Aur Allah ne (Surah At-Taubah mein) farmaaya jab woh Allah aur us ke Rasool ki khairkhwaahi mein rahen.

Hum se Musaddad ne bayan kiya, unhon ne kaha hum se Yahya bin Sa’eed bin Qattaan ne bayan kiya, unhon ne Ismail se, unhon ne kaha mujh se Qais bin Abi Haazim ne bayan kiya, unhon ne Jareer bin Abdullah Bajali Radhiallahu Anhu se suna, unhon ne kaha Nabi Kareem Sallallahu Alaihi Wasallam se main ne Namaz qaayim karne aur Zakat ada karne aur har musalmaan ki khairkhwaahi karne par Bai’at ki.

Hum se Abu No’maan ne bayan kiya, kaha hum se Abu ’Awaanah ne bayan kiya, unhon ne Ziyaad se, unhon ne ’ilaaqah se, kaha main ne Jareer bin Abdullah se suna jis din Mughira bin Sho’bah (haakim-e-Kufah) ka inteqaal huwa to woh khutbah ke liye khade huwe aur Allah ki ta’reef aur khoobi bayan ki aur kaha tum ko akele Allah ka darr rakhna chaahiye us ka koi shareek nahi aur tahammul aur itminaan se rehna chaahiye us waqt tak ke koi doosra haakim tumhaare upar aaye aur woh abhi aane waala hai. Phir farmaaya ke apne marne waale haakim ke liye dua-e-maghfirat karo kiunki woh (Mughira) bhi Mu’aafi ko pasand karta tha phir kaha ke is ke baad tum ko ma’loom hona chaahiye ke main ek dafa Nabi Kareem Sallallahu Alaihi Wasallam ke paas aaya aur main ne arz kiya ke main Aap se Islam par Bai’at karta hun Aap Sallallahu Alaihi Wasallam ne mujh se har musalmaan ki khairkhwaahi ke liye shart ki, pas main ne us shart par Aap se Bai’at kar li (pas) is masjid ke Rabb ki qasam ke main tumhaara khairkhwaah hun phir istighfaar kiya aur mimbar se utar aaye.