Aur Allah Taala ke is irshad ki wazahat ke aur jab tum namaz ke liye azan dete ho , to woh is ko mazaaq aur khel bana lete hain . Yeh is wajah se ke yeh log nasamajh hain . Aur Allah Taala ka irshad hai ke jab tumhein juma ke din namaz juma ke liye pukara jaye . To Allah ki yaad karne ke liye foran chale aao .

Hum se Imran bin Maisara ne bayan kiya , kaha ke hum se Abdul Warith bin Saeed ne bayan kiya , kaha ke hum se Khalid Haza ne Abu Qalaba Abdullah bin Zaid se , unhon ne Anas raziyallahu anhu se ke namaz ke waqt ke elaan ke liye logon ne aag aur naqoos ka zikr kiya . Phir yahood wa nasara ka zikr aa gaya . Phir Bilal raziyallahu anhu ko yeh hukm hua ke azan ke kalimat do do martaba kahen aur iqamat mein ek ek martaba .

Hum se Mahmood bin Ghailan ne bayan kiya , kaha ke hum se Abdur Razzaq bin Hammam ne , kaha ke humein Abdul Malik Ibn Juraij ne khabar di , kaha ke mujhe Nafi ne khabar di ke Abdullah bin Umar raziyallahu anhuma kehte thay ke jab musalman hijrat kar ke Madina pohanche to waqt muqarrar kar ke namaz ke liye aate thay . Is ke liye azan nahi di jati thi . Ek din is baray mein mashwara hua . Kisi ne kaha nasara ki tarah ek ghanta le liya jaye aur kisi ne kaha ke yahoodiyon ki tarah narsinga bugal bana lo , is ko phoonk diya karo lekin Umar raziyallahu anhu ne farmaya ke kisi shakhs ko kyun na bhej diya jaye jo namaz ke liye pukar diya kare . Is par Nabi Karim salla Allahu alaihi wa sallam ne isi raye ko pasand farmaya aur Bilal se farmaya ke Bilal! uth aur namaz ke liye azan de .

Hum se Sulaiman bin Harb ne bayan kiya , kaha hum se Hammad bin Zaid ne Simak bin Attiya se , unhon ne Ayyub Sakhtiyani se , unhon ne Abu Qalaba se , unhon ne Anas raziyallahu anhu se ke Bilal raziyallahu anhu ko hukm diya gaya ke azan ke kalimat do do martaba kahen aur siwa qad qamat as-salat ke takbeer ke kalimat ek ek dafa kahen .

Hum se Muhammad bin Salam ne bayan kiya , kaha hum se Abdul Wahab Thaqafi ne bayan kiya , kaha hum se Khalid bin Mehran Haza ne Abu Qalaba Abdur Rahman bin Zaid Harami se bayan kiya , unhon ne Anas bin Malik raziyallahu anhu se ke jab musalman zyada ho gaye to mashwara hua ke kisi aisi cheez ke zariye namaz ke waqt ka elaan ho jisay sab log samajh len . Kuch logon ne zikr kiya ke aag roshan ki jaye . Ya narsinga ke zariye elaan karen . Lekin aakhir mein Bilal ko hukm diya gaya ke azan ke kalimat do do dafa kahen aur takbeer ke ek ek dafa .

Hum se Ali bin Abdullah bin Madini ne bayan kiya , kaha ke hum se Ismail bin Ibrahim bin Aliya ne bayan kiya , kaha hum se Khalid Haza ne Abu Qalaba se bayan kiya , unhon ne Anas raziyallahu anhu se ke Bilal raziyallahu anhu ko hukm diya gaya ke azan ke kalimat do do dafa kahen aur takbeer mein yahi kalimat ek ek dafa . Ismail ne bataya ke mein ne Ayyub Sakhtiyani se is hadees ka zikr kiya to unhon ne kaha magar lafz qad qamat as-salat do hi dafa kaha jayega .

