Mujh se Muhammad bin Muthanna ne bayan kiya, kaha hum se Ma'adh ne bayan kiya, kaha ke mujh se mere walid ne bayan kiya, un se Qatadah ne aur un se Anas Radi Allahu Anhu ne bayan kiya ke Nabi Kareem Sallallahu Alaihi Wa Sallam se do sahabi (Usaid bin Hudair aur Abbad bin Bishr Radi Allahu Anhuma) utar kar (apne ghar) wapas hue. Raat andheri thi lekin do chiragh ki tarah ki koi cheez in ke aage roshni karti jati thin. Phir jab yeh dono (raste mein, apne apne ghar ki taraf jane ke liye) juda hue to woh cheez dono ke sath alag alag ho gayi aur is tarah woh apne ghar walon ke pas pahunch gaye.

Mujh se Abdullah bin Abu al-Aswad ne bayan kiya, kaha hum se Yahya ne bayan kiya, kaha un se Ismail ne bayan kiya, kaha hum se Qais ne bayan kiya ke mein ne Mugheerah bin Shu'bah Radi Allahu Anhu se suna ke Nabi Kareem Sallallahu Alaihi Wa Sallam ne farmaya "Meri ummat ke kuch log hamesha ghalib rahein gay, yahan tak ke Qiyamat ya maut aayegi is waqt bhi woh ghalib hi honge."

Hum se Humaidi ne bayan kiya, kaha hum se Waleed ne bayan kiya, kaha ke mujh se Yazid bin Jabir ne bayan kiya, kaha ke mujh se Umair bin Hani ne bayan kiya aur unhon ne Muawiya bin Abi Sufyan se suna, unhon ne bayan kiya ke mein ne Rasoolullah Sallallahu Alaihi Wa Sallam se suna tha. Aap Sallallahu Alaihi Wa Sallam farma rahe thay ke meri ummat mein hamesha ek giroh aisa maujood rahega jo Allah Ta'ala ki shariat par qaim rahega, unhein zaleel karne ki koshish karne wale aur isi tarah un ki mukhalifat karne wale unhein koi nuqsan na pahuncha sakein gay, yahan tak ke Qiyamat aa jayegi aur woh isi halat par rahein gay. Umair ne bayan kiya ke is par Malik bin Yakhamir ne kaha ke Mu'adh bin Jabal Radi Allahu Anhu ne kaha tha ke hamare zamane mein yeh log Shaam mein hain. Ameer Muawiya Radi Allahu Anhu ne kaha ke dekho yeh Malik bin Yakhamir yahan maujood hain, jo keh rahe hain ke unhon ne Mu'adh Radi Allahu Anhu se suna ke yeh log Shaam ke mulk mein hain.

Hum se Ali bin Abdullah Madini ne bayan kiya, kaha hum ko Sufyan bin Uyainah ne khabar di, kaha hum se Shabeeb bin Gharqadah ne bayan kiya ke mein ne apne qabeele ke logon se suna tha, woh log Urwah se naqal karte thay (jo Abu al-Ja'd ke bete aur sahabi thay) ke Nabi Kareem Sallallahu Alaihi Wa Sallam ne unhein ek dinar diya ke woh is ki ek bakri khareed kar le aayein. Unhon ne is dinar se do bakriyan khareedein, phir ek bakri ko ek dinar mein bech kar dinar bhi wapas kar diya. Aur bakri bhi pesh kar di. Aap Sallallahu Alaihi Wa Sallam ne is par in ki tijarat mein barkat ki dua farmayi. Phir to in ka yeh haal hua ke agar mitti bhi khareedte to is mein unhein nafa ho jata. Sufyan ne kaha ke Hasan bin Ammarah ne humein yeh hadeeth pahunchayi thi Shabeeb bin Gharqadah se. Hasan bin Ammarah ne kaha ke Shabeeb ne yeh hadeeth khud Urwah Radi Allahu Anhu se suni thi. Chunanche mein Shabeeb ki khidmat mein gaya to unhon ne bataya ke mein ne yeh hadeeth khud Urwah se nahi suni thi. Albatta mein ne apne qabeele ke logon ko un ke hawale se bayan karte suna tha.

Albatta yeh doosri hadeeth khud mein ne Urwah Radi Allahu Anhu se suni hai, woh bayan karte thay ke mein ne Nabi Kareem Sallallahu Alaihi Wa Sallam se suna, Aap Sallallahu Alaihi Wa Sallam ne farmaya khair aur bhalayi ghoron ki peshani ke sath Qiyamat tak ke liye bandhi hui hai. Shabeeb ne kaha ke mein ne Urwah Radi Allahu Anhu ke ghar mein sattar ghore dekhe. Sufyan ne kaha ke Urwah Radi Allahu Anhu ne Nabi Kareem Sallallahu Alaihi Wa Sallam ke liye bakri khareedi thi. Shayad woh qurbani ke liye hogi.

