Hum se Yahya bin Sulayman ne byaan kiya , kaha ke mujh se Abdullah bin Wahb ne byaan kiya , kaha ke mujhe Amr bin Harith ne khabar di , unhein Bukayr ne , unhein Kurayb ne ke Ibn Abbas , Miswar bin Makhramah aur Abdur Rahman bin Azhar razi Allahu anhum ne unhein Aisha razi Allahu anha ki khidmat mein bheja aur kaha Aisha razi Allahu anha se hum sab ka salam kehna aur is ke baad Asar ke baad ki do rakaton ke baare mein daryaft karna . Unhein yeh bhi bata dena ke humein khabar hui hai ke Aap yeh do rakatain parhti hain . Halanke humein Nabi Karim salla Allahu alaihi wasallam se yeh hadees pahunchi hai ke Nabi Karim salla Allahu alaihi wasallam ne in do rakaton se mana kiya hai aur Ibn Abbas razi Allahu anhuma ne kaha ke main ne Umar bin Khattab razi Allahu anhu ke saath in rakaton ke parhne par logon ko mara bhi tha . Kurayb ne byaan kiya ke main Aisha razi Allahu anha ki khidmat mein hazir hua aur paigham pahunchaya . Is ka jawab Aap ne yeh diya ke Umm Salamah razi Allahu anha se is ke mutaliq daryaft kar . Chunanche main in hazrat ki khidmat mein wapas hua aur Aisha razi Allahu anha ki guftagu naqal kar di , unhon ne mujhe Umm Salamah razi Allahu anha ki khidmat mein bheja unhein paighamat ke saath jin ke saath Aisha razi Allahu anha ke yahan bheja tha . Umm Salamah razi Allahu anha ne yeh jawab diya ke main ne Nabi Karim salla Allahu alaihi wasallam se suna hai ke Aap salla Allahu alaihi wasallam Asar ke baad namaaz parhne se rokte thay lekin ek din main ne dekha ke Asar ke baad Aap salla Allahu alaihi wasallam khud yeh do rakatain parh rahe hain . Is ke baad Aap salla Allahu alaihi wasallam mere ghar tashreef laaye . Mere paas Ansar ke qabeela Banu Haram ki chand auratein baithi hui thin . Is liye main ne ek baandi ko Aap salla Allahu alaihi wasallam ki khidmat mein bheja . Main ne us se keh diya tha ke woh Aap salla Allahu alaihi wasallam ke baazu mein ho kar yeh pooche ke Umm Salamah kehti hain ke ya Rasool Allah! Aap to in do rakaton se mana kiya karte thay halanke main dekh rahi hoon ke Aap salla Allahu alaihi wasallam khud unhein parhte hain . Agar Nabi Karim salla Allahu alaihi wasallam haath se ishaara karein to tum peeche hat jana . Baandi ne phir isi tarah kiya aur Aap salla Allahu alaihi wasallam ne haath se ishaara kiya to peeche hat gayi . Phir jab Aap salla Allahu alaihi wasallam farigh huay to (Aap ne Umm Salamah razi Allahu anha se) farmaya ke ae Abu Umayyah ki beti! tum ne Asar ke baad ki do rakaton ke mutaliq poocha , baat yeh hai ke mere paas Abdul Qays ke kuch log aa gaye thay aur un ke saath baat karne mein main Zohar ke baad ki do rakatain nahin parh saka tha so yeh wahi do rakat hain .