Hum se Abu al-Waleed ne bayan kiya, kaha hum se Shubah ne, in se Hisham bin Zayd ne, kaha ke main Anas razi Allahu anhu ke saath Hakam bin Ayub ke yahan gaya, unhon ne wahan chand larkon ko ya nau-jawanon ko dekha ke ek murghi ko baandh kar is par teer ka nishana laga rahe hain to unhon ne kaha ke Nabi kareem salla Allahu alaihi wasallam ne zinda janwar ko baandh kar maarne se mana farmaya hai.

Hum se Ahmad bin Yaqoob ne bayan kiya, unhon ne kaha hum ko Ishaq bin Saeed bin Amr ne khabar di, unhon ne apne walid se suna ke woh Abdullah bin Umar razi Allahu anhuma se bayan karte thay ke woh Yahya bin Saeed ke yahan tashreef le gaye. Yahya ki aulad mein ek bacha ek murghi baandh kar is par teer ka nishana laga raha tha۔ Abdullah bin Umar razi Allahu anhuma murghi ke paas gaye aur usay khol liya phir murghi ko aur bache ko apne saath laye aur Yahya se kaha ke apne bacha ko mana kar do ke is janwar ko baandh kar na maare kyunke main ne Nabi kareem salla Allahu alaihi wasallam se suna hai Aap ne kisi jangli janwar ya kisi bhi janwar ko baandh kar jaan se maarne se mana farmaya hai.

Hum se Abu al-Nuayman ne bayan kiya, kaha hum se Abu Awanah ne, in se Abu Bishr ne, in se Saeed bin Jubayr ne ke main Ibn Umar razi Allahu anhuma ke saath thu woh chand jawanon ya (yeh kaha ke) chand aadmiyon ke paas se guzre jinon ne ek murghi baandh rakkhi ku aur is par teer ka nishana laga rahe thay jab unhon ne Ibn Umar razi Allahu anhuma ko dekha to wahan se bhaag gaye. Ibn Umar razi Allahu anhuma ne kaha yeh kaun kar raha thu? Aaisa karne walon par Nabi kareem salla Allahu alaihi wasallam ne lanat bheji hai. Is ki mutabia-t Sulayman ne Shubah se ki hai.

Hum se Minhal ne bayan kiya, in se Saeed ne aur in se Ibn Umar razi Allahu anhuma ne ke Nabi kareem salla Allahu alaihi wasallam ne aise shakhs par lanat bheji hai jo kisi zinda janwar ke paon ya doosre tukre kaat daale. Aur Adi ne bayan kiya, in se Saeed ne, in se Ibn Abbas razi Allahu anhuma ne Nabi kareem salla Allahu alaihi wasallam se riwayat kiya.

Hum se Hajjaj bin Minhal ne bayan kiya, kaha hum se Shubah ne bayan kiya, kaha ke mujhko Adi bin Sabit ne khabar di, kaha ke main ne Abdullah bin Zayd razi Allahu anhu se suna, unhon ne Nabi kareem salla Allahu alaihi wasallam se ke Nabi kareem salla Allahu alaihi wasallam ne rah-zani karne aur musla karne se mana farmaya hai.