurat paani dekh le. (Yani kapde waghera par mani ka asar ma’loom ho) to (yeh sun kar) Umm-e-Salamah Radhiallahu Anha ne (sharm ki wajah se) apna chehra chupa liya aur kaha, ya Rasoolallah! Kya aurat ko bhi ehtelaam hota hai? Aap Sallallahu Alaihi Wasallam ne farmaaya, Haan! Tere haath khaak aalood hun, phir kiun us ka bachcha us ki soorat ke mushabeh hota hai (yani yahi us ke ehtelaam ka suboot hai).