Hum se Ismail bin Abdullah ne byaan kiya , unhon ne kaha ke mujh se Ibrahim bin Saad ne byaan kiya , un se Salih bin Kaysan ne , un se Ibn Shihab ne aur un se Sahl bin Saad Saadi razi Allahu anhu ne byaan kiya unhon ne Marwan bin Hakam bin Aas ko masjid mein dekha (byaan kiya ke) phir main un ke paas aaya aur un ke pehlu mein baith gaya , unhon ne mujhe khabar di aur unhein Zayd bin Sabit razi Allahu anhu ne khabar di thi ke Rasool Allah salla Allahu alaihi wasallam ne un se yeh aayat likhwayi «la yastawil qaidoona minal momineena wal mujahidoona fee sabilillahi» ”Musalmanon mein se (ghar) baith rehne wale aur Allah ki raah mein apne maal aur apni jaan se jihad karne wale barabar nahi ho sakte .“ Abhi Aap yeh aayat likhwa hi rahe thay ke Ibn Umm Maktoom razi Allahu anhu aa gaye aur arz kiya: Allah ki qasam! Ya Rasool Allah! Agar main jihad mein shirkat kar sakta to yaqeenan jihad karta . Woh andhe thay . Is ke baad Allah ne apne Rasool par wahi utari . Aap ki raan meri raan par thi (shiddat e wahi ki wajah se) is ka mujh par itna bojh para ke mujhe apni raan ke phat jaane ka andesha ho gaya . Aakhir yeh kaifiyat khatam hui aur Allah Ta'ala ne «ghayru ulid-darari» ke alfaz aur nazil kiye .

Hum se Hafs bin Umar ne byaan kiya , kaha hum se Shubah ne byaan kiya , un se Abu Ishaq ne aur un se Bara bin Azib razi Allahu anhu ne kaha ke jab aayat «la yastawil qaidoona minal momineena» nazil hui to Rasool Allah salla Allahu alaihi wasallam ne Zayd bin Sabit razi Allahu anhu ko kitabat ke liye bulaya aur unhon ne woh aayat likh di . Phir Abdullah bin Umm Maktoom razi Allahu anhu hazir huay aur apne nabina hone ka uzr pesh kiya , to Allah Ta'ala ne «ghayru ulid-darari» ke alfaz aur nazil kiye .

Hum se Muhammad bin Yusuf ne byaan kiya , un se Israeel ne byaan kiya , un se Abu Ishaq ne byaan kiya aur un se Bara bin Azib razi Allahu anhu ne byaan kiya ke jab aayat «la yastawil qaidoona minal momineena» nazil hui to Nabi Karim salla Allahu alaihi wasallam ne farmaya ke falan (yani Zayd bin Sabit razi Allahu anhu) ko bulao . Woh apne saath dawat aur takhti ya shana ki haddi le kar hazir huay to Nabi Karim salla Allahu alaihi wasallam ne farmaya likho «la yastawil qaidoona minal momineena wal mujahidoona fee sabilillahi» . Ibn Umm Maktoom razi Allahu anhu ne jo Nabi Karim salla Allahu alaihi wasallam ke peeche maujood thay , arz kiya: ya Rasool Allah! Main nabina hoon . Chunanche wahin is tarah aayat nazil hui «la yastawil qaidoona minal momineena ghayru ulid-darari wal mujahidoona fee sabilillahi» .

Hum se Ibrahim bin Musa ne byaan kiya , kaha hum ko Hisham ne khabar di , unhein Ibn Jurayj ne khabar di (doosri sanad) Imam Bukhari rahmahullah ne kaha aur mujh se Ishaq bin Mansoor ne byaan kiya , kaha hum ko Abdur Razzaq ne khabar di , kaha hum ko Ibn Jurayj ne khabar di , kaha hum ko Abdul Kareem Jurzi ne khabar di , unhein Abdullah bin Haris ke ghulam Miqsam ne khabar di aur unhein Ibn Abbas razi Allahu anhuma ne khabar di ke «la yastawil qaidoona minal momineena» se isharah hai in logon ki taraf jo Badr mein shareek thay aur jinon ne bila kisi uzr ke Badr ki larai mein shirkat nahi ki thi , woh donon barabar nahi ho sakte .