Abdul Aziz bin Abdullah ne hum se bayan kiya, un se Malik ne Ibn-e-Shihaab ke waaste se naql kiya, unhon ne A’raj se, unhon ne Abu Hurairah Radhiallahu Anhu se, woh kehte hain ke log kehte hain ke Abu Hurairah Radhiallahu Anhu bahut hadeesein bayan karte hain aur (main kehta hun) ke Quran mein do aayatein na hotien to main koi Hadees bayan na karta. Phir yeh Aayat padhi, (jis ka tarjumah yeh hai) ke jo log Allah ki naazil ki hue daleelon aur aayaton ko chupaate hain (aakhir Aayat) «رّحِيم» tak. (Waqiya yeh hai ke) hamaare muhaajireen bhai to bazaar ki khareed-o-farokht mein lage rehte the aur ansaar bhai apni jaaidadon mein mashghool rehte aur Abu Hurairah, Rasoolullah Sallallahu Alaihi Wasallam ke saath ji bhar kar rehta (taake Aap ki rafaaqat mein shikam puri se bhi befikri rahe) aur (un majlison mein) haazir rehta jin (majlison) mein doosre haazir na hote aur woh (baatein) mehfooz rakhta jo doosre mehfooz nahi rakh sakte the.