Aur Surah Al-Anfal mein Allah Ta'ala ka irshad "allazina aahatta minhum summa yanqudhuna ahdahum fi kulli marratin wa-hum la yattaquna" " Wo log (Yahud) Aap jin se muahida karte hain, aur phir har martaba wo dagha-bazi karte hain, aur wo baaz nahi aate."
.

Hum se Qutaiba Bin Said ne bayan kiya, kaha hum se Jareer ne bayan kiya, un se Aamash ne, un se Abdullah Bin Murrah ne, un se Masrooq ne, un se Abdullah Bin Amr (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya, char aadatein aisi hain ke agar ye charon kisi ek shakhs mein jama ho jayein to wo pakka munafiq hai. Wo shakhs jo baat kare to jhoot bole, aur jab waada kare, to waada khilafi kare, aur jab muahida kare to ise poora na kare. Aur jab kisi se lade to gali galoch par utar aaye aur agar kisi shakhs ke andar in charon aadaton mein se ek hi aadat hai, to is ke andar nifaq ki ek aadat hai jab tak ke wo ise chhod na de
.

Hum se Muhammad Bin Kaseer ne bayan kiya, kaha hum ko Sufyan Thauri ne khabar di, unhein Aamash ne, unhein Ibrahim Taimi ne, unhein un ke baap (Yazid Bin Shareek Taimi) aur un se Ali (Radi Allahu Anhu) ne bayan kiya ke hum ne Nabi Kareem (Sallallahu Alaihi Wasallam) se bas yahi Quran Majeed likha aur jo kuch is waraq mein hai, Nabi Kareem (Sallallahu Alaihi Wasallam) ne farmaya tha ke Madinah Air pahadi aur falan (Kuda) pahadi ke darmiyan tak haram hai. Pas jis ne yahan (deen mein) koi nayi cheez dakhil ki ya kisi aise shakhs ko is ke hudood mein panah di to is par Allah Ta'ala, Malaika aur insan sab ki lanat hogi. Na is ka koi farz qabool aur na nafal qabool hoga. Aur Musalman panah dene mein sab barabar hain. Mamooli se mamooli Musalman (aurat ya ghulam) kisi kafir ko panah de sakte hain. Aur jo koi kisi Musalman ka kiya hua ahd tod dale is par Allah aur Malaika aur insan sab ki lanat hogi, na is ki koi farz ibadat qabool hogi aur na nafal! Aur jis ghulam ya londi ne apne aaqa apne malik ki ijazat ke baghair kisi doosre ko apna malik bana liya, to is par Allah aur Malaika aur insan sab ki lanat hogi, na is ki koi farz ibadat qabool hogi aur na nafal!
.

Abu Musa (Muhammad Bin Musanna) ne bayan kiya ke hum se Hashim Bin Qasim ne bayan kiya, un se Ishaq Bin Said ne bayan kiya, un se un ke walid Said Bin Amr ne, un se Abu Hurairah (Radi Allahu Anhu) ne kaha ke is waqt tumhara kya haal hoga jab (jizya aur khiraj mein se) na tumhein dirham milega aur na dinar! Is par kisi ne kaha. Ke janab-e-Abu Hurairah (Radi Allahu Anhu) aap kaise samajhte hain ke aisa hoga? Abu Hurairah (Radi Allahu Anhu) ne kaha haan is zaat ki qasam! Jis ke hath mein Abu Hurairah ki jaan hai. Ye Sadiq-o-Masdooq (Sallallahu Alaihi Wasallam) ka farman hai. Logon ne pucha tha ke ye kaise ho jaye ga? To aap ne farmaya, jab ke Allah aur us ke Rasul ka ahd (Islami hukumat ghair-muslimon se un ki jaan-o-mal ki hifazat ke bare mein) toda jane lage, to Allah Ta'ala bhi zimmiyon ke dilon ko sakht kar dega. Aur wo jizya dena band kar dein ge (balki ladne ko mustaid honge)
.

Hum se Abdan ne bayan kiya, kaha hum ko Abu Hamza ne khabar di, kaha ke mein ne Aamash se suna, unhon ne bayan kiya ke mein ne Abu Wail se pucha, kya aap Siffin ki jung mein maujood thay? Unhon ne bayan kiya ke haan (mein tha) aur mein ne Sahl Bin Hunaif (Radi Allahu Anhu) ko ye kehte suna tha ke tum log khud apni raye ko ghalat samjho, jo aapas mein ladte marte ho. Mein ne apne tain dekha jis din Abu Jandal aaya (yaani Hudaibiya ke din) agar mein Nabi Kareem (Sallallahu Alaihi Wasallam) ka hukm pher deta aur hum ne jab kisi musibat mein darr kar talwarain apne kandhon par rakhein to wo musibat asan ho gayi. Hum ko is ka anjam maloom ho gaya. Magar yahi ek ladai hai (jo sakht mushkil hai is ka anjam behtar nahi maloom hota)
.

