Hum se Muaz bin Fazala ne bayan kiya , unhon ne kaha ke hum se Hisham Dastawai ne Yahya bin Abi Kathir se bayan kiya , woh Qalaba se naql karte hain ke Abul Malih Aamir bin Usama Hudhali ne un se bayan kiya , unhon ne kaha ke hum abr ke din ek martaba Buraida bin Haseeb raziyallahu anhu sahaba ke sath thay , unhon ne farmaya ke namaz sawere yani jaldi , sawere ka ek matlab jaldi bhi hai parha karo . Kyunke Nabi Karim salla Allahu alaihi wa sallam ne farmaya ke jis ne asr ki namaz chhori is ka amal akarat ho gaya .

Hum se Imran bin Maisara ne riwayat kiya , kaha hum se Muhammad bin Fudail ne bayan kiya , kaha ke hum se Husain bin Abdur Rahman ne Abdullah bin Abi Qatada se , unhon ne apne walid se , kaha hum Khaibar se lot kar Nabi Karim salla Allahu alaihi wa sallam ke sath raat mein safar kar rahe thay . Kisi ne kaha ke ya Rasool Allah! aap ab padao daal dete to behtar hota . Aap salla Allahu alaihi wa sallam ne farmaya ke mujhe dar hai ke kahin namaz ke waqt bhi tum sote na reh jao . Is par Bilal raziyallahu anhu bole ke mein aap sab logon ko jaga dunga . Chunanched sab log let gaye . Aur Bilal raziyallahu anhu ne bhi apni peeth kajawa se laga li . Aur un ki bhi aankh lag gayi aur jab Nabi Karim salla Allahu alaihi wa sallam bedar hue to sooraj ke upar ka hissa nikal chuka tha . Aap salla Allahu alaihi wa sallam ne farmaya Bilal! tu ne kya kaha tha . Woh bole aaj jaisi neend mujhe kabhi nahi aayi . Phir Rasool Allah salla Allahu alaihi wa sallam ne farmaya ke Allah Taala tumhari arwah ko jab chahta hai qabz kar leta hai aur jis waqt chahta hai wapas kar deta hai . Aye Bilal! uth aur azan de . Phir aap salla Allahu alaihi wa sallam ne wudu kiya aur jab sooraj buland ho kar roshan ho gaya to aap salla Allahu alaihi wa sallam khare hue aur namaz parhayi .

Hum se Muaz bin Fazala ne hadees naql ki , unhon ne kaha hum se Hisham Dastawai ne bayan kiya , unhon ne Yahya bin Abi Kathir se riwayat kiya , unhon ne Abu Salama bin Abdur Rahman se , unhon ne Jabir bin Abdullah raziyallahu anhuma se ke Umar bin Khattab raziyallahu anhu ghazwa Khandaq ke moqa par ek martaba sooraj ghuroob hone ke baad aaye aur woh kuffar Quraish ko bura bhala keh rahe thay . Aur aap ne kaha ke aye Allah ke Rasool! sooraj ghuroob ho gaya , aur namaz asr parhna mere liye mumkin na ho saka . Is par Rasool Allah salla Allahu alaihi wa sallam ne farmaya ke namaz mein ne bhi nahi parhi . Phir hum wadi Bathan mein gaye aur aap salla Allahu alaihi wa sallam ne wahan namaz ke liye wudu kiya , hum ne bhi wudu banaya . Is waqt sooraj doob chuka tha . Pehle aap salla Allahu alaihi wa sallam ne asr parhayi is ke baad maghrib ki namaz parhi .

Aur Ibrahim Nakhai ne kaha jo shakhs bees saal tak ek namaz chhor de to faqat wahi ek namaz parh lay .

Hum se Abu Naeem Fazl bin Dukain aur Moosa bin Ismail ne bayan kiya , un dono ne kaha ke hum se Hammam bin Yahya ne Qatada se bayan kiya , unhon ne Anas bin Malik raziyallahu anhu se , unhon ne Nabi Karim salla Allahu alaihi wa sallam se ke aap salla Allahu alaihi wa sallam ne farmaya agar koi namaz parhna bhool jaye to jab bhi yaad aaye is ko parh lay . Is qaza ke siwa aur koi kaffara is ki wajah se nahi hota . Aur Allah Taala ne farmaya ke namaz mere yaad aane par qaim kar . Moosa ne kaha ke hum se Hammam ne hadees bayan ki ke mein ne Qatada raziyallahu anhu se suna woh yun parhte thay namaz parh meri yaad ke liye . Hiban bin Hilal ne kaha , hum se Hammam ne bayan kiya , kaha hum se Qatada ne , kaha hum se Anas raziyallahu anhu ne , unhon ne Nabi Karim salla Allahu alaihi wa sallam se , phir aisi hi hadees bayan ki .

