Aur Nabi Kareem Sallallahu Alaihi Wa Sallam ne farmaya tha Ali Radi Allahu Anhu se ke tum mujh se ho aur mein tum se hun aur Umar Radi Allahu Anhu ne (Ali Radi Allahu Anhu ke bare mein) kaha ke Rasoolullah Sallallahu Alaihi Wa Sallam apni wafat tak in se raazi thay.

Hum se Qutaibah bin Sa'id ne bayan kiya, kaha hum se Abdul Aziz ne bayan kiya, in se Abu Hazim ne aur in se Sahl bin Sa'd Radi Allahu Anhu ne bayan kiya ke Rasoolullah Sallallahu Alaihi Wa Sallam ne jang-e-Khaibar ke mauqay par bayan farmaya ke kal mein ek aise shakhs ko Islami alam dunga jis ke hath par Allah Ta'ala fatah inayat farmayega, rawi ne bayan kiya ke raat ko log yeh sochte rahe ke dekhiye alam kise milta hai, jab subah hui to Aap Sallallahu Alaihi Wa Sallam ki khidmat mein sab hazrat (jo sarkarda thay) hazir hue, sab ko umeed thi ke alam unhein hi milega, lekin Aap Sallallahu Alaihi Wa Sallam ne daryaft farmaya, Ali bin Abi Talib kahan hain? Logon ne bataya ke un ki aankhon mein dard hai, Aap Sallallahu Alaihi Wa Sallam ne farmaya ke phir in ke yahan kisi ko bhej kar bulwa lo, jab woh aaye to Aap Sallallahu Alaihi Wa Sallam ne in ki aankh mein apna thook dala aur in ke liye dua farmayi, is se unhein aisi shifa hasil hui jaise koi maraz pehle tha hi nahi, chunanche Aap ne alam unhein ko inayat farmaya. Ali Radi Allahu Anhu ne arz kiya: Ya Rasul Allah! Mein in se itna ladunga ke woh hamare jaise ho jayein (yani Musalman ban jayein) Aap ne farmaya: Abhi yun hi chalte raho, jab in ke maidan mein utro to pehle unhein Islam ki dawat do aur unhein batao ke Allah ke un par kya huqooq wajib hain, Allah ki qasam agar tumhare zariye Allah Ta'ala ek shakhs ko bhi hidayat dede to woh tumhare liye surkh onton (ki doulat) se behtar hai.

Hum se Qutaibah bin Sa'id ne bayan kiya, in se Hatim ne bayan kiya, in se Yazid bin Abi Ubaid ne bayan kiya, in se Salamah bin Akwa Radi Allahu Anhu ne bayan kiya ke Ali Radi Allahu Anhu Ghazwa-e-Khaibar ke mauqay par Nabi Kareem Sallallahu Alaihi Wa Sallam ke sath ba-wajah aankh dukhne ke nahi aa sake thay, phir unhon ne socha mein Nabi Kareem Sallallahu Alaihi Wa Sallam ke sath ghazwa mein shareek na ho sakun! Chunanche ghar se nikle aur Aap ke lashkar se ja mile, jab is raat ki sham aayi jis ki subah ko Allah Ta'ala ne fatah inayat farmayi thi to Aap Sallallahu Alaihi Wa Sallam ne farmaya: Kal mein ek aise shakhs ko alam dunga ya Aap Sallallahu Alaihi Wa Sallam ne yun farmaya ke (kal) ek aisa shakhs alam ko lega jis se Allah aur us ke Rasool ko mohabbat hai ya Aap ne yeh farmaya ke jo Allah aur us ke Rasool se mohabbat rakhta hai aur Allah Ta'ala is ke hath par fatah inayat farmayega, ittefaq se Ali Radi Allahu Anhu aa gaye, halankay in ke aane ki humein umeed nahi thi logon ne bataya ke yeh hain Ali Radi Allahu Anhu. Aap Sallallahu Alaihi Wa Sallam ne alam unhein de diya, aur Allah Ta'ala ne in ke hath par Khaibar ko fatah kara diya.

Hum se Abdullah bin Maslamah ne bayan kiya, kaha hum se Abdul Aziz bin Abi Hazim ne bayan kiya, in se in ke walid ne ke ek shakhs Sahl bin Sa'd Radi Allahu Anhu ke yahan aaya aur kaha ke yeh falan shakhs is ka ishara Ameer-e-Madinah (Marwan bin Hakam) ki taraf tha, bar-sar-e-mimbar Ali Radi Allahu Anhu ko bura bhala kehta hai, Abu Hazim ne bayan kiya ke Sahl bin Sa'd Radi Allahu Anhu ne poocha kya kehta hai? Us ne bataya ke unhein "Abu Turab" kehta hai, is par Sahl hansne lage aur farmaya ke Allah ki qasam! Yeh naam to un ka Rasoolullah Sallallahu Alaihi Wa Sallam ne rakkha tha aur khud Ali Radi Allahu Anhu ko is naam se zyada apne liye aur koi naam pasand nahi tha. Yeh sun kar mein ne is hadeeth ke janne ke liye Sahl Radi Allahu Anhu se khwahish zahir ki aur arz kiya: Ae Abu Abbas! Yeh waqia kis tarah se hai? Unhon ne bayan kiya ke ek martaba Ali Radi Allahu Anhu Fatimah Radi Allahu Anha ke yahan aaye aur phir bahar aa kar masjid mein lait rahe, phir Aap Sallallahu Alaihi Wa Sallam ne (Fatimah Radi Allahu Anha se) daryaft farmaya, tumhare chacha ke bete kahan hain? Unhon ne bataya ke masjid mein hain. Aap Sallallahu Alaihi Wa Sallam masjid mein tashreef laye, dekha to in ki chadar peeth se neeche gir gayi hai aur in ki kamar par acchi tarah se khak lag chuki hai. Aap Sallallahu Alaihi Wa Sallam mitti in ki kamar se saaf farmane lage aur bole, utho Ae Abu Turab utho! (do martaba Aap Sallallahu Alaihi Wa Sallam ne farmaya).