Hum se Musaddad ne bayan kiya, unhon ne kaha ke hum se Yahya ne bayan kiya, un se Abdullah ne bayan kiya, unhein Nafi ne khabar di aur unhein Abdullah bin Umar Radi Allahu Anhuma ne ke Rasoolullah Sallallahu Alaihi Wa Sallam ne farmaya "Ghore ki peshani ke sath khair-o-barkat Qiyamat tak ke liye bandh di gayi hai."

Hum se Qais bin Hafs ne bayan kiya, kaha hum se Khalid bin Harith ne bayan kiya, kaha hum se Shu'bah ne bayan kiya, un se Abu al-Tayyah ne bayan kiya, aur unhon ne Anas bin Malik Radi Allahu Anhu se suna ke Nabi Kareem Sallallahu Alaihi Wa Sallam ne farmaya tha ke ghore ki peshani ke sath barkat bandh di gayi hai.

Hum se Abdullah bin Maslamah Qanabi ne bayan kiya, un se Imam Malik ne, un se Zaid bin Aslam ne, un se Abu Salih Samman ne aur un se Abu Hurairah Radi Allahu Anhu ne ke Nabi Kareem Sallallahu Alaihi Wa Sallam ne farmaya ke ghore teen aadmiyon ke liye hain. Ek ke liye to woh ba-is-e-sawab hain aur ek ke liye woh maaf yani mubah hain aur ek ke liye woh wabal hain. Jis ke liye ghora ba-is-e-sawab hai yeh woh shakhs hai jo jihad ke liye ise pale aur charagah ya bagh mein is ki rassi ko (jis se woh bandha hota hai) khoob daraz kar de to woh apne is toul-o-arz mein jo kuch bhi charta hai woh sab is ke malik ke liye nekiyan ban jati hain aur agar kabhi woh apni rassi tura kar do char qadam dour le to is ki leed bhi malik ke liye ba-is-e-sawab ban jati hai aur kabhi agar woh kisi nehar se guzarte hue is mein se pani pee le agarchay malik ke dil mein ise pehle se pani pilane ka khayal bhi na tha, phir bhi ghore ka pani peena is ke liye sawab ban jata hai. Aur ek woh aadmi jo ghore ko logon ke samne apni hajat, parda-poshi aur sawal se bache rehne ki gharz se pale aur Allah Ta'ala ka jo haq is ki gardan aur is ki peeth mein hai ise bhi woh faramosh na kare to yeh ghora is ke liye ek tarah ka parda hota hai aur ek shakhs woh hai jo ghore ko fakhr aur dikhawe aur ahl-e-Islam ki dushmani mein pale to woh is ke liye wabal-e-jaan hai aur Nabi Kareem Sallallahu Alaihi Wa Sallam se gadhon ke bare mein poocha gaya to Aap ne farmaya ke is jame aayat ke siwa mujh par gadhon ke bare mein kuch nazil nahi hua "faman ya'mal mithqala dharratin khairan yarahu, wa man ya'mal mithqala dharratin sharran yarahu" "jo shakhs ek dharre ke barabar bhi neki karega to us ka bhi woh badla payega aur jo shakhs ek dharre ke barabar bhi burayi karega to woh us ka bhi badla payega."

Hum se Ali bin Abdullah ne bayan kiya, kaha hum se Sufyan bin Uyainah ne bayan kiya, kaha hum se Ayub Sakhtiyani ne bayan kiya, un se Muhammad bin Sireen ne aur un se Anas bin Malik Radi Allahu Anhu ne bayan kiya ke Nabi Kareem Sallallahu Alaihi Wa Sallam Khaibar mein subah savere hi pahunch gaye. Khaibar ke Yahudi is waqt apne phaware le kar (kheton mein kaam karne ke liye) ja rahe thay ke unhon ne Aap Sallallahu Alaihi Wa Sallam ko dekha aur yeh kehte hue ke Muhammad lashkar le kar aa gaye, woh qila ki taraf bhage. Is ke baad Aap Sallallahu Alaihi Wa Sallam ne apne hath utha kar farmaya "Allahu Akbar Khaibar to barbad hua ke jab hum kisi qoum ke maidan mein (jang ke liye) utar jate hain to phir draye hue logon ki subah buri ho jati hai."

Mujh se Ibrahim bin al-Munzir ne bayan kiya, kaha mujh se Muhammad bin Ismail Ibn Abi al-Fudaik ne bayan kiya, un se Muhammad bin Abdur Rahman Ibn Abi Dhib ne, un se Sa'id Maqburi ne aur un se Abu Hurairah Radi Allahu Anhu ne bayan kiya ke mein ne arz kiya: Ya Rasul Allah! Mein ne Aap se bahut si ahadeeth ab tak suni hain lekin mein unhein bhool jata hun. Aap Sallallahu Alaihi Wa Sallam ne farmaya ke apni chadar phailao, mein ne chadar phaila di aur Aap Sallallahu Alaihi Wa Sallam ne apne hath se is mein ek lap bhar kar daal di aur farmaya ke ise apne badan se laga lo. Chunanche mein ne laga liya aur is ke baad kabhi koi hadeeth nahi bhoola.