Hum se Musaddad ne byaan kiya , kaha hum se Yahya ne byaan kiya , in se Shubah ne , kaha ke mujh se Hakam ne byaan kiya , in se Ibn Abi Layla ne , in se Ali razi Allahu anhu ne byaan kiya ke Fatima razi Allahu anha Nabi Karim salla Allahu alaihi wasallam ki khidmat mein yeh shikayat karne ke liye hazir huien ke chakki peesne ki wajah se in ke hathon mein kitni takleef hai . Unhein maloom hua thu ke Nabi Karim salla Allahu alaihi wasallam ke paas kuch ghulam aaye hain lekin Nabi Karim salla Allahu alaihi wasallam se in ki mulaqat na ho saki . Is liye Aisha razi Allahu anha se is ka zikr kiya . Jab Aap salla Allahu alaihi wasallam tashreef laye to Aisha razi Allahu anha ne Aap se is ka tazkira kiya . Ali razi Allahu anhu ne byaan kiya ke phir Nabi Karim salla Allahu alaihi wasallam hamare yahan tashreef laye (raat ke waqt) hum is waqt apne bistaron par lait chuke thay hum ne uthna chaha Aap salla Allahu alaihi wasallam ne farmaya ke tum donon jis tarah thay isi tarah raho . Phir Nabi Karim salla Allahu alaihi wasallam mere aur Fatima ke darmiyan baith gaye . Main ne Aap ke qadmon ki thandak apne pait par mehsoos ki . Phir Aap salla Allahu alaihi wasallam ne farmaya , tum donon ne jo cheez mujh se maangi hai , kiya main tumhein is se behtar ek baat na bata doon ? Jab tum (raat ke waqt) apne bistar par lait jao to 33 martaba «subhanallah» , 33 martaba «alhamdulillah» aur 34 martaba «allahu akbar» parh liya karo yeh tumhare liye laundi ghulam se behtar hai .