Hum se Humaidi ne bayan kiya ‘ hum se Sufyan Bin Uyainah ne bayan kiya ‘ un se Amr Bin Dinar ne bayan kiya ‘ un se Ata ne ‘ aur un se Ibn Abbas Radi Allahu Anhuma ne ‘ Quran Majeed ki ayat «Allazeena baddalu ni'matallahi kufran» (Surah Ibrahim 28) ke bare mein aap ne farmaya Allah ki qasam! Ye kuffar-e-Quraish thay. Amr ne kaha ke is se murad Quraish thay aur Rasul Allah Sallallahu Alaihi Wasallam Allah ki ni'mat thay. Kuffar-e-Quraish ne apni qaum ko jang-e-Badr ke din «Daar-al-Bawaar» yani dozakh mein jhonk diya
.

Hum se Ubaid Bin Ismail ne bayan kiya ‘ hum se Abu Usama ne bayan kiya ‘ un se Hisham ne ‘ un se un ke walid ne bayan kiya ke Aisha Radi Allahu Anha ke samne kisi ne is ka zikr kiya ke Ibn Umar Radi Allahu Anhuma Nabi Kareem Sallallahu Alaihi Wasallam ke hawala se bayan karte hain ke mayyat ko qabr mein is ke ghar walon ke, is par rone se bhi azab hota hai. Is par Aisha Radi Allahu Anha ne kaha ke Aap Sallallahu Alaihi Wasallam ne to ye farmaya tha ke azab mayyat par is ki bad-amaliyon aur gunahon ki wajah se hota hai. Aur is ke ghar wale hain ke ab bhi is ki judayi par rote rehte hain
.

Unhon ne kaha ke is ki misal bilkul aaisi hi hai jaise Rasul Allah Sallallahu Alaihi Wasallam ne Badr ke is kunwein par kharay ho kar jis mein mushrikeen ki lashein daal di gayein theen ‘ in ke bare mein farmaya tha ke jo kuch mein keh raha hoon ‘ ye ise sun rahe hain. To aap ke farmane ka maqsad ye tha ke ab unhein maloom ho gaya ho ga ke un se mein jo kuch keh raha tha wo haqq tha. Phir unhon ne is ayat ki tilawat ki «Innaka la tusmi'ul mauta» ”Aap murdon ko nahi suna sakte.“ «Wa ma anta bi-musmi'im man fil quboori» ”Aur jo log qabron mein dafan ho chuke hain unhein aap apni baat nahi suna sakte.“ Aisha Radi Allahu Anha ne kaha ke (aap in murdon ko nahi suna sakte) jo apna thikana ab jahannum mein bana chuke hain
.

Mujh se Usman ne bayan kiya ‘ hum se Abdah ne bayan kiya ‘ un se Hisham ne ‘ un se un ke walid ne aur un se Ibn Umar Radi Allahu Anhuma ne bayan kiya ke Nabi Kareem Sallallahu Alaihi Wasallam ne Badr ke kunwein par kharay ho kar farmaya ”kya jo kuch tumhare Rabb ne tumhare liye waada kar rakkha tha ‘ ise tum ne saccha pa liya?“ Phir Aap Sallallahu Alaihi Wasallam ne farmaya ”jo kuch mein keh raha hoon ye ab bhi ise sun rahe hain.“ Is hadees ka zikr jab Aisha Radi Allahu Anha se kiya gaya to unhon ne kaha ke Aap Sallallahu Alaihi Wasallam ne ye farmaya tha ke unhon ne ab jaan liya ho ga ke jo kuch mein ne un se kaha tha wo haqq tha. Is ke baad unhon ne ayat «Innaka la tusmi'ul mauta» ”Beshak aap in murdon ko nahi suna sakte.“ poori parhi
.