Hum se Abdullah Bin Muhammad ne bayan kiya, kaha hum se Yahya Bin Adam ne, un se Yazid Bin Abdul Aziz ne, un se un ke baap Abdul Aziz Bin Siyah ne, un se Habib Bin Abi Sabit ne bayan kiya, kaha ke mujh se Abu Wail ne bayan kiya ke hum maqam-e-Siffin mein dere dale hue thay. Phir Sahl Bin Hunaif (Radi Allahu Anhu) khade hue aur farmaya Ae logo! Tum khud apni raye ko ghalat samjho. Hum sulah Hudaibiya ke mauqa par Rasul Allah (Sallallahu Alaihi Wasallam) se sath thay, agar humein ladna hota to is waqt zaroor ladte. Umar (Radi Allahu Anhu) is mauqa par aaye (yaani Hudaibiya mein) aur arz kiya, Ya Rasul Allah! Kya hum haqq par aur wo baatil par nahi hain? Nabi Kareem (Sallallahu Alaihi Wasallam) ne farmaya ke kyun nahi! Umar (Radi Allahu Anhu) ne kaha kya hamare maqtool Jannat mein aur un ke maqtool Jahannum mein nahi jayenge? Nabi Kareem (Sallallahu Alaihi Wasallam) ne farmaya, ke kyun nahi! Phir Umar (Radi Allahu Anhu) ne kaha ke phir hum apne deen ke muamle mein kyun dabein? Kya hum (Madinah) wapas chale jayenge, aur hamare aur un ke darmiyan Allah koi faisla nahi karega. Nabi Kareem (Sallallahu Alaihi Wasallam) ne farmaya "Ibn Khattab! Mein Allah ka Rasul hoon aur Allah mujhe kabhi barbad nahi karega." Is ke baad Umar (Radi Allahu Anhu) Abu Bakr (Radi Allahu Anhu) ke paas gaye aur un se wahi sawalat kiye, jo Nabi Kareem (Sallallahu Alaihi Wasallam) se abhi kar chuke thay. Unhon ne bhi yahi kaha ke Aap (Sallallahu Alaihi Wasallam) Allah ka Rasul hain, aur Allah unhein kabhi barbad nahi hone dega. Phir Surah Fatah nazil hui aur Aap (Sallallahu Alaihi Wasallam) ne Umar (Radi Allahu Anhu) ko ise aakhir tak parh kar sunaya, to Umar (Radi Allahu Anhu) ne arz kiya kya yahi fatah hai? Aap (Sallallahu Alaihi Wasallam) ne farmaya ke haan! Bila shaq yahi fatah hai
.

Hum se Qutaiba Bin Said ne bayan kiya, kaha hum se Hatim ne bayan kiya, un se Hisham Bin Urwah ne, un se un ke baap ne aur un se Asma Bint Abi Bakr (Radi Allahu Anhuma) ne bayan kiya ke Quraish se jis zamane mein Rasul Allah (Sallallahu Alaihi Wasallam) ne (Hudaibiya ki) sulah ki thi, isi muddat mein meri walida (Qataila) apne baap (Harith Bin Mudrik) ko sath le kar mere paas aieen, wo Islam mein dakhil nahi hui theen. (Urwah ne bayan kiya ke) Asma (Radi Allahu Anha) ne is bare mein Aap (Sallallahu Alaihi Wasallam) se pucha ke Ya Rasul Allah! Meri walida aayi hui hain aur mujh se raghbat ke sath milna chahti hain, to kya mein un ke sath sila-rehmi karoon? Aap (Sallallahu Alaihi Wasallam) ne farmaya ke haan! Un ke sath sila-rehmi kar
.

