Aur Imam Hasan Basri aur Sufyan Thawri aur Malik ne shagird ke padhne ko jaaiz kaha hai aur ba’z ne ustaad ke saamne padhne ki daleel Zimaam bin Tha’labah ki Hadees se li hai. Us ne Nabi-e-Kareem Sallallahu Alaihi Wasallam se arz kiya tha ke kya Allah ne Aap ko yeh hukm farmaaya hai ke hum log Namaz padha karen. Aap Sallallahu Alaihi Wasallam ne farmaaya haan. To yeh (goya) Nabi-e-Kareem Sallallahu Alaihi Wasallam ke saamne padhna hi thehra. Zimaam ne phir jaa kar apni qaum se yeh bayan kiya to unhon ne us ko jaaiz rakha. Aur Imam Malik ne dastaweez se daleel li jo qaum ke saamne padh kar sunaayi jaati hai. Woh kehte hain ke hum ko falaan shakhs ne dastaweez par gawah kiya aur padhne waala padh kar ustaad ko sunaata hai phir kehta hai mujh ko falaan ne padhaaya.

Hum se Muhammed bin Salaam ne bayan kiya, kaha hum se Muhammed bin Hasan Waasiti ne bayan kiya, kaha unhon ne ’Awf se, unhon ne Hasan Basri se, unhon ne kaha aalim ke saamne padhne mein koi qabaahat nahi. Aur hum se Ubaidullah bin Musa ne bayan kiya, unhon ne Sufyan Thawri se suna, woh kehte the jab koi shakhs Muhaddis ko Hadees padh kar sunaaye to kuch qabaahat nahi agar yun kahe ke us ne mujh se bayan kiya. Aur main ne Abu ’Aasim se suna, woh Imam Malik aur Sufyan Thawri ka qaul bayan karte the ke aalim ko padh kar sunaana aur aalim ka shaagirdon ke saamne padhna dono barabar hain.

Hum se Abdullah bin Yousuf ne bayan kiya, kaha hum se Laith ne bayan kiya, unhon ne Sa’eed Maqburi se, unhon ne Shareek bin Abdullah bin Abi Namir se, unhon ne Anas bin Malik se suna ke ek baar hum Masjid mein Nabi Kareem Sallallahu Alaihi Wasallam ke saath baithe huwe the, itne mein ek shakhs oont par sawaar ho kar aaya aur oont ko Masjid mein bitha kar baandh diya. Phir poochne laga (bhaaiyo) tum logon mein Muhammed (Sallallahu Alaihi Wasallam) kaun se hain. Nabi Kareem Sallallahu Alaihi Wasallam us waqt logon mein takya lagaaye baithe huwe the. hum ne kaha (Hazrat) Muhammed (Sallallahu Alaihi Wasallam) yeh sufaid rang waale buzurg hain jo takya lagaaye huwe tashreef farmaa hain. Tab woh Aap se mukhatab huwa ke aye Abdul Muttalib ke farzand! Aap Sallallahu Alaihi Wasallam ne farmaaya. Kaho main aap ki baat sun raha hun. Woh bola main Aap Sallallahu Alaihi Wasallam se kuch deeni baatein daryaaft karna chaahta hun aur zara sakhti se bhi poochunga to Aap apne dil mein bura na maaniyega. Aap Sallallahu Alaihi Wasallam ne farmaaya nahi jo tumhaara dil chaahe poocho. Tab us ne kaha ke main Aap ko Aap ke Rabb aur agle logon ke Rabb Tabaraka-wa-Ta’ala ki qasam de kar poochta hun kya Aap ko Allah ne duniya ke sab logon ki taraf Rasool bana kar bheja hai. Aap Sallallahu Alaihi Wasallam ne farmaaya haan ya mere Allah! Phir us ne kaha main Aap Sallallahu Alaihi Wasallam ko Allah ki qasam deta hun kya Allah ne Aap Sallallahu Alaihi Wasallam ko raat din mein paanch namazain padhne ka hukm farmaaya hai. Aap Sallallahu Alaihi Wasallam ne farmaaya haan ya mere Allah! Phir kehne laga main Aap ko Allah ki qasam de kar poochta hun ke kya Allah ne Aap ko yeh hukm diya hai ke saal bhar mein is maheena Ramadhan ke roze rakho. Aap Sallallahu Alaihi Wasallam ne farmaaya haan ya mere Allah! Phir kehne laga main Aap Sallallahu Alaihi Wasallam ko Allah ki qasam de kar poochta hun ke kya Allah ne Aap ko yeh hukm diya hai ke Aap hum mein se jo maaldaar log hain un se Zakat wusool kar ke hamaare mohtaajon mein baant diya karen. Nabi Kareem Sallallahu Alaihi Wasallam ne farmaaya haan ya mere Allah! Tab woh shakhs kehne laga jo hukm Aap Sallallahu Alaihi Wasallam Allah ke paas se laaye hain, main un par imaan laaya aur main apni qaum ke logon ka jo yahan nahi aaye hain bheja huwa (tehqeeq-e-haal ke liye) aaya hun. Mera naam Zimaam bin Tha’labah hai, main bani Sa’d bin Bakr ke khaandaan se hun. Is Hadees ko (Laith ki tarah) Musa aur ’Ali bin Abdul Hameed ne Sulaiman se riwayat kiya, unhon ne saabit se, unhon ne Anas se, unhon ne yahi mazmoon Nabi Kareem Sallallahu Alaihi Wasallam se naql kiya hai.