Mujh se Usman ne bayan kiya ‘ hum se Abdah ne bayan kiya ‘ un se Hisham ne ‘ un se un ke walid ne aur un se Ibn Umar Radi Allahu Anhuma ne bayan kiya ke Nabi Kareem Sallallahu Alaihi Wasallam ne Badr ke kunwein par kharay ho kar farmaya ”kya jo kuch tumhare Rabb ne tumhare liye waada kar rakkha tha ‘ ise tum ne saccha pa liya?“ Phir Aap Sallallahu Alaihi Wasallam ne farmaya ”jo kuch mein keh raha hoon ye ab bhi ise sun rahe hain.“ Is hadees ka zikr jab Aisha Radi Allahu Anha se kiya gaya to unhon ne kaha ke Aap Sallallahu Alaihi Wasallam ne ye farmaya tha ke unhon ne ab jaan liya ho ga ke jo kuch mein ne un se kaha tha wo haqq tha. Is ke baad unhon ne ayat «Innaka la tusmi'ul mauta» ”Beshak aap in murdon ko nahi suna sakte.“ poori parhi
.

Mujh se Abdullah Bin Muhammad ne bayan kiya ‘ hum se Muawiyah Bin Amr ne bayan kiya ‘ hum se Abu Ishaq ne bayan kiya ‘ un se Humaid ne bayan kiya ke mein ne Anas Radi Allahu Anhu se suna ‘ unhon ne bayan kiya ke Harisah Bin Suraqah Ansari Radi Allahu Anhu jo abhi nau-umr larke thay ‘ Badr ke din shaheed ho gaye thay (pani peene ke liye hauz par aaye thay ke ek teer ne shaheed kar diya) phir in ki walidah (Rabee Bint-un-Nasr ‘ Anas Radi Allahu Anhu ki phoopi) Rasul Allah Sallallahu Alaihi Wasallam ki khidmat mein hazir huin aur arz kiya: Ya Rasul Allah! Aap ko maloom hai ke mujhe Harisah se kitna pyar tha. Agar wo ab jannat mein hai to mein is par sabr karoon gi aur Allah Ta'ala ki umeed rakhoon gi aur agar kahin doosri jagah hai to aap dekh rahe hain ke mein kis haal mein hoon. Nabi Kareem Sallallahu Alaihi Wasallam ne farmaya ”Allah tum par raham kare, kya deewani ho rahi ho, kya wahan koi ek jannat hai? Bahut si jannatein hain aur tumhara beta Jannat-ul-Firdous mein hai.“
.

Mujh se Ishaq Bin Ibrahim ne bayan kiya ‘ hum ko Abdullah Bin Idrees ne khabar di ‘ kaha ke mein ne Husain Bin Abdur Rahman se suna ‘ unhon ne Saad Bin Ubaidah se ‘ unhon ne Abu Abdur Rahman Sulami se ke Ali Radi Allahu Anhu ne kaha mujhe ‘ Abu Marsad Radi Allahu Anhu aur Zubair Radi Allahu Anhu ko Rasul Allah Sallallahu Alaihi Wasallam ne ek muhamm par bheja. Hum sab sheh-sawar thay. Nabi Kareem Sallallahu Alaihi Wasallam ne farmaya ke tum log seedhe chale jao. Jab Rauzah Khakh par pahuncho to wahan tumhein mushrikeen ki ek aurat mile gi ‘ wo ek khat liye hue hai jise Hatib Bin Abi Balta'ah ne mushrikeen ke naam bheja hai. Chunanche Nabi Kareem Sallallahu Alaihi Wasallam ne jis jagah ka pata diya tha hum ne wahin is aurat ko ek oont par jaate hue pa liya. Hum ne is se kaha ke khat de do. Wo kehne lagi ke mere paas to koi khat nahi hai. Hum ne is ke oont ko baitha kar is ki talashi li to waqayi humein bhi koi khat nahi mila. Lekin hum ne kaha ke Nabi Kareem Sallallahu Alaihi Wasallam ki baat kabhi ghalat nahi ho sakti khat nikal warna hum tujhe nanga kar dein ge. Jab is ne hamara ye sakht rawaiya dekha to izar bandhne ki jagah ki taraf apna hath le gayi wo ek chadar mein lipti hui thi aur is ne khat nikal kar hum ko de diya hum ise le kar Nabi Kareem Sallallahu Alaihi Wasallam ki khidmat mein hazir hue. Umar Radi Allahu Anhu ne kaha ke is ne (yani Hatib Bin Abi Balta'ah ne) Allah aur is ke rasool aur musalmanon se dagha ki hai aap mujhe ijazat dein taake mein is ki gardan maar doon lekin aap Sallallahu Alaihi Wasallam ne in se daryaft farmaya ke tum ne ye kaam kyun kiya? Hatib Radi Allahu Anhu bole: Allah ki qasam! Ye wajah hargiz nahi thi ke Allah aur is ke rasool par mera iman baqi nahi raha tha mera maqsad to sirf itna tha ke Quraish par is tarah mera ek ihsan ho jaye aur is ki wajah se wo (Makkah mein baqi reh jaane wale) mere ahl o ayal ki hifazat karein. Aap ke ashab mein jitne bhi hazrat (Muhajireen) hain in sab ka qabila wahan mojood hai aur Allah in ke zariya in ke ahl o mal ki hifazat karta hai. Nabi Kareem Sallallahu Alaihi Wasallam ne farmaya ke unhon ne sacchi baat bata di hai aur tum logon ko chahiye ke in ke mutaliq acchi baat hi kaho. Umar Radi Allahu Anhu ne phir arz kiya ke is shakhs ne Allah, is ke rasool aur musalmanon se dagha ki hai aap mujhe ijazat dijiye ke mein is ki gardan maar doon. Aap Sallallahu Alaihi Wasallam ne in se farmaya ke kya ye Badr walon mein se nahi hai? Aap Sallallahu Alaihi Wasallam ne farmaya ke Allah Ta'ala ahl-e-Badr ke halat ko pehle hi se janta tha aur wo khud farma chuka hai ke ”tum jo chaho karo, tumhein jannat zaroor mile gi.“ (Ya aap Sallallahu Alaihi Wasallam ne ye farmaya ke) mein ne tumhari maghfirat kar di hai ye sun kar Umar Radi Allahu Anhu ki aankhon mein aansu aa gaye aur arz kiya, Allah aur is ke rasool ko zyada ilm hai
.

