Ibn Abbas razi Allahu anhuma ne kaha «wa taqatta-at bihim-ul-asbaabu» ka matlab yeh hai ke duniya ke rishte naate jo yahan ek doosre se thay woh khatm ho jayein ge .

Hum se Ismail bin Abaan ne bayan kiya , kaha hum se Esa bin Yunus ne bayan kiya , kaha hum se Ibn Aun ne bayan kiya , in se Nafi ne aur in se Ibn Umar razi Allahu anhuma ne ke Nabi Karim salla Allahu alaihi wasallam ne «yauma yaqoomun-naasu li-rabbil-aalameena» ki tafseer mein farmaya ke tum mein se har koi saare jahanon ke Parvardigar ke aage khara ho ga is haal mein ke is ka pasina kaanon ki lau tak pahuncha hua ho ga .

Mujh se Abd-ul-Aziz bin Abdullah Owaysi ne bayan kiya , unhon ne kaha ke mujh se Sulayman bin Bilal ne bayan kiya , in se Sawr bin Zaid ne bayan kiya , in se Abu al-Ghais ne aur unhon ne Abu Hurairah razi Allahu anhu se suna ke Rasool Allah salla Allahu alaihi wasallam ne farmaya ”Qayamat ke din log pasine mein sharabor ho jayein ge aur halat yeh ho jaye gi ke tum mein se har kisi ka pasina zameen par sattar hath tak phail jaye ga aur munh tak pahunch kar kaanon ko chhoone lage ga .“