Hum se Musa bin Ismail ne bayan kiya, kaha hum se Sulaiman bin Mugheerah ne bayan kiya, kaha hum se saabit ne Anas se naql kiya, unhon ne farmaaya ke hum ko Quran-e-Kareem mein Rasoolullah Sallallahu Alaihi Wasallam se sawaalaat karne se mana kar diya gaya tha aur hum ko isi liye yeh baat pasand thi ke koi hoshiyaar dehaati aaye aur Aap Sallallahu Alaihi Wasallam se deeni umoor poochey aur hum sunein. Chunanche ek dafa ek dehaati aaya aur us ne kaha ke (aye Muhammed Sallallahu Alaihi Wasallam!) Hamaare haan Aap ka muballigh gaya tha. Jis ne hum ko khabar di ke Allah ne Aap ko apna Rasool bana kar bheja hai, aisa Aap ka khayaal hai? Aap Sallallahu Alaihi Wasallam ne farmaaya us ne bilkul sach kaha hai. Phir us ne poocha ke aasman kis ne paida kiye? Aap Sallallahu Alaihi Wasallam ne farmaaya ke Allah Azza wa Jalla ne. Phir us ne poocha ke zameen kis ne paida ki hai aur pahaad kis ne? Aap Sallallahu Alaihi Wasallam ne farmaaya ke Allah Azza wa Jalla ne. Phir us ne poocha ke un mein nafa’ dene waali cheezein kis ne paida ki hain? Aap Sallallahu Alaihi Wasallam ne farmaaya Allah Azza wa Jalla ne. Phir us ne kaha ke pas us zaat ki qasam de kar Aap se poochta hun jis ne zameen-o-aasman aur pahaadon ko paida kiya aur us mein munafe’ paida kiye ke kya Allah Azza wa Jalla ne Aap ko apna Rasool bana kar bheja hai? Aap Sallallahu Alaihi Wasallam ne jawaab diya ke haan bilkul sach hai. (Allah ne mujh ko Rasool banaaya hai) phir us ne kaha ke Aap ke muballigh ne batlaaya hai ke hum par paanch waqt ki namazein aur maal se Zakat ada karna Islaami faraaiz hain, kya yeh durust hai? Aap Sallallahu Alaihi Wasallam ne farmaaya haan us ne bilkul sach kaha hai. Phir us ne kaha Aap ko us zaat ki qasam de kar poochta hun jis ne Aap Sallallahu Alaihi Wasallam ko Rasool banaaya hai kya Allah paak hi ne Aap ko in cheezon ka hukm farmaaya hai. Aap Sallallahu Alaihi Wasallam ne farmaaya haan bilkul durust hai. Phir woh bola aap ke qaasid ka khayaal hai ke hum mein se jo taaqat rakhta ho us par Baitullah ka Hajj farz hai. Aap Sallallahu Alaihi Wasallam ne farmaaya haan woh sachcha hai. Phir woh bola main Aap Sallallahu Alaihi Wasallam ko us zaat ki qasam de kar poochta hun jis ne Aap ko Rasool bana kar bheja ke kya Allah hi ne Aap Sallallahu Alaihi Wasallam ko yeh hukm farmaaya hai? Aap ne jawaab diya ke haan. Phir woh kehne laga ke qasam hai us zaat ki jis ne Aap ko haq ke saath mab’oos farmaaya main in baaton par kuch ziyada karunga na kam karunga. (Balki in hi ke mutabiq apni zindagi guzaarunga) Aap Sallallahu Alaihi Wasallam ne farmaaya agar is ne apni baat ko sach kar dikhaaya to woh zaroor zaroor jannat mein daakhil ho jaayega. (Note: San’aani ne kaha yeh Hadees is maqam par usi ek nuskha-e-Bukhari mein hai jo Firabri par padha gaya aur kisi nuskha mein nahi hai).