Hum se Muhammad bin Alaa ne bayan kiya, kaha hum se Abu Usamah ne bayan kiya, in se Burayd bin Abdullah ne, in se Burdah ne aur in se Abu Musa razi Allahu anhu ne ke Nabi kareem salla Allahu alaihi wasallam ne farmaya ke naik aur bure dost ki misal mushk saath rakhne wale aur bhatti dhaunkne wale ki si hai (jis ke paas mushk hai aur tum is ki mohabbat mein ho) woh is mein se ya tumhein kuch tuhfa ke taur par de ga ya tum is se khareed sako ge ya (kam az kam) tum is ki umdah khushboo se to mahzooz ho hi sako ge aur bhatti dhaunkne wala ya tumhare kapre (bhatti ki aag se) jala de ga ya tumhein is ke paas se ek nagowar bad-boodar dhuwan pahunche ga.

Hum se Abu al-Waleed ne bayan kiya, kaha hum se Shubah ne bayan kiya, in se Hisham bin Zayd ne aur in se Anas razi Allahu anhu ne bayan kiya ke hum ne ek khargosh ka peecha kiya. Hum Mar-uz-Zahran mein thay. Log is ke peeche dore aur thak gaye phir main ne usay pakar liya aur usay Abu Talha razi Allahu anhu ke paas laya. Unhon ne usay zibah kiya aur is ke donon kolhe ya (rawi ne bayan kiya ke) is ki donon raanein Nabi kareem salla Allahu alaihi wasallam ke paas bheijiein aur Nabi kareem salla Allahu alaihi wasallam ne unhein qabool farmaya.

Hum se Musa bin Ismail ne bayan kiya, unhon ne kaha hum se Abdul Aziz bin Muslim ne bayan kiya, in se Abdullah bin Dinar ne bayan kiya, unhon ne kaha ke main ne Abdullah bin Umar razi Allahu anhuma se suna ke Nabi kareem salla Allahu alaihi wasallam ne farmaya ke saahina main khud nahi khata lekin usay haram bhi nahi qarar deta.

Hum se Abdullah bin Maslamah ne bayan kiya, in se Imam Malik ne, in se Ibn Shihab ne, in se Abu Umama bin Sahl ne, in se Abdullah bin Abbas razi Allahu anhuma ne bayan kiya aur in se Khalid bin Waleed razi Allahu anhu ne bayan kiya ke woh Nabi kareem salla Allahu alaihi wasallam ke saath Umm al-Momineen Maymoonah razi Allahu anha ke ghar gaye to Nabi kareem salla Allahu alaihi wasallam ki khidmat mein bhuna hua saahina laya gaya Aap ne is ki taraf hath barhaya lekin baaz auraton ne kaha ke Aap jo khana dekh rahe hain is ke mutalliq Nabi kareem salla Allahu alaihi wasallam ko bata do, auraton ne kaha ke yeh saahina hai ya Rasool اللہ! Chunanche Nabi kareem salla Allahu alaihi wasallam ne apna hath khainch liya. Main ne arz kiya: ya Rasool اللہ! kiya yeh haram hai? Nabi kareem salla Allahu alaihi wasallam ne farmaya ke nahi lekin kyunke yeh hamare mulk mein nahi paya jata is liye tabiyat is se inkar karti hai. Khalid razi Allahu anhu ne bayan kiya ke phir main ne usay apni taraf khainch liya aur khaya aur Nabi kareem salla Allahu alaihi wasallam dekh rahe thay.

