Aur Hasan Basri (Rahimahullah) ne kaha ke agar is ki taraf se (Ramzan ke tees rozon ke badle) tees aadmi ek din roza rakh lein to jaiz hai
.

Hum se Muhammad Bin Khalid ne bayan kiya, kaha hum se Muhammad Bin Musa Ibn Ayan ne bayan kiya, unhon ne kaha ke hum se un ke walid ne bayan kiya, un se Amr Bin Harith ne, un se Ubaidullah Bin Abi Jafar ne, un se Muhammad Bin Jafar ne kaha, un se Urwah ne bayan kiya aur un se Aisha (Radi Allahu Anha) ne ke Rasul Allah (Sallallahu Alaihi Wasallam) ne farmaya agar koi shakhs mar jaye aur is ke zimme roze wajib hon to is ka wali is ki taraf se roze rakh de, Musa ke sath is hadees ko Ibn Wahb ne bhi Amr se riwayat kiya aur Yahya Bin Ayyub Sakhtiyani ne bhi Ibn Abi Jafar se
.

Hum se Muhammad Bin Abdul Rahim ne bayan kiya, kaha hum se Muawiyah Bin Amr ne bayan kiya, kaha hum se Zaidah ne bayan kiya, un se Amash ne, un se Muslim Bateen ne, un se Saeed Bin Jubair ne aur un se Ibn Abbas (Radi Allahu Anhuma) ne ke ek shakhs Rasul Allah (Sallallahu Alaihi Wasallam) ki khidmat mein hazir hua aur arz ki ya Rasul Allah! meri maan ka intiqal ho gaya aur un ke zimme ek mahine ke roze baqi reh gaye hain. Kya mein un ki taraf se qaza rakh sakta hoon ? Aap (Sallallahu Alaihi Wasallam) ne farmaya han zaroor, Allah Ta'ala ka qarz is baat ka zyada mustahiq hai ke usay ada kar diya jaye. Suleiman Amash ne bayan kiya ke Hakam aur Salma ne kaha jab Muslim Bateen ne ye hadees bayan kiya to hum sab wahin baithe hue thay. In donon hazraat ne farmaya ke hum ne Mujahid se bhi suna tha ke wo ye hadees Ibn Abbas (Radi Allahu Anhuma) se bayan karte thay. Abu Khalid se riwayat hai ke Amash ne bayan kiya un se Hakam, Muslim Bateen aur Salma Bin Kuhail ne, un se Saeed Bin Jubair, Ata aur Mujahid ne Ibn Abbas (Radi Allahu Anhuma) se ke ek khatoon ne Nabi Kareem (Sallallahu Alaihi Wasallam) se arz ki ke meri ”behan“ ka intiqal ho gaya hai phir yehi qissa bayan kiya, Yahya aur Saeed aur Abu Muawiyah ne kaha, un se Amash ne bayan kiya, un se Muslim ne, un se Saeed ne aur un se Ibn Abbas (Radi Allahu Anhuma) ne ke ek khatoon ne Nabi Kareem (Sallallahu Alaihi Wasallam) se arz ki ke meri maan ka intiqal ho gaya hai aur Ubaidullah ne bayan kiya, un se Zaid Ibn Abi Aneesa ne, un se Hakam ne, un se Saeed Bin Jubair ne aur un se Ibn Abbas (Radi Allahu Anhuma) ne ke ek khatoon ne Nabi Kareem (Sallallahu Alaihi Wasallam) se arz ki ke meri maan ka intiqal ho gaya hai aur un par nazar ka ek roza wajib tha aur Abu Hareez Abdullah Bin Husain ne bayan kiya, kaha hum se Ikrima ne bayan kiya aur un se Ibn Abbas (Radi Allahu Anhuma) ne ke khatoon ne Nabi Kareem (Sallallahu Alaihi Wasallam) ki khidmat mein arz ki ke meri maan ka intiqal ho gaya hai aur un par pandrah din ke roze wajib thay
.