Hum se Musa bin Ismail ne byaan kiya , kaha hum se Ibrahim bin Saad ne byaan kiya , kaha hum se Ibn Shihab ne byaan kiya , un se Ubaid bin Sabbaq ne aur un se Zayd bin Sabit razi Allahu anhu ne byaan kiya ke Jang e Yamama mein (sahabah ki bahut bari tadaad ke) shaheed ho jaane ke baad Abu Bakr razi Allahu anhu ne mujhe bula bheja . Is waqt Umar razi Allahu anhu mere paas aaye aur unhon ne kaha ke Yamama ki jang mein bahut bari tadaad mein Quran ke qaariyon ki shahadat ho gayi hai aur mujhe darr hai ke isi tarah kuffar ke saath doosri jangon mein bhi qura e Quran bari tadaad mein qatl ho jayein ge aur yun Quran ke jaanne walon ki bahut bari tadaad khatam ho jaye gi . Is liye mera khayal hai ke Aap Quran Majeed ko (ba-qayda kitabi shakal mein) jama karne ka hukm de dein . Main ne Umar razi Allahu anhu se kaha ke Aap ek aisa kaam kis tarah karein ge jo Rasool Allah salla Allahu alaihi wasallam ne (apni zindagi mein) nahi kiya ? Umar razi Allahu anhu ne is ka yeh jawab diya ke Allah ki qasam! Yeh to ek kaar e khair hai . Umar razi Allahu anhu yeh baat mujh se baar baar kehte rahe . Aakhir Allah Ta'ala ne is masle mein mera bhi seena khol diya aur ab meri bhi wahi rai ho gayi jo Umar razi Allahu anhu ki thi . Zayd razi Allahu anhu ne byaan kiya ke Abu Bakr razi Allahu anhu ne kaha Aap (Zayd razi Allahu anhu) jawan aur aqalmand hain , Aap ko muamla mein mut-taham bhi nahi kiya ja sakta aur Aap Rasool Allah salla Allahu alaihi wasallam ki wahi likhte bhi thay , is liye Aap Quran Majeed ko poori talash aur mehnat ke saath ek jagah jama kar dein . Allah ki qasam! Ke agar yeh log mujhe kisi pahar ko bhi is ki jagah se doosri jagah hatane ke liye kehte to mere liye yeh kaam itna mushkil nahi tha jitna ke in ka yeh hukm ke main Quran Majeed ko jama kar doon . Main ne is par kaha ke Aap log ek aise kaam ko karne ki himmat kaise karte hain jo Rasool Allah salla Allahu alaihi wasallam ne khud nahi kiya thu . Abu Bakr razi Allahu anhu ne kaha: Allah ki qasam! Yeh ek amal e khair hai . Abu Bakr razi Allahu anhu yeh jumla barabar dohrate rahe , yahan tak ke Allah Ta'ala ne mera bhi in ki aur Umar razi Allahu anhu ki tarah seena khola diya . Chunanche main ne Quran Majeed (jo mukhtalif cheezon par likha hua maujood thu) ki talash shuru kar di aur Quran Majeed ko khajoor ki chhilli hui shakhon , patle pattharon se , (jin par Quran Majeed likha gaya tha) aur logon ke seenon ki madad se jama karne laga . Surah at-Tauba ki aakhri aayatein mujhe Abu Khuzaymah Ansari razi Allahu anhu ke paas likhi hui milien , yeh chand aayatein maktoob shakal mein in ke siwa aur kisi ke paas nahi thien «laqad ja'akum rasoolum min anfusikum azeezun alayhi ma anittum» se Surah Baraat (Surah Tauba) ke khatma tak . Jama ke baad Quran Majeed ke yeh sahifay Abu Bakr razi Allahu anhu ke paas mahfooz thay . Phir un ki wafat ke baad Umar razi Allahu anhu ne jab tak woh zinda rahe apne saath rakkha phir woh Umm al-Momineen Hafsa bint Umar razi Allahu anha ke paas mahfooz rahe .

Hum se Musa bin Ismail ne byaan kiya , kaha hum se Ibrahim bin Saad Aufi ne byaan kiya , kaha hum se Ibn Shihab ne byaan kiya aur un se Anas bin Malik razi Allahu anhu ne byaan kiya ke Huzayfah bin al-Yaman razi Allahu anhu Ameer al-Momineen Usman razi Allahu anhu ke paas aaye is waqt Usman razi Allahu anhu Armeenia aur Azarbaijan ki fatah ke silsile mein Sham ke ghaziyon ke liye jang ki tayyariyon mein masroof thay , taake woh Ahl e Iraq ko saath le kar jang karein . Huzayfah razi Allahu anhu Quran Majeed ki qirat ke ikhtilaf ki wajah se bahut pareshan thay . Aap ne Usman razi Allahu anhu se kaha ke Ameer al-Momineen is se pehle ke yeh ummat (Ummat e Muslimah) bhi Yahudiyon aur Nasraniyon ki tarah Kitab Allah mein ikhtilaf karne lage , Aap is ki khabar lijiye . Chunanche Usman razi Allahu anhu ne Hafsa razi Allahu anha ke yahan kahlwaya ke sahifay (jinhein Zayd razi Allahu anhu ne Abu Bakr razi Allahu anhu ke hukm se jama kiya tha aur jin par mukammal Quran Majeed likha hua tha) hamain de dein taake hum unhein mus-hafon mein (kitabi shakal mein) naqal karwa lein . Phir asal hum Aap ko lauta dein ge Hafsa razi Allahu anha ne woh sahifay Usman razi Allahu anhu ke paas bhej diye aur Aap ne Zayd bin Sabit , Abdullah bin Zubayr , Saad bin al-Aas , Abdur Rahman bin Haris bin Hisham razi Allahu anhum ko hukm diya ke woh in sahifon ko mus-hafon mein naqal kar lein . Usman razi Allahu anhu ne is jama'at ke teen Qurayshi sahabiyon se kaha ke agar Aap logon ka Quran Majeed ke kisi lafz ke silsile mein Zayd razi Allahu anhu se ikhtilaf ho to usay Quraysh hi ki zaban ke mutabiq likh lein kyunke Quran Majeed bhi Quraysh hi ki zaban mein nazil hua thu . Chunanche in logon ne aisa hi kiya aur jab tamam sahifay mukhtalif nuskhon mein naqal kar liye gaye to Usman razi Allahu anhu ne in sahifon ko wapas lauta diya aur apni sultant ke har ilaqa mein naqal-shuda mus-haf ka ek ek nuskha bhijwa diya aur hukm diya ke is ke siwa koi cheez agar Quran ki taraf mansoob ki jati hai khwah woh kisi sahifa ya mus-haf mein ho to usay jala diya jaye .

Ibn Shihab ne byaan kiya ke mujhe Kharija bin Zayd bin Sabit ne khabar di , unhon ne Zayd bin Sabit se suna , unhon ne byaan kiya ke jab hum (Usman razi Allahu anhu ke zamana mein) mus-haf ki surat mein Quran Majeed ko naqal kar rahe thay , to mujhe Surah al-Ahzab ki ek aayat nahi mili haalan ke main is aayat ko bhi Rasool Allah salla Allahu alaihi wasallam se suna karta tha aur Aap is ki tilawat kiya karte thay , phir hum ne usay talash kiya to woh Khuzaymah bin Sabit Ansari razi Allahu anhu ke paas mili . Woh aayat yeh thi «minal mu'mineena rijaalun sadaqoo ma aahadullaha alayhi» chunanche hum ne is aayat ko Surah al-Ahzab mein laga diya .