Hum se Muslim bin Ibrahim ne bayan kiya , kaha hum se Hisham bin Abdullah Dastawai ne Qatada Ibn Diama ke wastay se , unhon ne Anas raziyallahu anhu se ke Nabi Karim salla Allahu alaihi wa sallam ne farmaya ke jab tum mein se koi namaz mein hota hai to woh apne Rab se sargoshi karta rehta hai is liye apni dahni janib na thookna chahiye lekin bayen paon ke neechay thook sakta hai .

Hum se Hafs bin Umar ne bayan kiya , kaha hum se Yazid bin Ibrahim ne , unhon ne kaha ke hum se Qatada ne Anas bin Malik raziyallahu anhu se bayan kiya , aap Nabi Karim salla Allahu alaihi wa sallam se riwayat karte thay ke Nabi Karim salla Allahu alaihi wa sallam ne farmaya ke sajda karne mein itidal rakho sidhi tarah par karo aur koi shakhs tum mein se apne bazuon ko kutte ki tarah na phelaaye . Jab kisi ko thookna hi ho to samne ya dahni taraf na thooke , kyunke woh namaz mein apne Rab se posheeda batein karta rehta hai aur Saeed ne Qatada raziyallahu anhu se riwayat kar ke bayan kiya hai ke aage ya samne na thooke albatta bayen taraf paon ke neechay thook sakta hai aur Shoba ne kaha ke apne samne aur dayen janib na thooke , balkay bayen taraf ya paon ke neechay thook sakta hai . Aur Humaid ne Anas bin Malik raziyallahu anhu se woh Nabi Karim salla Allahu alaihi wa sallam se riwayat karte hain ke qibla ki taraf na thooke aur na dayen taraf albatta bayen taraf ya paon ke neechay thook sakta hai .