Hum se Musaddad ne bayan kiya , kaha ke hum se Yahya bin Saeed Qattan ne , kaha ke hum se Hisham Dastawai ne hadees bayan ki , kaha ke hum se Yahya ne jo Abi Kathir ke bete hain hadees bayan ki Abu Salama se , unhon ne Jabir raziyallahu anhu se , unhon ne farmaya ke Umar raziyallahu anhu ghazwa Khandaq ke moqa par ek din kuffar ko bura bhala kehne lage . Farmaya ke sooraj ghuroob ho gaya , lekin mein larai ki wajah se namaz asr na parh saka . Jabir raziyallahu anhu ne bayan kiya ke phir hum wadi Bathan ki taraf gaye . Aur aap salla Allahu alaihi wa sallam ne asr ki namaz ghuroob shams ke baad parhi is ke baad maghrib parhi .

Samar ka lafz jo Quran mein hai samr hi se nikla hai . Is ki jama samar hai aur lafz samar is ayat mein jama ke mani mein hai . Samr asal mein chand ki roshni ko kehte hain , ahl e Arab chandni raaton mein gup shup kiya karte thay .

Hum se Musaddad bin Musarhad ne bayan kiya , kaha hum se Yahya bin Saeed Qattan ne , kaha hum se Awf Aarabi ne , kaha ke hum se Abul Minhal Siyar bin Salama ne , unhon ne kaha ke mein apne walid Salama ke sath Abu Barza Aslami raziyallahu anhu ki khidmat mein hazir hua . Un se mere walid sahib ne poocha ke Rasool Allah salla Allahu alaihi wa sallam farz namazen kis tarah yani kin kin auqat mein parhte thay . Hum se is ke baray mein bayan farmaye . Unhon ne farmaya ke aap salla Allahu alaihi wa sallam hejeer zuhr jisay tum salat awla kehte ho sooraj dhulte hi parhte thay . Aur aap salla Allahu alaihi wa sallam ke asr parhne ke baad koi bhi shakhs apne ghar wapas hota aur woh bhi Madina ke sab se aakhri kinare par to sooraj abhi saaf aur roshan hota . Maghrib ke baray mein aap ne jo kuch bataya mujhe yaad nahi raha . Aur farmaya ke isha mein aap salla Allahu alaihi wa sallam takheer pasand farmate thay . Is se pehle sone ko aur is ke baad baat karne ko pasand nahi karte thay . Subah ki namaz se jab aap salla Allahu alaihi wa sallam farigh hote to hum apne qareeb baithe hue doosre shakhs ko pehchan lete . Aap salla Allahu alaihi wa sallam fajr mein saath se sau tak ayaten parhte thay .

Hum se Abdullah bin Sabah ne bayan kiya , kaha hum se Abu Ali Ubaidullah Hanafi ne , kaha hum se Qurra bin Khalid Sadoosi ne , unhon ne kaha ke ek din Hassan Basri rahimahullah ne bari der ki . Aur hum aap ka intizar karte rahe . Jab un ke uthne ka waqt qareeb ho gaya to aap aaye aur butor mazrat farmaya ke mere un parosion ne mujhe bula liya tha is liye der ho gayi phir batlaya ke Anas bin Malik raziyallahu anhu ne kaha tha ke hum ek raat Nabi Karim salla Allahu alaihi wa sallam ka intizar karte rahe . Taqreeban aadhi raat ho gayi to aap salla Allahu alaihi wa sallam tashreef laye , phir humein namaz parhayi . Is ke baad khutba diya . Pas aap ne farmaya ke doosron ne namaz parh li aur so gaye . Lekin tum log jab tak namaz ke intizar mein rahe ho goya namaz hi ki halat mein rahe ho . Imam Hassan Basri rahimahullah ne farmaya ke agar log kisi khair ke intizar mein baithe rahen to woh bhi khair ki halat hi mein hain . Qurra bin Khalid ne kaha ke Hassan ka yeh qaul bhi Anas raziyallahu anhu ki hadees ka hai jo unhon ne Nabi Karim salla Allahu alaihi wa sallam se riwayat ki hai .

Hum se Abul Yaman Hukm bin Nafi ne bayan kiya unhon ne kaha ke humein Shoaib bin Abi Hamza ne Zuhri se khabar di , kaha ke mujh se Salim bin Abdullah bin Umar raziyallahu anhuma aur Abu Bakr bin Abi Hathma ne hadees bayan ki ke Abdullah bin Umar raziyallahu anhuma ne farmaya ke Nabi Karim salla Allahu alaihi wa sallam ne isha ki namaz parhi apni zindagi ke aakhri zamane mein . Salam pherne ke baad aap khare hue aur farmaya ke is raat ke mutalliq tumhein kuch maloom hai ? Aaj is roye zameen par jitne insaan zinda hain . Sau saal baad un mein se koi bhi baqi nahi rahe ga . Logon ne Nabi Karim salla Allahu alaihi wa sallam ka kalam samajhne mein ghalti ki aur mukhtalif batein karne lage . Abu Masood raziyallahu anhu ne yeh samjha ke sau baras baad qiyamat aaye gi halanke aap salla Allahu alaihi wa sallam ka maqsad sirf yeh tha ke jo log aaj is guftugu ke waqt zameen par baste hain . Un mein se koi bhi aaj se ek sadi baad baqi nahi rahe ga . Aap salla Allahu alaihi wa sallam ka matlab yeh tha ke sau baras mein yeh qarn guzar jaye ga .