Hum se Musaddad ne byaan kiya , kaha ke hum se Yahya bin Saeed Qattan ne byaan kiya , un se Ubaydullah Umari ne kaha ke mujh se Nafi ne Abdullah bin Umar razi Allahu anhuma se byaan kiya ke jab Abdullah bin Ubayy (munafiq) ki maut hui to is ka beta (Abdullah sahabi) Nabi Karim salla Allahu alaihi wasallam ki khidmat mein aaya aur arz ki ke ya Rasool Allah! waalid ke kafan ke liye Aap apni qamees inayat farmaiye aur un par namaaz parhiye aur maghfirat ki dua kijiye . Chunanche Nabi Karim salla Allahu alaihi wasallam ne apni qamees (ghayat-e-muruwat ki wajah se) inayat ki aur farmaya ke mujhe batana main namaaz-e-janaza parhoon ga . Abdullah ne itla bhijwayi . Jab Aap salla Allahu alaihi wasallam namaaz parhane ke liye aage barhay to Umar razi Allahu anhu ne Aap salla Allahu alaihi wasallam ko peeche se pakar liya aur arz kiya ke kya Allah Ta'ala ne Aap ko munafiqeen ki namaaz-e-janaza parhne se mana nahin kiya hai ? Aap salla Allahu alaihi wasallam ne farmaya ke mujhe ikhtiyar diya gaya hai jaisa ke irshad-e-Baari hai ”to un ke liye istighfar kar ya na kar aur agar tu sattar martaba bhi istighfar kare to bhi Allah unhein hargiz maaf nahin kare ga“ chunanche Nabi Karim salla Allahu alaihi wasallam ne namaaz parhayi . Is ke baad yeh aayat utri ”kisi bhi munafiq ki maut par is ki namaaz-e-janaza kabhi na parhana“ .

Hum se Malik bin Ismail ne byaan kiya , un se Ibn Uyaynah ne byaan kiya , un se Amr ne , unhon ne Jabir razi Allahu anhu se suna ke Nabi Karim salla Allahu alaihi wasallam tashreef laaye to Abdullah bin Ubayy ko dafan kiya ja raha tha . Aap salla Allahu alaihi wasallam ne ise qabr se nikalwaya aur apna luaab-e-dahan is ke munh mein dala aur apni qamees pehnayi .