Hum se Ishaq Bin Ibrahim Sawwaf ne bayan kiya, hum se Yusuf Bin Yaqub ne bayan kiya, un ka Bani Zu'baiah ke yahan aana jana tha aur wo Bani Sadoos ke ghulam thay. Kaha hum se Sulaiman Taimi ne bayan kiya, un se Abu Mijlaz aur un se Qais Bin Ubad ne bayan kiya ke Ali Radi Allahu Anhu ne kaha ye ayat «Hazaani khasmani-khtasamu fi Rabbihim» hamare hi bare mein nazil hui thi
.

Hum se Yahya Bin Jafar ne bayan kiya, hum ko Wakee ne khabar di, unhein Sufyan ne, unhein Abu Hashim ne, unhein Abu Mijlaz ne, unhein Qais Bin Ubad aur unhon ne Abu Zar Radi Allahu Anhu se suna, wo qasmiya bayan karte thay ke ye ayat ( «Hazaani khasmani-khtasamu fi Rabbihim») unhein chay aadmiyon ke bare mein, Badr ki larai ke mauqa par nazil hui thi. Pehli hadees ki tarah rawi ne ise bhi bayan kiya
.

Hum se Yaqub Bin Ibrahim ne bayan kiya, hum se Hushaim ne bayan kiya, hum ko Abu Hashim ne khabar di, unhein Abu Mijlaz ne, unhein Qais ne, unhon ne kaha ke mein ne Abu Zar Radi Allahu Anhu se suna, wo qasmiya kehte thay ke ye ayat «Hazaani khasmani-khtasamu fi Rabbihim» un ke bare mein utri jo Badr ki larai mein muqable ke liye nikle thay yani Hamza, Ali aur Ubaidah Bin Haris Radi Allahu Anhum (musalmanon ki taraf se) aur Utbah, Shaibah, Rabeeah ke bete aur Walid Bin Utbah (kafiron ki taraf se)
.

Mujh se Abu Abdullah Ahmad Bin Saeed ne bayan kiya, hum se Ishaq Bin Mansoor Sulooli ne bayan kiya, hum se Ibrahim Bin Yusuf ne bayan kiya, un se un ke baap Yusuf Bin Ishaq ne aur un se un ke dada Abu Ishaq Sabi'i ne ke ek shakhs ne Bara Radi Allahu Anhu se poocha aur mein sun raha tha ke kya Ali Radi Allahu Anhu Badr ki jang mein shareek thay? Unhon ne kaha ke haan unhon ne to mubarizat ki thi aur ghalib rahe thay
.

Hum se Abdul Aziz Bin Abdullah Uwaisi ne bayan kiya, kaha ke mujh se Yusuf Bin Majashoon ne bayan kiya, un se Salih Bin Ibrahim Bin Abdur Rahman Bin Auf ne, un se un ke walid Ibrahim ne un ke dada Abdur Rahman Bin Auf Radi Allahu Anhu se, unhon ne bayan kiya ke Umayyah Bin Khalaf se (hijrat ke baad) mera ahad namah ho gaya tha. Phir Badr ki larai ke mauqa par unhon ne is ke aur is ke bete (Ali) ke qatl ka zikr kiya. Bilal ne (jab ise dekh liya to) kaha ke agar aaj Umayyah bach nikla to mein Akhirat mein azab se bach nahi sakoon ga
.

Hum se Usman Bin Abi Shaibah ne bayan kiya, kaha ke mujhe mere walid ne khabar di, unhein Shuba ne, unhein Abu Ishaq ne, unhein Aswad aur unhein Abdullah Bin Masood Radi Allahu Anhu ne ke Nabi Kareem Sallallahu Alaihi Wasallam ne (ek martaba Makkah mein) Surah-an-Najm ki tilawat ki aur sajda-e-tilawat kiya to jitne log wahan mojood thay sab sajda mein gir gaye. Siwaye ek boorhe ke ke is ne hatheli mein matti le kar apni peshani par ise laga liya aur kehne laga ke mere liye bas itna hi kafi hai. Abdullah Radi Allahu Anhu ne kaha ke phir mein ne ise dekha ke kufr ki halat mein wo qatl hua
.

Mujhe Ibrahim Bin Musa ne khabar di, kaha hum se Hisham Bin Yusuf ne bayan kiya, un se Ma'mar ne, un se Hisham ne, un se Urwah ne bayan kiya ke Zubair Radi Allahu Anhu ke jism par talwar ke teen (gehre) zakhmon ke nishanat thay. Ek un ke mondhe par tha (aur itna gehra tha) ke mein bachpan mein apni ungliyan in mein dakhil kar diya karta tha. Urwah ne bayan kiya ke in mein se do zakham Badr ki larai mein aaye thay aur ek jang-e-Yarmook mein. Urwah ne bayan kiya ke jab Abdullah Bin Zubair Radi Allahu Anhu ko (Hajjaj zalim ke hathon se) shaheed kar diya gaya to mujh se Abdul Malik Bin Marwan ne kaha: Ay Urwah! Kya Zubair Radi Allahu Anhu ki talwar tum pehchante ho? Mein ne kaha ke haan, pehchanta hoon. Us ne poocha is ki nishani batao? Mein ne kaha ke Badr ki larai ke mauqa par is ki dhaar ka ek hissa toot gaya tha, jo abhi tak is mein baqi hai. Abdul Malik ne kaha ke tum ne sach kaha (phir is ne Nabigha shayar ka ye misra parha) foujon ke sath larrte larrte in ki talwaron ki dhaarein kai jagah se toot gayi hain“ phir Abdul Malik ne wo talwar Urwah ko wapas kar di ‘ Hisham ne bayan kiya ke hamara andaza tha ke is talwar ki qeemat teen hazar dirham thi. Wo talwar hamare ek azeez (Usman Bin Urwah) ne qeemat de kar le li thi meri bari aarzu thi ke kash! Wo talwar mere hisse mein aati
.