Hum se Ahmad Bin Usman Bin Hakeem ne bayan kiya, kaha hum se Shuraih Bin Maslama ne bayan kiya, kaha hum se Ibrahim Bin Yusuf Bin Abi Ishaq ne bayan kiya, kaha ke mujh se mere walid ne bayan kiya, un se Abu Ishaq ne bayan kiya, kaha ke mujh se Bara Bin Azib (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne jab umrah karna chaha to Aap ne Makkah mein dakhila ke liye Makkah ke logon se ijazat lene ke liye aadmi bheja. Unhon ne is shart ke sath (ijazat di) ke Makkah mein teen din se zyada qayam na karein. Hathyar niyam mein rakhe baghair dakhil na hon aur (Makkah ke) kisi aadmi ko apne sath (Madinah) na le jayein (agarchay wo jana chahe) unhon ne bayan kiya ke phir in sharait ko Ali Bin Abi Talib (Radi Allahu Anhu) ne likhna shuru kiya aur is tarah "Ye Muhammad Allah ke Rasul ke sulah-nama ki tehreer hai." Makkah walon ne kaha ke agar hum jaan lete ke Aap Allah ke Rasul hain to phir Aap ko rokte hi nahi balki Aap par iman late, is liye tumhein yun likhna chahiye, "Ye Muhammad Bin Abdullah ki sulah-nama ki tehreer hai". Is par Aap (Sallallahu Alaihi Wasallam) ne farmaya, Allah gawah hai ke mein Muhammad Bin Abdullah hoon aur Allah gawah hai ke mein Allah ka Rasul bhi hoon. Aap (Sallallahu Alaihi Wasallam) likhna nahi jante thay. Rawi ne bayan kiya ke Aap (Sallallahu Alaihi Wasallam) ne Ali (Radi Allahu Anhu) se farmaya ke Rasul Allah ka lafz mita de. Ali (Radi Allahu Anhu) ne arz kiya ke Allah ki qasam! Ye lafz to mein kabhi na mitaoon ga, Aap (Sallallahu Alaihi Wasallam) ne farmaya ke phir mujhe dikhlao, rawi ne bayan kiya ke Ali (Radi Allahu Anhu) ne Aap (Sallallahu Alaihi Wasallam) ko wo lafz dikhaya. Aur Aap (Sallallahu Alaihi Wasallam) ne khud apne hath se ise mita diya. Phir jab Aap (Sallallahu Alaihi Wasallam) Makkah tashreef le gaye aur (teen) din guzar gaye to Quraish Ali (Radi Allahu Anhu) ke paas aaye aur kaha ke ab apne saathi se kaho ke ab yahan se chale jayein (Ali Radi Allahu Anhu ne bayan kiya ke) mein ne is ka zikr Aap (Sallallahu Alaihi Wasallam) se kiya to Aap ne farmaya ke haan, chunanche Aap wahan se rawana ho gaye
.

Aur Nabi Kareem (Sallallahu Alaihi Wasallam) ne Khaibar ke Yahudiyon se farmaya tha "Mein is waqt tak tumhein yahan rehne doon ga, jab tak Allah Ta'ala chahega."
.

Hum se Abdan Bin Usman ne bayan kiya, unhon ne kaha ke mujhe mere baap ne khabar di, unhein Shuba ne, unhein Abu Ishaq ne, unhein Amr Bin Maimun ne aur un se Abdullah (Radi Allahu Anhu) ne bayan kiya ke Makkah mein (shuru Islam ke zamane mein Rasul Allah Sallallahu Alaihi Wasallam sajda ki halat mein thay aur qareeb hi Quraish ke kuch log baithe hue thay. Phir Uqba Bin Abi Muait ont ki ojhdi laya aur Nabi Kareem (Sallallahu Alaihi Wasallam) ki peeth par ise daal diya. Nabi Kareem (Sallallahu Alaihi Wasallam) sajda se apna sarr na utha sake. Aakhir Fatima (Radi Allahu Anha) aieen aur Aap (Sallallahu Alaihi Wasallam) ki peeth par se is ojhdi ko hataya aur jis ne ye harkat ki thi ise bura bhala kaha, Nabi Kareem (Sallallahu Alaihi Wasallam) ne bhi bad-dua ki ke Ae Allah! Quraish ki is jamaat ko pakad. Ae Allah! Abu Jahl Bin Hisham, Utba Bin Rabia, Shaiba Bin Rabia, Uqba Bin Abi Muait, Umayya Bin Khalaf ya Ubai Bin Khalaf ko barbad kar. Phir mein ne dekha ke ye sab Badr ki ladai mein qatl kar diye gaye. Aur ek kunwein mein unhein daal diya gaya tha. Siwa Umayya ya Ubai ke ke ye shakhs bahut bhari bharkam tha. Jab ise Sahaba ne khaincha to kunwein mein dalne se pehle hi is ke jod jod alag ho gaye
.