Aur Allah Ta'ala ka irshad "Iz yulqoona aqlamahum ayyuhum yakfulu Maryama" "Jab wo apni qalmein dalne lage (qura andazi ke liye taake) faisla kar sakein ke Maryam ki kafalat kaun kare." Ibn Abbas (Radi Allahu Anhuma) ne (ayat-e-mazkoora ki tafseer mein farmaya) ke jab sab logon ne (nehar-e-Urdun mein) apne apne qalam dale, to tamam qalam pani ke bahao ke sath beh gaye, lekin Zakariya (Alaihis Salam) ka qalam is bahao mein upar aa gaya. Is liye unhon ne hi Maryam (Alaihas Salam) ki tarbiyat apne zimme li aur Allah Ta'ala ke irshad "Fas-haama" ke maani hain pas unhon ne qura dala. "Fakaana minal-mudhazeen" (mein "mudhazeen" ke maani hain) "minal-mashumeen" yani qura unhein ke naam par nikla. Abu Hurairah (Radi Allahu Anhu) ne kaha ke Nabi Kareem (Sallallahu Alaihi Wasallam) ne (kisi muqadma mein mudda-alai-hi hone ki bina par) kuch logon se qasam khane ke liye farmaya, to wo sab (ek sath) aage barhe. Is liye Aap (Sallallahu Alaihi Wasallam) ne un mein qura dalne ke liye hukm farmaya taake faisla ho ke sab se pehle qasam kaun aadmi khaye
.

Hum se Umar Bin Hafs Bin Ghiyas ne bayan kiya, kaha hum se hamare walid ne bayan kiya, kaha hum se Aamash ne, kaha ke hum se Shubi ne bayan kiya, unhon ne Numan Bin Bashir (Radi Allahu Anhuma) se suna, wo kehte thay ke Nabi Kareem (Sallallahu Alaihi Wasallam) ne farmaya "Allah ki hudood mein sasti bartne wale aur is mein mubtala ho jane wale ki misal ek aaisi qoum ki si hai jis ne ek kashti (par safar karne ke liye jagah ke bare mein) qura andazi ki. Phir natije mein kuch log neeche sawaar hue aur kuch upar. Neeche ke log pani le kar upar ki manzil se guzarte thay aur is se upar walon ko takleef hoti thi. Is khayal se neeche wala ek aadmi kulhari se kashti ka neeche ka hissa katne laga (taake neeche hi samandar se pani le liya kare) ab upar wale aaye aur kehne lage ke ye kya kar rahe ho? Us ne kaha ke tum logon ko (mere upar aane jane se) takleef hoti thi aur mere liye bhi pani zaroori tha. Ab agar unhon ne neeche wale ka hath pakar liya to unhein bhi najat di aur khud bhi najat payi. Lekin agar ise yun hi chor diya to unhein bhi halak kiya aur khud bhi halak ho gaye."
.

Hum se Abu Al-Yaman ne bayan kiya, kaha hum ko Shoaib ne khabar di Zuhri se, un se Kharija Bin Zaid Ansari ne bayan kiya ke un ki rishte dar ek aurat Umm-ul-Alaa nami ne jinhon ne Rasul Allah (Sallallahu Alaihi Wasallam) se baiat bhi ki thi, unhein khabar di ke Ansar ne Muhajireen ko apne yahan thehrane ke liye qure dale to Usman Bin Mazoon (Radi Allahu Anhu) ka qayam hamare hisse mein aaya. Umm-ul-Alaa (Radi Allahu Anha) ne kaha ke phir Usman Bin Mazoon (Radi Allahu Anhu) hamare ghar thehre aur kuch muddat baad wo bimar par gaye. Hum ne un ki timar-dari ki magar kuch din baad un ki wafat ho gayi. Jab hum unhein kafan de chuke to Rasul Allah (Sallallahu Alaihi Wasallam) tashreef laye. Mein ne kaha, Abu Al-Saib! (Usman Radi Allahu Anhu ki kuniyat) tum par Allah ki rahamtein nazil hon, meri gawahi hai ke Allah Ta'ala ne apne yahan tumhari zaroor izzat aur barayi ki ho gi. Is par Aap (Sallallahu Alaihi Wasallam) ne farmaya ye baat tumhein kaise maloom ho gayi ke Allah Ta'ala ne un ki izzat aur barayi ki ho gi. Mein ne arz kiya, mere maan aur baap Aap par fida hon, mujhe ye baat kisi zariya se maloom nahi hui hai. Phir Aap (Sallallahu Alaihi Wasallam) ne farmaya, Usman ka jahan tak mamla hai, to Allah gawah hai ke un ki wafat ho chuki aur mein in ke bare mein Allah se khair hi ki umeed rakhta hoon, lekin Allah ki qasam! Allah ke Rasul hone ke bawajood mujhe bhi ye ilm nahi ke in ke sath kya mamla ho ga. Umm-ul-Alaa (Radi Allahu Anha) kehne lagein, Allah ki qasam! ab is ke baad mein kisi shaks ki paki kabhi bayan nahi karoon gi. Is se mujhe ranj bhi hua (ke Aap Sallallahu Alaihi Wasallam ke samne mein ne ek aaisi baat kahi jis ka mujhe haqeeqi ilm nahi tha) unhon ne kaha (ek din) mein so rahi thi, mein ne khwab mein Usman (Radi Allahu Anhu) ke liye ek behta hua chashma dekha. Mein Rasul Allah (Sallallahu Alaihi Wasallam) ki khidmat mein hazir hui Aap (Sallallahu Alaihi Wasallam) se khwab bayan kiya. Aap (Sallallahu Alaihi Wasallam) ne farmaya ke ye un ka amal (naik) tha
.

Hum se Muhammad Bin Muqatil ne bayan kiya, kaha hum ko Abdullah ne khabar di, unhein Yunus ne khabar di Zuhri se, unhein Urwah ne khabar di aur un se Aisha (Radi Allahu Anha) ne bayan kiya ke Rasul Allah (Sallallahu Alaihi Wasallam) jab safar ka irada farmate to apni biwiyon mein qura andazi farmate aur jis ka naam nikal aata, unhein apne sath le jate. Aap (Sallallahu Alaihi Wasallam) ka ye bhi mamool tha ke apni har biwi ke liye ek din aur ek raat muqarrar kar di thi. Albatta Sauda Bint Zama (Radi Allahu Anha) ne (apni umar ke aakhri daur mein) apni bari Aap (Sallallahu Alaihi Wasallam) ki zauja Aisha (Radi Allahu Anha) ko de di thi taake Rasul Allah (Sallallahu Alaihi Wasallam) ki un ko raza hasil ho (is se bhi qura andazi sabit hui)
.

Hum se Ismail ne bayan kiya, kaha ke mujh se Imam Malik ne bayan kiya, un se Abu Bakr ke ghalam Sumi ne bayan kiya, un se Abu Salih ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Agar logon ko maloom hota ke azan aur saff-e-awwal mein kitna sawab hai aur phir (unhein is ke hasil karne ke liye) qura andazi karni parhti, to wo qura andazi bhi karte aur agar unhein maloom ho jaye ke namaz sawere parhne mein kitna sawab hai to log ek doosre se sabqat karne lagein aur agar unhein maloom ho jaye ke Isha aur subah ki kitni fazilatein hain to agar ghutnou ke bal aana parhta to phir bhi aate."
.