Hum se Humaidi ne bayan kiya, kaha hum se Sufyan Bin Uyainah ne, kaha ke hum se Muhammad Bin Munkadir ne bayan kiya, kaha ke mein ne Jabir Bin Abdullah (Radi Allahu Anhuma) se suna, wo bayan karte thay ke Nabi Kareem (Sallallahu Alaihi Wasallam) ne (ek kaam ke liye) Ghazwah-e-Khandaq ke mauqe par sahaba ko pukara, to Zubair (Radi Allahu Anhu) ne is ke liye kaha ke mein hazir hoon. Phir Aap (Sallallahu Alaihi Wasallam) ne sahaba ko pukara, aur is martaba bhi Zubair (Radi Allahu Anhu) ne apne ko pesh kiya, Aap (Sallallahu Alaihi Wasallam) ne phir pukara aur phir Zubair (Radi Allahu Anhu) ne apne aap ko pesh kiya, Rasul Allah (Sallallahu Alaihi Wasallam) ne aakhir farmaya ke har Nabi ke hawari hote hain aur mere hawari Zubair hain. Sufyan ne kaha ke hawari ke maani muawin, madadgar ke hain (ya wafadar mehram-e-raaz ko hawari kaha gaya hai)
.

Hum se Abul Waleed ne bayan kiya, kaha hum se Aasim Bin Muhammad ne bayan kiya, kaha ke mujh se mere baap ne bayan kiya, aur un se Ibn Umar (Radi Allahu Anhuma) ne ke (doosri sanad) hum se Abu Nuaym ne bayan kiya, kaha hum se Aasim Bin Muhammad Bin Zaid Bin Abdullah Bin Umar (Radi Allahu Anhuma) ne bayan kiya, in se un ke walid ne aur in se Abdullah Bin Umar (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya "Jitna mein janta hoon, agar logon ko bhi akele safar (ki buraiyon) ke mutalliq itna ilm hota to koi sawar raat mein akela safar na karta."
.