Hum se Adam ne bayan kiya, kaha hum se Shubah ne, kaha hum se Qatadah ne, kaha ke main ne Abu Usman Nahdi se suna ke hamare paas Umar razi Allahu anhu ka maktoob (khat) aaya hum is waqt Utbah bin Farqad razi Allahu anhu ke saath Azar Baijaan mein thay (is mein likha tha) ke Rasool Allah salla Allahu alaihi wasallam ne resham ke istemal se (mardon ko) mana kiya hai siwa itne ke aur Nabi Karim salla Allahu alaihi wasallam ne angoothay ke qareeb ki apni donon ungliyon ke ishare se is ki miqdar batayi. Abu Usman Nahdi ne bayan kiya ke hamari samajh mein Nabi Karim salla Allahu alaihi wasallam ki murad is se (kapre waghaira resham ke) phool botay banane se thi.

Hum se Ahmad bin Yunus ne bayan kiya, kaha hum se Zuhayr ne bayan kiya, in se Aasim ne bayan kiya, in se Abu Usman ne bayan kiya ke hamain Umar razi Allahu anhu ne likha is waqt hum Azar Baijaan mein thay ke Nabi Karim salla Allahu alaihi wasallam ne resham pehnne se mana farmaya tha siwa itne ke aur is ki wazahat Nabi Karim salla Allahu alaihi wasallam ne do ungliyon ke ishare se ki thi. Zuhayr (rawi e hadees) ne beech ki aur shahadat ki ungliyaan utha kar bataya.

Hum se Musaddad ne bayan kiya, unhon ne kaha hum se Yahya ne bayan kiya, unhon ne kaha hum se Taymi ne bayan kiya aur in se Abu Usman ne bayan kiya ke hum Utbah razi Allahu anhu ke saath thay. Umar razi Allahu anhu ne unhein likha ke Nabi Karim salla Allahu alaihi wasallam ne farmaya ”duniya mein resham jo shakhs bhi pehne ga usay aakhirat mein nahi pehnaya jaye ga.“

Hum se Hasan bin Umar ne bayan kiya, kaha hum se Mamar ne, kaha hum se hamare walid ne bayan kiya, in se Abu Usman ne bayan kiya aur Abu Usman ne apni do ungliyon, shahadat aur darmiyani ungliyon se isharah kiya.

Hum se Sulayman bin Harb ne bayan kiya, kaha hum se Shubah ne bayan kiya, in se Hakam ne, in se Ibn Abi Layla ne bayan kiya ke Huzayfah razi Allahu anhu Madain mein thay. Unhon ne pani maanga. Ek dehati chaandi ke bartan mein pani laya. Unhon ne usay phenk diya aur kaha ke main ne sirf usay is liye phenka hai ke main is shakhs ko mana kar chuka hoon (ke chaandi ke bartan mein mujhe khana aur pani na diya karo) lekin woh nahi mana. Rasool Allah salla Allahu alaihi wasallam ne farmaya hai ke sona, chaandi, resham aur deeba in (kuffar) ke liye duniya mein hai aur tumhare (Musalmanon) ke liye aakhirat mein.

Hum se Adam ne bayan kiya, kaha hum se Shubah ne bayan kiya, kaha hum se Abdul Aziz bin Suhayb ne bayan kiya, kaha ke main ne Anas bin Malik razi Allahu anhu se suna, Shubah ne bayan kiya ke is par main ne poochha kya yeh riwayat Nabi Karim salla Allahu alaihi wasallam se hai? Abdul Aziz ne bayan kiya ke qat'an Nabi Karim salla Allahu alaihi wasallam se marwi hai. Aap salla Allahu alaihi wasallam ne farmaya ke jo mard reshmi libas duniya mein pehne ga woh aakhirat mein usay hargiz nahi pehan sake ga.

Hum se Sulayman bin Harb ne bayan kiya, kaha hum se Hammad bin Zayd ne bayan kiya, in se Sabit ne bayan kiya ke main ne Ibn Zubayr razi Allahu anhu se suna, unhon ne khutba dete huay kaha ke Muhammad salla Allahu alaihi wasallam ne farmaya hai ke jis mard ne duniya mein resham pehna woh aakhirat mein usay nahi pehan sake ga.

Hum se Ali bin Jadd ne bayan kiya, kaha hum ko Shubah ne khabar di, unhein Abu Zhahban Khaleefa bin Kabb ne, kaha ke main ne Abdullah bin Zubayr razi Allahu anhuma se suna, kaha ke main ne Umar razi Allahu anhu se suna, unhon ne bayan kiya ke Nabi Karim salla Allahu alaihi wasallam ne farmaya ke jis mard ne duniya mein resham pehna woh usay aakhirat mein nahi pehan sake ga. Aur hum se Abu Mamar ne bayan kiya, in se Abd-ul-Waris ne bayan kiya, in se Yazid ne ke Muaz ne bayan kiya ke mujhe Umm Amr bint Abdullah ne khabar di, unhon ne Abdullah bin Zubayr razi Allahu anhuma se suna, unhon ne Umar razi Allahu anhu se suna aur unhon ne Nabi Karim salla Allahu alaihi wasallam se suna.

Mujh se Muhammad bin Bashar ne bayan kiya, unhon ne kaha hum se Usman bin Amr ne bayan kiya, unhon ne kaha hum se Ali Mubarak ne bayan kiya, unhon ne kaha hum se Yahya bin Abi Kaseer ne bayan kiya, in se Imran bin Hittan ne bayan kiya ke main ne Aisha razi Allahu anha se resham ke mutalliq poochha to unhon ne batlaya ke Abdullah bin Abbas razi Allahu anhuma ke paas jao aur in se poochho. Bayan kiya ke main ne Abdullah bin Umar razi Allahu anhuma se poochha to unhon ne bayan kiya ke mujhe Abu Hafs yani Umar bin Khattab razi Allahu anhu ne khabar di ke Rasool Allah salla Allahu alaihi wasallam ne farmaya ke duniya mein resham to wahi mard pehne ga jis ka aakhirat mein koi hissa na ho. Main ne is par kaha ke sach kaha aur Abu Hafs Rasool Allah salla Allahu alaihi wasallam ki taraf koi jhooti baat nisbat nahi kar sakte aur Abdullah bin Rajaa ne bayan kiya ke hum se Jareer ne bayan kiya, in se Yahya ne aur in se Imran ne aur poori hadees bayan ki.