’Ali Radhiallahu Anhu ka irshaad hai ke“Logon se woh baatein karo jinhein woh pehchaante hon. Kya tumhein yeh pasand hai ke log Allah aur us ke Rasool ko jhutla den?”

Hum se Ubaidullah bin Musa ne Ma’roof ke waaste se bayan kiya, unhon ne Abut-Tufail se naql kiya, unhon ne ’Ali se mazmoon-e-Hadees «حَدِّثُوا النَّاسَ بِمَا يَعْرِفُونَ» aakhir tak bayan kiya, (tarjumah guzar chuka hai.)

Hum se Ishaaq bin Ibrahim ne bayan kiya, kaha hum se Mu’aaz bin Hisham ne bayan kiya, us ne kaha ke mere baap ne Qatadah ke waaste se naql kiya, woh Anas bin Malik se riwayat karte hain ke (ek martaba) Mu’aaz bin Jabal Rasoolullah Sallallahu Alaihi Wasallam ke peeche sawaari par sawaar the, Aap Sallallahu Alaihi Wasallam ne farmaaya, aye Mu’aaz! Main ne arz kiya, haazir hun ya Rasoolallah! Aap Sallallahu Alaihi Wasallam ne (dobarah) farmaaya, aye Mu’aaz! Main ne arz kiya, haazir hun aye Allah ke Rasool! Aap Sallallahu Alaihi Wasallam ne (seh-baara) farmaaya, aye Mu’aaz! Main ne arz kiya, haazir hun, aye Allah ke Rasool, teen baar aisa huwa. (Us ke baad) Aap Sallallahu Alaihi Wasallam ne farmaaya ke jo shakhs sachche dil se is baat ki gawaahi de ke Allah ke siwa koi ma’bood nahi hai aur Muhammed Sallallahu Alaihi Wasallam Allah ke sachche Rasool hain, Allah Ta’ala us ko (dozakh ki) aag par haraam kar deta hai. Main ne kaha ya Rasoolallah! Kya is baat se logon ko ba-khabar na kar dun taake woh khush ho jaayen? Aap Sallallahu Alaihi Wasallam ne farmaaya (agar tum yeh khabar sunaaoge) to log is par bharosa kar baithenge (aur amal chor denge) Mu’aaz Radhiallahu Anhu ne inteqaal ke waqt yeh Hadees is khayaal se bayan farmaa di ke kahien Hadees-e-Rasool chupane ke gunaah par un se aakhirat mein muakhza na ho.

Hum se Musaddad ne bayan kiya, un se Mu’tamir ne bayan kiya, unhon ne apne baap se suna, unhon ne Anas Radhiallahu Anhu se suna, woh kehte hain ke mujh se bayan kiya gaya ke Rasoolullah Sallallahu Alaihi Wasallam ne ek roz Mu’aaz Radhiallahu Anhu se farmaaya ke jo shakhs Allah se is kaifiyat ke saath mulaqaat kare ke us ne Allah ke saath kisi ko shareek na kiya ho, woh (yaqeenan) jannat mein daakhil hoga, Mu’aaz bole, ya Rasoolallah! Kya main is baat ki logon ko bashaarat na suna dun? Aap Sallallahu Alaihi Wasallam ne farmaaya nahi, mujhe khauf hai ke log is par bharosa kar baithenge.