Hum se Farwah Bin Abi-ul-Maghra ne bayan kiya ‘ un se Ali Bin Mushir ne ‘ un se Hisham Bin Urwah ne ‘ un se un ke walid Urwah ne bayan kiya ke Zubair Radi Allahu Anhu ki talwar par chandi ka kaam tha. Hisham ne kaha ke (mere walid) Urwah ki talwar par chandi ka kaam tha
.

Hum se Ahmad Bin Muhammad ne bayan kiya ‘ hum se Abdullah Bin Mubarak ne bayan kiya ‘ unhein Hisham Bin Urwah ne khabar di ‘ unhein un ke walid ne ke Rasul Allah Sallallahu Alaihi Wasallam ke Sahaba ne Zubair Radi Allahu Anhu se Yarmook ki jang mein kaha aap hamla karte to hum bhi aap ke sath hamla karte unhon ne kaha ke agar mein ne in par zor ka hamla kar diya to phir tum log peeche reh jao ge sab bole ke hum aisa nahi karein ge. Chunanche Zubair Radi Allahu Anhu ne dushman (Roomi fouj) par hamla kiya aur in ki saffon ko cheerte hue aage nikal gaye. Is waqt in ke sath koi ek bhi (musalman) nahi raha phir (musalman fouj ki taraf) aane lage to Roomiyon ne in ke ghore ki lagam pakar li aur mondhe par do kari zakham lagaye, jo zakham Badr ki larai ke mauqa par in ko laga tha wo in dono zakhmon ke darmiyan mein par gaya tha. Urwah Bin Zubair ne bayan kiya ke jab mein chota tha to in zakhmon mein apni ungliyan daal kar khela karta tha. Urwah ne bayan kiya ke Yarmook ki larai ke mauqa par Abdullah Bin Zubair Radi Allahu Anhu bhi in ke sath gaye thay, is waqt un ki umr kul das saal ki thi is liye in ko ek ghore par sawar kar ke ek sahib ki hifazat mein de diya tha
.

Mujh se Abdullah Bin Muhammad ne bayan kiya, kaha unhon ne Rooh Bin Ubadah se suna, kaha hum se Saeed Bin Abi Aroobah ne bayan kiya, un se Qatadah ne bayan kiya ke Anas Bin Malik Radi Allahu Anhu ne kaha, hum se Abu Talha Radi Allahu Anhu ne bayan kiya ke Badr ki larai mein Rasul Allah Sallallahu Alaihi Wasallam ke hukm se Quraish ke chaubees maqtool sardar Badr ke ek bahut hi andhere aur gande kunwein mein phenk diye gaye. Aadat-e-mubarika thi ke jab dushman par ghalib hote to maidan-e-jang mein teen din tak qiyam farmate jang-e-Badr ke khatma ke teesre din aap ke hukm se aap ki sawari par kajawah bandha gaya aur aap rawanah hue aap ke ashab bhi aap ke sath thay Sahaba ne kaha, ghaliban aap kisi zaroorat ke liye tashreef le ja rahe hain aakhir aap is kunwein ke kinare aa kar kharay ho gaye aur kuffar-e-Quraish ke maqtooleen sardaron ke naam un ke baap ke naam ke sath le kar aap unhein aawaz dene lage ke ay falan bin falan! Ay falan bin falan! Kya aaj tumhare liye ye baat behtar nahi thi ke tum ne duniya mein Allah aur is ke rasool ki itaat ki hoti? Beshak hum se hamare Rabb ne jo waada kiya tha wo humein poori tarah hasil ho gaya to kya tumhare Rabb ka tumhare mutaliq jo waada (azab ka) tha wo bhi tumhein poori tarah mil gaya? Abu Talha Radi Allahu Anhu ne bayan kiya ke is par Umar Radi Allahu Anhu bol pare: Ya Rasul Allah! Aap in lashon se kyun khitab farma rahe hain? Jin mein koi jaan nahi hai. Nabi Kareem Sallallahu Alaihi Wasallam ne farmaya ”is zaat ki qasam jis ke hath mein meri jaan hai, jo kuch mein keh raha hoon tum log in se zyada ise nahi sun rahe ho.“ Qatadah ne bayan kiya ke Allah Ta'ala ne unhein zinda kar diya tha (is waqt) taake Nabi Kareem Sallallahu Alaihi Wasallam unhein apni baat suna dein in ki taubeekh ‘ zillat ‘ namuradi aur hasrat o nadamat ke liye
.