Hum se Abdullah bin Maslamah Qanabi ne byaan kiya , unhon ne Imam Malik bin Anas se byaan kiya , unhon ne Ayyub bin Abi Tamimah Sakhtiyani se , unhon ne Muhammad bin Sireen se , unhon ne Abu Hurayrah razi Allahu anhu se ke Rasool Allah salla Allahu alaihi wasallam ne (Zuhr ki namaaz mein) do rakat parh kar namaaz khatam kar di to Aap salla Allahu alaihi wasallam se Zul Yadain ne kaha ke ya Rasool Allah! kya namaaz kam ho gayi hai ya Aap bhool gaye hain ? Is par Aap salla Allahu alaihi wasallam ne (aur logon ki taraf dekh kar) poocha kya Zul Yadain sahi kehte hain ? Logon ne kaha ke haan! Phir Aap salla Allahu alaihi wasallam uthe aur doosri do rakatein bhi parheen . Phir salam phera . Phir takbeer kahi aur sajda kiya pehle ki tarah ya us se kuch lamba sajda .

Hum se Abul Waleed Hisham bin Abdul Malik ne byaan kiya , kaha ke hum se Shubah ne Saad bin Ibrahim se byaan kiya , woh Abu Salamah bin Abdur Rahman se , woh Abu Hurayrah razi Allahu anhu se , Aap ne batlaya ke Nabi Karim salla Allahu alaihi wasallam ne (ek marteba) Zuhr ki sirf do hi rakatein parheen (aur bhool se salam pher diya) phir kaha gaya ke Aap ne sirf do hi rakatein parhi hain . Pas Aap salla Allahu alaihi wasallam ne do rakatein aur parheen phir salam phera . Phir do sajde kiye .