Hum se Muhammad bin Rafi ne bayan kiya, kaha hum se Husain ne, in se Zaidah ne, in se Abu Husain ne, in se Sa'd bin Ubaidah ne bayan kiya ke ek shakhs Abdullah bin Umar Radi Allahu Anhuma ki khidmat mein aaya aur Uthman Radi Allahu Anhu ke mutalliq poocha, Ibn Umar Radi Allahu Anhuma ne in ke mahasin ka zikr kiya, phir kaha ke shayad yeh batein tumhein buri lagi hongi, us ne kaha ji haan, Ibn Umar Radi Allahu Anhuma ne kaha Allah teri naak khak-aalooda kare phir us ne Ali Radi Allahu Anhu ke mutalliq poocha, unhon ne in ke bhi mahasin zikr kiye aur kaha ke Ali Radi Allahu Anhu ka gharana Nabi Kareem Sallallahu Alaihi Wa Sallam ke khandan ka nihayat umdah gharana hai, phir kaha shayad yeh batein bhi tumhein buri lagi hongi, us ne kaha ke ji haan, Abdullah bin Umar Radi Allahu Anhuma bole Allah teri naak khak-aalooda kare, ja, aur mera jo bigarhna chahe bigarh lena, kuch kami na karna.

Hum se Muhammad bin Bashar ne bayan kiya, kaha hum se Ghundar ne bayan kiya, kaha hum se Shu'bah ne bayan kiya, in se Hakam ne, unhon ne Ibn Abi Laila se suna, kaha hum se Ali Radi Allahu Anhu ne bayan kiya ke Fatimah Radi Allahu Anha ne (Nabi Kareem Sallallahu Alaihi Wa Sallam se) chakki peesne ki takleef ki shikayat ki, is ke baad Aap Sallallahu Alaihi Wa Sallam ke pas kuch qaidi aaye to Fatimah Radi Allahu Anha Aap ke pas aayin lekin Aap maujood nahi thay. Aisha Radi Allahu Anha se in ki mulaqat hui to in se is ke bare mein unhon ne baat ki jab Nabi Kareem Sallallahu Alaihi Wa Sallam tashreef laye to Aisha Radi Allahu Anha ne Aap Sallallahu Alaihi Wa Sallam ko Fatimah Radi Allahu Anha ke aane ki ittela di, is par Nabi Kareem Sallallahu Alaihi Wa Sallam khud hamare ghar tashreef laye, is waqt hum apne bistaron par lait chuke thay, mein ne chaha ke khara ho jaun lekin Aap Sallallahu Alaihi Wa Sallam ne farmaya ke yun hi laite raho, is ke baad Aap hum dono ke darmiyan baith gaye aur mein ne Aap Sallallahu Alaihi Wa Sallam ke qadmon ki thandak apne seene mein mehsoos ki,. Phir Aap Sallallahu Alaihi Wa Sallam ne farmaya ke tum logon ne mujh se jo talab kiya hai kya mein tumhein is se acchi baat na bataun, jab tum sone ke liye bistar par laito to chountis martaba Allahu Akbar, teintis martaba Subhan Allah aur teintis martaba Al-Hamdulillah parh liya karo, yeh amal tumhare liye kisi khadim se behtar hai.

Mujh se Muhammad bin Bashar ne bayan kiya, kaha hum se Ghundar ne bayan kiya, kaha hum se Shu'bah ne bayan kiya, in se Sa'd ne, unhon ne Ibrahim bin Sa'd se suna, in se in ke walid ne bayan kiya ke Nabi Kareem Sallallahu Alaihi Wa Sallam ne Ali Radi Allahu Anhu se farmaya ke kya tum is par khush nahi ho ke tum mere liye aise ho jaise Musa Alaihis Salam ke liye Haroon Alaihis Salam thay.

Hum se Ali bin Ja'd ne bayan kiya, kaha hum ko Shu'bah ne khabar di, unhein Ayub ne, unhein Ibn Sireen ne, unhein Ubaidah ne ke Ali Radi Allahu Anhu ne Iraq walon se kaha ke jis tarah tum pehle faisla kiya karte thay ab bhi kiya karo kyunke mein ikhtilaf ko bura janta hun. Is waqt tak ke sab log jama ho jayein ya mein bhi apne sathiyon (Abu Bakr-o-Umar Radi Allahu Anhuma) ki tarah dunya se chala jaun, Ibn Sireen Rahimahullah kaha karte thay ke aam log (Rawafid) jo Ali Radi Allahu Anhu se riwayaat (Shaikhain ki mukhalifat mein) bayan karte hain woh qatan jhooti hain.