Hum se Humaydi ne bayan kiya, kaha hum se Sufyan ne bayan kiya, in se Zuhri ne bayan kiya, kaha ke mujhe Ubaidullah bin Abdullah bin Utbah ne khabar di, unhon ne Ibn Abbas razi Allahu anhuma se suna, in se Maymoonah razi Allahu anha ne bayan kiya ke ek chooha ghee mein parh kar mar gaya to Nabi kareem salla Allahu alaihi wasallam se is ka hukm poochha gaya. Aap salla Allahu alaihi wasallam ne farmaya ke choohe ko aur is ke charon taraf se ghee ko phenk do aur baqi ghee ko khao. Sufyan se kaha gaya ke Mamar is hadees ko Zuhri se bayan karte hain ke in se Saeed bin al-Musayyab aur in se Abu Hurairah razi Allahu anhu ne bayan kiya, unhon ne kaha ke main ne yeh hadees Zuhri se sirf Ubaidullah se bayan karte suni hai ke in se Ibn Abbas razi Allahu anhuma ne, in se Maymoonah razi Allahu anha ne aur in se Nabi kareem salla Allahu alaihi wasallam ne farmaya aur main ne yeh hadees in se baar-ha suni hai.

Hum se Abdan ne bayan kiya, kaha hum ko Abdullah ne khabar di, unhein Yunus ne, unhein Muhammad bin Abdullah bin Shihab Zuhri ne ke agar koi janwar chooha ya koi aur jame huay ya ghair-jame huay ghee ya tail mein parh jaye to is ke mutalliq kaha ke hamain yeh hadees pahunchi hai ke Rasool Allahsalla Allahu alaihi wasallam ne choohe ke mutalliq jo ghee mein mar gaya thu, hukm diya ke usay aur is ke charon taraf se ghee nikaal kar phenk diya jaye aur phir baqi ghee khaya gaya. Hamain yeh hadees Ubaidullah bin Abdullah ki sanad se pahunchi hai.

Hum se Abdul Aziz bin Abdullah ne bayan kiya, kaha hum se Imam Malik ne bayan kiya, in se Ibn Shihab ne, in se Abdullah bin Abdullah ne, in se Abdullah bin Abbas razi Allahu anhuma ne aur in se Maymoonah razi Allahu anha ne bayan kiya ke Nabi kareem salla Allahu alaihi wasallam se is choohe ka hukm poochha gaya jo ghee mein gir gaya ho. Nabi kareem salla Allahu alaihi wasallam ne farmaya ke choohe ko aur is ke charon taraf se ghee ko phenk do phir baqi ghee kha lo.

Hum se Ubaidullah bin Musa ne bayan kiya, in se Hanzalah ne, in se Salim ne, in se Ibn Umar razi Allahu anhuma ne ke woh chehre par nishan lagaane ko napasand karte thay aur Ibn Umar razi Allahu anhuma ne bayan kiya ke Nabi kareem salla Allahu alaihi wasallam ne chehre par maarne se mana kiya hai. Ubaidullah bin Musa ke saath is hadees ko Qutaybah bin Saeed ne bhi riwayat kiya, kaha hum ko Amr bin Muhammad Anqazi ne khabar di, unhon ne Hanzalah se.

Hum se Abu al-Waleed ne bayan kiya, kaha hum se Shubah ne bayan kiya, in se Hisham bin Zayd ne in se Anas razi Allahu anhu ne bayan kiya ke Nabi kareem salla Allahu alaihi wasallam ki khidmat mein apne bhai (Abdullah bin Abi Talha nau-moulud) ko laya taake Aap is ki tahneek farma dein. Nabi kareem salla Allahu alaihi wasallam is waqt oonton ke baare mein tashreef rakhte thay. Main ne dekha ke Aap ek bakri ko daagh rahe thay (Shubah ne kaha ke) main samajhta hoon ke (Hisham ne) kaha ke is ke kaanon ko daagh rahe thay.

Aur in mein se kuch log apne doosre sathiyon ki ijazat ke baghair (taqseem se pehle) ghaneemat ki bakri ya oont mein se kuch zibah kar lein to aisa gosht khana halal nahi hai ba-wajah Rafi bin Khadeej razi Allahu anhu ki hadees ke jo unhon ne Nabi kareem salla Allahu alaihi wasallam se naqal ki hai. Taoos aur Ikrimah ne chor ke zabiha ke mutalliq kaha ke usay phenk do (maloom hua ke woh khana haram hai).