To amal main imaan, Wuzu, Namaz, Zakat, Hajj, Roza aur saare ahkaam aa gaye aur (Surah Bani Israael mein) Allah ne farmaaya aye Paighambar! Keh dijiye ke har koi apne tareeq yani apni niyyat par amal karta hai aur (isi wajah se) aadmi agar sawab ki niyyat se Allah ka hukm samajh kar apne ghar waalon par kharch kar de to us mein bhi us ko sadqa ka sawab milta hai aur jab Makkah fatah ho gaya to Nabi Kareem Sallallahu Alaihi Wasallam ne farmaaya tha ke ab hijrat ka silsila khatm ho gaya lekin Jihaad aur niyyat ka silsila baaqi hai.

Hum se Abdullah bin Maslamah ne bayan kiya, kaha hum ko Imam Maalik Rahimahullah ne khabar di, unhon ne Yahya bin Sa’eed se, unhon ne Muhammed bin Ibrahim se, unhon ne Alqamah bin Waqqaas se, unhon ne Umar Radhiallahu Anhu se ke Nabi Kareem Sallallahu Alaihi Wasallam ne farmaaya amal niyyat hi se sahih hote hain (ya niyyat hi ke mutabiq un ka badla milta hai) aur har aadmi ko wahi milega jo niyyat karega. Pas jo koi Allah aur us ke Rasool ki raza ke liye hijrat kare us ki hijrat Allah aur us ke Rasool ki taraf hogi aur jo koi duniya kamaane ke liye ya kisi aurat se shaadi karne ke liye Hijrat karega to us ki Hijrat un hi kaamon ke liye hogi.

Hum se Hajjaaj bin Minhaal ne bayan kiya, woh kehte hain ke hum se Sho’bah ne bayan kiya, woh kehte hain mujh ko ’Adi bin Saabit ne khabar di, unhon ne Abdullah bin Yazeed se suna, unhon ne Abdullah bin Mas’ood se naql kiya, unhon ne Nabi Kareem Sallallahu Alaihi Wasallam se ke Aap Sallallahu Alaihi Wasallam ne farmaaya jab aadmi sawab ki niyyat se apne ahl-o-iyaal par kharch kare pas woh bhi us ke liye sadqa hai.

Hum se Hakam bin Nafi’ ne bayan kiya, kaha hum ko Sho’aib ne Zohri se khabar di, unhon ne kaha ke mujh se Amir bin Sa’d ne Sa`d bin Abi Waqqas se bayan kiya, unhon ne un ko khabar di ke Nabi Kareem Sallallahu Alaihi Wasallam ne farmaaya be-shak tu jo kuch kharch kare aur us se teri niyyat Allah ki raza haasil karni ho to tujh ko us ka sawab milega. Yahan tak ke us par bhi jo tu apni biwi ke munh mein daale.