Aur Anas razi Allahu anhu aur Hasan Basri rahimahullah ne salam phera (yani sajda sahu ke baad) aur tashahud nahin parha aur Qatadah ne kaha ke tashahud na parhe .

Hum se Abdullah bin Yusuf Tanisi ne byaan kiya , unhon ne kaha ke hum ko Imam Malik bin Anas ne khabar di , unhein Ayub bin Abi Tamimah Sakhtiyani ne khabar di , unhein Muhammad bin Sirin ne aur unhein Abu Hurairah razi Allahu anhu ne ke Rasool Allah salla Allahu alaihi wasallam do rakat parh kar uth kharay huay to Zul Yadain ne poocha ke ya Rasool Allah! kya namaaz kam kar di gayi hai ya Aap bhool gaye hain ? Rasool Allah salla Allahu alaihi wasallam ne logon se poocha ke kya Zul Yadain sach kehte hain . Logon ne kaha jee han! yeh sun kar Rasool Allah salla Allahu alaihi wasallam kharay huay aur do rakat jo reh gayi thin un ko parha , phir salam phera , phir «Allahu Akbar» kaha aur apne sajde ki tarah (yani namaaz ke mamooli sajde ki tarah) sajda kiya ya is se lamba phir sar uthaya .

Hum se Sulayman bin Harb ne byaan kiya , kaha ke hum se Hammad bin Zayd ne byaan kiya , un se Salamah bin Alqamah ne , unhon kaha ke main ne Muhammad bin Sirin se poocha ke kya sajda sahu mein tashahud hai ? Aap ne jawab diya ke Abu Hurairah razi Allahu anhu ki hadees mein to is ka zikr nahin hai .