Hum se Qutaybah bin Saeed ne bayan kiya, kaha hum se Jareer bin Abd-ul-Hameed ne bayan kiya, in se Aamash ne, in se Abu Wail ne, in se Amr bin Sharjeel ne bayan kiya, in se Abdullah bin Masood razi Allahu anhu ne bayan kiya ke ek sahab yani khud Aap ne kaha: ya Rasool Allah! Allah ke nazdeek kaun sa gunah sab se bada hai? Nabi Karim salla Allahu alaihi wasallam ne farmaya yeh ke tum Allah ka kisi ko shareek thehrao jabke us ne tumhein paida kiya hai. Poochha: phir kaun sa? Nabi Karim salla Allahu alaihi wasallam ne farmaya ke phir yeh ke tum apne larke ko is dar se maar dalo ke woh tumhare saath khana khaye ga. Poochha: phir kaun sa? Farmaya phir yeh ke tum apne parosi ki biwi se zina karo. Phir Allah Ta'ala ne is ki tasdeeq mein yeh aayat nazil ki «wal-lazheena laa yad-oona maal-laahi ilaahan aakhara wa laa yaqtuloonan-nafsal-latee harramallaahu illaa bil-haqqi wa laa yaznoona wa may-yaf-al zhaalika yalqa asaaman yudhaa-af lahul-azhaabu» ”aur woh log jo Allah ke saath kisi doosre mabood ko nahi pukarte aur na kisi aise insan ki nahaq jaan laite hain jise Allah ne haram kiya aur na zina karte hain aur jo koi aisa kare ga.“ Aakhir aayat tak.

Hum se Ali bin Jad ne bayan kiya, kaha hum se Ishaq bin Saeed bin Amr bin Saad bin al-Aas razi Allahu anhuma ne bayan kiya, in se in ke walid ne aur in se Ibn Umar razi Allahu anhuma ne bayan kiya ke Rasool Allah salla Allahu alaihi wasallam ne farmaya ”Momin is waqt tak apne deen ke baare mein barabar kushada rehta hai (usay har waqt maghfirat ki umeed rehti hai) jab tak nahaq khoon na kare jahan nahaq kiya to maghfirat ka darwaza tang ho jata hai.“

Mujh se Ahmad bin Yaqoob ne bayan kiya, unhon ne kaha hum se Ishaq ne bayan kiya, unhon ne kaha main ne apne walid se suna, woh Abdullah bin Umar razi Allahu anhuma se bayan karte thay ke halakat ka bhanwar jis mein girne ke baad phir nikalne ki umeed nahi hai woh nahaq khoon karna hai, jis ko Allah Ta'ala ne haram kiya hai.

Hum se Ubaidullah bin Musa ne bayan kiya, in se Aamash ne, in se Abu Wail ne aur in se Abdullah razi Allahu anhu ne bayan kiya ke Nabi Karim salla Allahu alaihi wasallam ne farmaya ”sab se pehle (Qayamat ke din) logon ke darmiyan khoon-kharabe ke faisla-jaat kiye jayein ge.“

Hum se Abdan ne bayan kiya, kaha hum se Abdullah bin Mubarak ne bayan kiya, kaha hum ko Yunus ne khabar di, in se Zuhri ne, kaha mujh se Ata bin Yazid ne bayan kiya, in se Ubaidullah bin Adi ne bayan kiya, in se Bani Zhahra ke haleef Miqdad bin Amr al-Kindi razi Allahu anhu ne bayan kiya woh Badr ki larayi mein Nabi Karim salla Allahu alaihi wasallam ke saath shareek thay ke Aap ne poochha: ya Rasool Allah! Agar jang ke dauran meri kisi kafir se mud-bheir ho jaye aur hum ek doosre ko qatl karne ki koshish karne lagein phir woh mere hath par apni talwar maar kar usay kaat de aur is ke baad kisi darakht ki aar le kar kahe ke main Allah par iman laya to kiya main usay is ke is iqrar ke baad qatl kar sakta hoon? Nabi Karim salla Allahu alaihi wasallam ne farmaya ke usay qatl na karna. Unhon ne arz kiya: ya Rasool Allah! Is ne to mera hath bhi kaat dala aur yeh iqrar is waqt kiya jab usay yaqeen ho gaya ke ab main usay qatl hi kar doon ga? Nabi Karim salla Allahu alaihi wasallam ne farmaya ke usay qatl na karna kyunke agar tum ne usay Islam laane ke baad qatl kar diya to woh tumhare martaba mein ho ga jo tumhara usay qatl karne se pehle tha yani masoom maloom-ud-dam aur tum is ke martaba mein ho ge jo is ka is kalma ke iqrar se pehle tha jo is ne ab kiya hai (yani zhahlim mubah-ud-dam).

Aur Habeeb bin Abi Amrah ne bayan kiya, in se Saeed bin Jubayr ne aur in se Ibn Abbas razi Allahu anhuma ne bayan kiya ke Nabi Karim salla Allahu alaihi wasallam ne Miqdad razi Allahu anhu se farmaya tha ke agar koi Musalman kafiron ke saath rehta ho phir woh dar ke mare apna iman chhupata ho, agar woh apna iman zhahir kar de aur tu is ko maar daale yeh kyun kar durust ho ga khud tum bhi to Makkah mein pehle apna iman chhupate thay.