Aur Abdur Rahman Bin Auf (Radi Allahu Anhu) ne kaha ke jab hum Madinah aaye, to mein ne (apne islami bhai se) poocha ke kya yahan koi bazaar hai. Anas (Radi Allahu Anhu) ne bayan kiya ke Abdur Rahman Bin Auf (Radi Allahu Anhu) ne kaha, mujhe bazaar bata do aur Umar (Radi Allahu Anhu) ne ek dafa kaha tha ke mujhe bazaar ki khareed-o-farokht ne ghafil rakkha
.

Hum se Muhammad Bin Sabah ne bayan kiya, kaha ke hum se Ismail Bin Zakariya ne bayan kiya, un se Muhammad Bin Sauqa ne, un se Nafay Bin Jubair Bin Mut'im ne bayan kiya, kaha ke mujh se Aisha (Radi Allahu Anha) ne bayan kiya, ke Rasul Allah (Sallallahu Alaihi Wasallam) ne farmaya, qayamat ke qareeb ek lashkar Ka'ba par chorhayi kare ga. Jab wo maqam-e-Baida mein pohanche ga to unhein awwal se aakhir tak sab ko zameen mein dhansa diya jaye ga. Aisha (Radi Allahu Anha) ne bayan kiya, ke mein ne kaha, ya Rasul Allah! usay shuru se aakhir tak kyun kar dhansaya jaye ga jab ke wahin un ke bazaar bhi hon ge aur wo log bhi hon ge jo un lashkariyon mein se nahi hon ge ? Aap (Sallallahu Alaihi Wasallam) ne farmaya ke han! shuru se aakhir tak un sab ko dhansa diya jaye ga. Phir un ki niyaton ke mutabiq wo utthaye jayein ge
.

Hum se Qutaiba ne bayan kiya, kaha ke hum se Jareer ne bayan kiya, un se Amash ne, un se Abu Salih ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya, jama'at ke sath kisi ki namaz bazaar mein ya apne ghar mein namaz parhne se darjon mein kuch oopar bees darjay zyada fazeelat rakhti hai. Kyunke jab ek shakhs achi tarah wuzu karta hai phir masjid mein sirf namaz ke irada se aata hai. Namaz ke siwa aur koi cheez usay le jane ka ba'is nahi banti to jo bhi qadam wo utthata hai is se ek darja is ka buland hota hai ya is ki wajah se ek gunah is ka maaf hota hai aur jab tak ek shakhs apne musalle par baitha rehta hai jis par is ne namaz parhi hai to farishte barabar is ke liye rahmat ki duaien yun karte rehte hain «Allahumma salli alaihi, Allahumma-ar-hamhu» ”Ae Allah! is par apni rahmatien nazil farma, ae Allah is par raham farma.“ Ye is waqt tak hota rehta hai jab tak wo wuzu torr kar farishton ko takleef na pohanchaye jitni dair tak bhi aadmi namaz ki wajah se ruka rehta hai wo sab namaz hi mein shumar hota hai
.

Hum se Adam Bin Abi Iyas ne bayan kiya, kaha ke hum se Shuba ne bayan kiya, un se Humaid Taweel ne bayan kiya, aur un se Anas Bin Malik (Radi Allahu Anhu) ne ke Nabi Kareem (Sallallahu Alaihi Wasallam) ek martaba bazaar mein thay. Ke ek shakhs ne pukara ya Aba-al-Qasim! Aap (Sallallahu Alaihi Wasallam) ne is ki taraf dekha. (Kyunke Aap ki kuniyat Abu-al-Qasim hi thi) is par is shakhs ne kaha ke mein ne to is ko bulaya tha. (Yaani ek doosre shakhs ko jo Abu-al-Qasim hi kuniyat rakhta tha) Aap (Sallallahu Alaihi Wasallam) ne farmaya ke tum log mere naam par naam rakkha karo lekin meri kuniyat tum apne liye na rakkho
.

Hum se Malik Bin Ismail ne bayan kiya, kaha ke hum se Zubair ne bayan kiya, un se Humaid ne, aur un se Anas (Radi Allahu Anhu) ne ke ek shakhs ne Baqee mein (kisi ko) pukara ”Ae Abu-al-Qasim“ Nabi Kareem (Sallallahu Alaihi Wasallam) ne is ki taraf dekha, to is shakhs ne kaha ke mein ne aap ko nahi pukara. Is doosre aadmi ko pukara tha, Aap (Sallallahu Alaihi Wasallam) ne farmaya mere naam par naam rakkha karo lekin meri kuniyat na rakkha karo
.

Hum se Ali Bin Abdullah ne bayan kiya, kaha ke hum se Sufyan Bin Uyainah ne bayan kiya, un se Ubaidullah Bin Yazid ne un se Nafay Bin Jubair Bin Mut'im ne aur un se Abu Hurairah Dosi (Radi Allahu Anhu) ne bayan kiya ke Rasul Allah (Sallallahu Alaihi Wasallam) din ke ek hissa mein tashreef le chale. Na Aap (Sallallahu Alaihi Wasallam) ne mujh se koi baat ki aur na mein ne Aap (Sallallahu Alaihi Wasallam) se. Isi tarah Aap (Sallallahu Alaihi Wasallam) Bani Qaynuqa ke bazaar mein aaye phir (wapas hue aur) Fatima (Radi Allahu Anha) ke ghar ke aangan mein baith gaye aur farmaya, wo baccha kahan hai, wo baccha kahan hai ? Fatima (Radi Allahu Anha) (kisi mashghooliyat ki wajah se fauran) Aap (Sallallahu Alaihi Wasallam) ki khidmat mein hazir na ho sakeein. Mein ne khayal kiya, mumkin hai Hasan (Radi Allahu Anhu) ko kurta waghera pehna rahi hon ya nahla rahi hon. Thori hi dair baad Hasan (Radi Allahu Anhu) dorte hue aaye, Aap (Sallallahu Alaihi Wasallam) ne un ko seene se laga liya aur bosa liya, phir farmaya ae Allah ?! usay mehboob rakh aur is shakhs ko bhi mehboob rakh jo is se mohabbat rakkhe. Sufyan ne kaha ke Ubaidullah ne mujhe khabar di, unhon ne Nafay Bin Jubair ko dekha ke unhon ne witr ki namaz sirf ek hi rak'at parhi thi
.

Hum se Ibrahim Bin-al-Munzir ne bayan kiya, kaha ke hum se Abu Zamra Anas Bin Iyas ne bayan kiya, kaha ke hum se Musa Bin Uqba ne bayan kiya, un se Nafay ne aur un se Ibn Umar (Radi Allahu Anhuma) ne ke sahaba (Radi Allahu Anhum) Nabi Kareem (Sallallahu Alaihi Wasallam) ke zamana mein ghalla qafilon se khareedte thay to aap un ke paas koi aadmi bhej kar wahin par jahan unhon ne ghalla khareeda hota. Is ghalle ko bechne se mana farma dete aur usay wahan se la kar bechne ka hukm hota jahan aam taur par ghalla bikta tha
.

Kaha ke hum se Ibn Umar (Radi Allahu Anhuma) ne ye bhi bayan kiya ke Nabi Kareem (Sallallahu Alaihi Wasallam) ne poori tarah apne qabza mein karne se pehle usay bechne se mana farmaya
.