Ibn Abbas razi Allahu anhuma ne kaha ke «man ah-yaahaa» ka maani yeh hai ke jis ne nahaq khoon karna haram rakkha goya us ne is amal se tamam logon ko zinda rakkha.

Hum se Qubaysah ne bayan kiya, kaha hum se Sufyan bin Uyaynah ne bayan kiya, in se Aamash ne, in se Abdullah bin Murrah ne, in se Masrooq ne aur in se Abdullah bin Masood razi Allahu anhu ne ke Nabi Karim salla Allahu alaihi wasallam ne farmaya ”jo jaan nahaq qatl ki jaye is ke (gunah ka) ek hissa Adam alaihissalam ke pehle bete (Qabeel par) parta hai.“

Hum se Abu al-Waleed ne bayan kiya, unhon ne kaha hum se Shubah ne bayan kiya, unhein Waqid bin Abdullah ne khabar di, unhon ne kaha mujhko mere walid ne aur unhon ne Abdullah bin Umar razi Allahu anhuma se bayan kiya ke Nabi Karim salla Allahu alaihi wasallam ne farmaya ”mere baad kafir na ban jaana ke tum mein se baaz baaz ki gardan maarne lag jao.“

Hum se Muhammad bin Bashar ne bayan kiya, unhon ne kaha hum se Ghundar ne bayan kiya, unhon ne kaha hum se Shubah ne bayan kiya, in se Ali bin Mudrik ne bayan kiya, unhon ne kaha ke main ne Abu Zurah bin Amr bin Jareer se suna, in se Jareer bin Abdullah Bajali razi Allahu anhu ne bayan kiya ke Nabi Karim salla Allahu alaihi wasallam ne Hajjat-ul-Wada ke din farmaya ”logon ko khamosh kara do, (phir farmaya) tum mere baad kafir na ban jaana ke tum mein se baaz baaz ki gardan maarne lage.“ Is hadees ki riwayat Abu Bakr aur Ibn Abbas razi Allahu anhum ne Nabi Karim salla Allahu alaihi wasallam se ki hai.

Mujh se Muhammad bin Bashar ne bayan kiya, unhon ne kaha, hamase Muhammad bin Jafar ne bayan kiya, unhon ne kaha hum se Shubah ne bayan kiya, in se Firas ne, in se Shabi ne aur in se Abdullah bin Umar razi Allahu anhuma ne bayan kiya ke Nabi Karim salla Allahu alaihi wasallam ne farmaya ”kabeera gunah Allah ke saath kisi ko shareek thehrana, walidain ki nafarmani karna ya farmaya ke nahaq doosre ka maal lene ke liye jhooti qasam khana hain.“ Shak Shubah ko tha aur Maaz ne bayan kiya, in se Shubah ne bayan kiya, kaha kabeera gunah Allah ke saath kisi ko shareek thehrana, kisi ka maal nahaq lene ke liye jhooti qasam khana aur walidain ki nafarmani karna ya kaha ke kisi ki jaan lena.

Hum se Ishaq bin Mansoor ne bayan kiya, unhon ne kaha hum se Abd-ul-Samad ne bayan kiya, unhon ne kaha hum se Shubah ne bayan kiya, unhon ne kaha hum se Ubaidullah bin Abi Bakr razi Allahu anhuma ne bayan kiya, unhon ne Anas bin Malik razi Allahu anhu se suna ke Nabi Karim salla Allahu alaihi wasallam ne farmaya ”gunah e kabeera“ aur hamase Amr ne bayan kiya, kaha hum se Shubah ne bayan kiya, in se Abu Bakr ne aur in se Anas bin Malik razi Allahu anhu ne bayan kiya ke Nabi Karim salla Allahu alaihi wasallam ne farmaya ”sab se bade gunah Allah ke saath kisi ko shareek thehrana, kisi ki nahaq jaan lena, walidain ki nafarmani karna aur jhoot bolna hain ya farmaya ke jhooti gawahi dena.

