Imam Malik (Rahimahullah) ne kaha ke ariya ye hai ke koi shakhs (kisi bagh ka malik apne bagh mein) doosre shakhs ko khajoor ka darakht (hiba ke taur par) dede, phir is shakhs ka bagh mein aana acha na maloom ho, to is soorat mein wo shakhs torri hui khajoor ke badle mein apna darakht (jisay wo hiba kar chuka hai) khareed le is ki is ke liye rukhsat di gayi hai aur Ibn Idrees (Imam Shafiee Rahimahullah) ne kaha ke ariya jaiz nahi hota magar (panch wasaq se kam mein) sookhi khajoor naap kar hathon hath dede ye nahi ke donon taraf andaza ho. Aur is ki tayeed Sahl Bin Abi Hathma (Radi Allahu Anhu) ke qaul se bhi hoti hai ke wasaq se naap kar khajoor di jaye. Ibn Ishaq (Rahimahullah) ne apni hadees mein Nafay se bayan kiya aur unhon ne Ibn Umar (Radi Allahu Anhuma) se bayan kiya ke ariya ye hai ke koi shakhs apne bagh mein khajoor ke ek do darakht kisi ko ariyatan dede aur Yezid ne Sufyan Bin Husain se bayan ki ke ariya khajoor ke is darakht ko kehte hain jo miskeenon ko lillah de diya jaye, lekin wo khajoor ke pakne ka intezar nahi kar sakte to Nabi Kareem (Sallallahu Alaihi Wasallam) ne unhein is ki ijazat di ke jis qadar sookhi khajoor ke badal chahein aur jis ke hath chahein bech sakte hain
.

Hum se Muhammad Bin Muqatil ne bayan kiya, kaha ke hum ko Imam Abdullah Bin Mubarak ne khabar di, unhon ne kaha ke humein Musa Bin Uqba ne, unhein Nafay ne, unhein Abdullah Bin Umar (Radi Allahu Anhuma) ne, unhein Zaid Bin Thabit (Radi Allahu Anhu) ne ke Rasul Allah (Sallallahu Alaihi Wasallam) ne ariya ki ijazat di ke wo andaze se bechi ja sakti hai. Musa Bin Uqba ne kaha ke araya kuch muayyan darakht jin ka mewa to utre hue mewe ke badal khareede
.