Hum se Abdullah bin Yusuf Tinnisi ne bayan kiya , kaha humein Imam Malik ne Abul Zinad se khabar di , unhon ne Araj se , unhon ne Abu Hurairah raziyallahu anhu se ke Nabi Karim salla Allahu alaihi wa sallam ne farmaya jab namaz ke liye azan di jati hai to shaitan paadta hua bari tezi ke sath peeth mor kar bhagta hai . Taake azan ki awaz na sun sake aur jab azan khatam ho jati hai to phir wapas aa jata hai . Lekin jun hi takbeer shuru hui woh phir peeth mor kar bhagta hai . Jab takbeer bhi khatam ho jati hai to shaitan dobara aa jata hai aur namazi ke dil mein waswase dalta hai . Kehta hai ke falaa baat yaad kar falaa baat yaad kar . Un baton ki shaitan yaad dahani karata hai jin ka isay khayal bhi na tha aur is tarah is shakhs ko yeh bhi yaad nahi rehta ke is ne kitni rakaten parhi hain .

Umar bin Abdul Aziz khalifa ne apne moazzin se kaha ke sidhi sadhi azan diya kar , warna hum se alag ho ja .

Hum se Abdullah bin Yusuf Tinnisi ne bayan kiya , unhon ne kaha ke humein Imam Malik ne Abdur Rahman bin Abdullah bin Abi Sasa Ansari se khabar di , phir Abdur Rahman Mazni apne walid Abdullah se bayan karte hain ke un ke walid ne unhein khabar di ke Abu Saeed Khudri raziyallahu anhu sahaba ne un se bayan kiya ke mein dekhta hun ke tumhein bakriyan aur jangal mein rehna pasand hai . Is liye jab tum jangal mein apni bakriyon ko liye hue mojood ho aur namaz ke liye azan do to tum buland awaz se azan diya karo . Kyunke jinn wa ins balkay tamam hi cheezen jo moazzin ki awaz sunti hain qiyamat ke din is par gawahi dengi . Abu Saeed raziyallahu anhu ne farmaya ke yeh mein ne Nabi Karim salla Allahu alaihi wa sallam se suna hai .

Hum se Qutaiba bin Saeed ne bayan kiya , kaha hum se Ismail bin Jafar Ansari ne Humaid se bayan kiya , unhon ne Anas raziyallahu anhu se unhon ne Nabi Karim salla Allahu alaihi wa sallam se ke jab Nabi Karim salla Allahu alaihi wa sallam humein sath le kar kahin jihad ke liye tashreef le jate , to foran hi hamla nahi karte thay . Subah hoti aur phir aap intizar karte agar azan ki awaz sun lete to hamla ka irada tark kar dete aur agar azan ki awaz na sunai deti to hamla karte thay . Anas raziyallahu anhu ne kaha ke hum Khaibar ki taraf gaye aur raat ke waqt wahan pohanche . Subah ke waqt jab azan ki awaz nahi sunai di to aap apni sawari par baith gaye aur mein Abu Talha raziyallahu anhu ke peechay baith gaya . Chalne mein mere qadam Nabi Karim salla Allahu alaihi wa sallam ke qadam mubarak se chhoo chhoo jate thay . Anas raziyallahu anhu ne kaha ke Khaibar ke log apne tokron aur kodalon ko liye hue apne kaam kaaj ko bahar nikle . To unhon ne Rasool Allah salla Allahu alaihi wa sallam ko dekha , aur chilla uthe ke Muhammad wallah Muhammad salla Allahu alaihi wa sallam poori fauj samet aa gaye . Anas raziyallahu anhu ne kaha ke jab Nabi Karim salla Allahu alaihi wa sallam ne unhein dekha to aap ne farmaya Allahu Akbar , Allahu Akbar Khaibar par kharabi aa gayi . Beshak jab hum kisi qoum ke maidan mein utar jayen to daraye hue logon ki subah buri ho gi .