Hum se Amr bin Zhuraara ne bayan kiya, kaha hum se Hushaim ne bayan kiya, kaha hum se Haseen ne bayan kiya, kaha hamase Abu Zhabyan ne bayan kiya, kaha ke main ne Usamah bin Zayd bin Harisa razi Allahu anhuma se suna, unhon ne bayan karte huay kaha ke hamain Rasool Allah salla Allahu alaihi wasallam ne qabila Juhaina ki ek shakh ki taraf (muhim par) bheija. Bayan kiya ke phir hum ne in logon ko subah ke waqt ja liya aur unhein shikast de di. Rawi ne bayan kiya ke main aur qabila Ansar ke ek sahab qabila Juhaina ke ek shakhs tak pahunche aur jab hum ne usay gher liya to is ne kaha «laa ilaaha illallaahu» Ansari sahabi ne to (yeh sunte hi) hath rok liya lekin main ne apne neizey se usay qatl kar diya. Rawi ne bayan kiya ke jab hum wapas aaye to is waqia ki khabar Nabi Karim salla Allahu alaihi wasallam ko mili. Bayan kiya ke phir Nabi Karim salla Allahu alaihi wasallam ne mujh se farmaya ”Usamah! kiya tum ne kalma «laa ilaaha illallaahu» ka iqrar karne ke baad usay qatl kar dala.“ Main ne arz kiya: ya Rasool Allah! Is ne sirf jaan bachane ke liye is ka iqrar kiya tha. Nabi Karim salla Allahu alaihi wasallam ne phir farmaya ”tum ne usay «laa ilaaha illallaahu» ka iqrar karne ke baad qatl kar dala.“ Bayan kiya ke Nabi Karim is jumla ko itni dafa dohrate rahe ke mere dil mein yeh khwahish paida ho gayi ke kaash main is se pehle Musalman na hua hota.

Hum se Abdullah bin Yusuf ne bayan kiya, kaha hum se Layth bin Saad ne bayan kiya, kaha hum se Yazid ne bayan kiya, in se Abu al-Khair ne, in se Sanabihi ne aur in se Ubadah bin Samit razi Allahu anhu ne bayan kiya ke main in naqeebon mein se tha jinon ne (Mina mein Lailat-ul-Aqabah ke mauqa par) Rasool Allah salla Allahu alaihi wasallam se bai-at ki thi. Hum ne is ki bai-at (ahad) ki ku ke hum Allah ke saath kisi ko shareek nahi thehrayein ge, hum chori nahi karein ge, zina nahi karein ge, kisi ki nahaq jaan nahi lein ge jo Allah ne haram ki hai, hum loot-maar nahi karein ge aur Aap salla Allahu alaihi wasallam ki nafarmani nahi karein ge aur yeh ke agar hum ne is par amal kiya to hamain jannat mile gi aur agar hum ne in mein se kisi tarah ka gunah kiya to is ka faisla Allah Tabarak wa Ta'ala ke yahan ho ga.

Hum se Musa bin Ismail ne bayan kiya, unhon ne kaha hum se Juwayriyah ne bayan kiya, in se Nafi ne bayan kiya aur in se Abdullah razi Allahu anhu ne ke Nabi Karim salla Allahu alaihi wasallam ne farmaya ”jis ne ham par hathyar uthaya woh ham mein se nahi hai.“ Abu Musa razi Allahu anhu ne bhi Nabi Karim salla Allahu alaihi wasallam se yeh hadees riwayat ki hai.

Hum se Abd-ul-Rahman bin al-Mubarak ne bayan kiya, kaha hum se Hammad bin Zayd ne, kaha hamase Ayub aur Yunus ne, in se Imam Hasan Basri ne, in se Ahnaf bin Qays ne ke main in sahab (Ali bin Abi Talib razi Allahu anhu) ki Jang e Jamal mein madad ke liye tayyar tha ke Abu Bakrah razi Allahu anhu se meri mulaqat hui. Unhon ne poochha, kahan ka irada hai? Main ne kaha ke in sahab ki madad ke liye jaana chahta hoon. Unhon ne farmaya ke wapas chale jao main ne Rasool Allah salla Allahu alaihi wasallam se suna hai Nabi Karim salla Allahu alaihi wasallam farmate thay ke jab do Musalman talwar khainch kar ek doosre se bharr jayein to qatil aur maqtul donon dozakh mein jaate hain. Main ne arz kiya: ya Rasool Allah! Ek to qatil thu lekin maqtul ko saza kyun mile gi? Nabi Karim salla Allahu alaihi wasallam ne farmaya ke woh bhi apne qatil ke qatl par aamada thu.