Mujh se Abdullah Bin Muhammad Jafi ne bayan kiya ‘ hum se Abu Ahmad Zubairi ne bayan kiya ‘ hum se Abdur Rahman Bin Ghaseel ne bayan kiya ‘ un se Hamza Bin Abi Usaid aur Zubair Bin Munzir Bin Abi Usaid ne aur un se Abu Usaid Radi Allahu Anhu ne bayan kiya ke Rasul Allah Sallallahu Alaihi Wasallam ne jang-e-Badr ke mauqa par humein hidayat farmai thi ke jab kuffar tumhare qareeb aa jayein to un par teer chalana aur (jab tak wo door rahein) apne teeron ko bachaye rakhna
.

Mujh se Muhammad Bin Abdur Rahim ne bayan kiya ‘ hum se Abu Ahmad Zubairi ne bayan kiya ‘ hum se Abdur Rahman Bin Ghaseel ne ‘ un se Hamza Bin Abi Usaid aur Munzir Bin Abi Usaid ne aur un se Abu Usaid Radi Allahu Anhu ne bayan kiya ke jang-e-Badr mein Rasul Allah Sallallahu Alaihi Wasallam ne humein hidayat ki thi ke jab kuffar tumhare qareeb aa jayein yani hamla o hujoom karein (itne ke tumhare nishane ki zadd mein aa jayein) to phir un par teer barsane shuru karna aur (jab tak wo tum se qareeb na hon) apne teer ko mehfooz rakhna
.

Mujh se Amr Bin Khalid ne bayan kiya ‘ hum se Zuhair ne bayan kiya ‘ hum se Abu Ishaq ne bayan kiya ke mein ne Bara Bin Azib Radi Allahu Anhu se suna ‘ wo bayan kar rahe thay ke Nabi Kareem Sallallahu Alaihi Wasallam ne Uhud ki larai mein teer andazon par Abdullah Bin Jubair Radi Allahu Anhu ko sardar muqarrar kiya tha is larai mein hamare satrah aadmi shaheed hue thay. Nabi Kareem Sallallahu Alaihi Wasallam aur aap ke sahabiyon se Badr ki larai mein ek sau chalees mushrikeen ko nuqsan pahuncha tha. Satrah in mein se qatl kar diye gaye thay aur satrah qaidi bana kar laye gaye thay is par Abu Sufyan ne kaha ke aaj ka din Badr ke din ka badla hai aur larai ki misal dowl ki si hai
.